فوتو: اشىق دەرەككوز
يرينا سميرنوۆانىڭ ايتۋىنشا,ء بىزدىڭ ازاماتتارعا ول ۇيىمداردىڭ بوتەن قۇندىلىقتاردى تاڭۋى, قوعامىمىزدى ەسەڭگىرەتىپ, جاستارىمىزدى ازعىنداتۋى ۇنامايدى. ياعني, دەپۋتات ەل ازاماتتارىنىڭ بوتەن ويىننىڭ تۇتقىنى بولعىسى كەلمەيتىنىن تىلگە تيەك ەتتى.
شەتەلدىك ۇەۇ تاقىرىبىنا دەگەن قىزىعۋشىلىق اقش پرەزيدەنتى دونالد ترامپتىڭ ارنايى وكىلى «ازاتتىق راديوسى» مەن «امەريكا داۋىسى» مەديارەسۋرستارىن جابۋدى ۇسىنعاننان كەيىن ودان ءارى كۇشەيدى. بۇل باستامانى كاسىپكەر يلون ماسك قولداپ, اتالعان بۇقارالىق اقپارات قۇرالدارىن «ەشكىمگە قاجەت ەمەس» جانە «راديكالدى سولشىل توپتارعا تولى» دەپ سيپاتتادى.
رەسمي دەرەكتەرگە سايكەس, قازىرگى ۋاقىتتا قازاقستاندا 200-گە جۋىق ۇەۇ شەتەلدىك قارجىلاندىرۋ الادى, ولاردىڭ شامامەن 70%-ى اقش-تىڭ ءارتۇرلى كوزدەرىنەن قاراجات العان. ەلدە 165 دونور ۇيىم جۇمىس ىستەيدى, ولاردىڭ قاتارىندا حالىقارالىق ۇيىمدار, شەتەلدىك مەملەكەتتىك قۇرىلىمدار جانە شەتەلدىك قورلار بار. قارجىلىق قولداۋ نەگىزىنەن باق-تى دامىتۋ, قۇقىقتار مەن بوستاندىقتاردى قورعاۋ, ليبەرالدى رەفورمالاردى ىلگەرىلەتۋ جانە ازاماتتىق قوعامدى نىعايتۋ باعىتتارىنا باعىتتالعان.
«قازىرگى تاڭدا قازاقستاندا شەتەلدىك قارجىلاندىرۋ الاتىن كوپتەگەن ۇيىمدار جۇمىس ىستەيدى. ولاردىڭ كەيبىرى وزدەرىن بەيتاراپ دەپ كورسەتكەنىمەن, شىن مانىندە ەلىمىزدە بوتەن ساياسي كۇن ءتارتىبىن ىلگەرىلەتىپ جاتىر. ءبىز مۇنى اشىق ايتۋىمىز كەرەك», دەدى دەپۋتات.
يرينا سميرنوۆا كەيبىر ۇيىمداردىڭ قىزمەتى «سۇر ايماقتا» قالىپ وتىرعانىن جانە ولاردىڭ شىنايى ماقساتتارىن ءتىپتى مامانداردىڭ دا اجىراتۋى قيىن ەكەنىن اتاپ ءوتتى.
«دۇنيە جۇزىندە وسىعان ۇقساس ماسەلەلەرگە تاپ بولعان ەلدەر شەتەلدىك اگەنتتەر تۋرالى زاڭداردى قابىلداۋ ارقىلى ولارعا قارسىلىق كورسەتكەن كوپتەگەن مىسالدار بار. مىسالى, مۇنداي زاڭدار يزرايلدە 2016 جىلدان, قىتايدا 2017 جىلدان, اۆستراليادا 2018 جىلدان, ۇلىبريتانيادا 2023 جىلدان, فرانتسيادا 2024 جىلدان بەرى كۇشىندە. شەتەلدىك ۇيىمداردىڭ مۇددەلەرى ءۇشىن ارەكەت ەتەتىن تۇلعالارعا قاتىستى زاڭداردىڭ ءبىرى 1938 جىلى قابىلدانعان اقش-تىڭ شەتەلدىك اگەنتتەردى تىركەۋ تۋرالى زاڭى بولىپ سانالادى. كوپتەگەن ەلدەر شەتەلدىك ىقپالمەن كۇرەسۋ ءۇشىن ناقتى زاڭنامالىق تەتىكتەردى ەنگىزدى. ءبىز دە وسى تاجىريبەنى زەرتتەپ, ۇلتتىق قاۋىپسىزدىگىمىزدى قورعاۋ ءۇشىن ءتيىستى شارالار قابىلداۋىمىز قاجەت», دەدى يرينا سميرنوۆا.
دەپۋتات بۇل رەتتە قازاقستان ۇلتتىق مۇددەلەرىن قورعاۋى ءتيىس ەكەنىن, بىراق بۇل ازاماتتىق قوعامنىڭ دامۋىن شەكتەمەۋى قاجەت ەكەنىن باسا ايتتى.
ء«بىزدىڭ ماقساتىمىز – قازاقستاننىڭ ەگەمەندىگىن نىعايتۋ. شەتەلدىك كۇشتەردىڭ قوعامىمىزعا بوتەن قۇندىلىقتاردى تاڭۋىن تولەرانتتىلىق دەپ كورسەتۋگە بولمايدى. ءبىز ءوز مۇددەمىزدى قورعاۋعا ءتيىسپىز», دەدى دەپۋتات.
