بيىل ۇلتتىق كينونى قولداۋ ورتالىعى جانىنداعى ساراپتاما كەڭەسىنىڭ قۇرامى جاڭارتىلدى. وعان كينو, ادەبيەت, مادەنيەت سالاسىنداعى ماماندار, سونداي-اق ءماجىلىس دەپۋتاتتارى كىردى.
كەزدەسۋدىڭ نەگىزگى تاقىرىبى كينوجوبالاردى كونكۋرستىق ىرىكتەۋ ەرەجەلەرىن تالقىلاۋ بولدى.
مينيستر ۇلتتىق كينونى قولداۋ ورتالىعىنىڭ قىزمەتى تۋرالى ەگجەي-تەگجەيلى ايتىپ بەردى. ول ساراپتاما كەڭەسى مۇشەلەرىنە ۇلكەن جاۋاپكەرشىلىك جۇكتەلەتىنىن اتاپ ءوتتى. وتكەن جىلى قابىلدانعان ىرىكتەۋ كونكۋرسىنىڭ ەرەجەلەرىندەگى وزگەرىستەر ىرىكتەۋدىڭ اشىق ءارى جەڭىل وتۋىنە باعىتتالعانىن دا اتاپ وتكەن ءجون.
جاڭا ەرەجەلەرگە سايكەس, ىرىكتەۋ ەكى كەزەڭگە بولىنگەن. بۇل وزگەرىس قازاقستانداعى كينو ونەرىنىڭ دامۋىنا جاڭا سەرپىن بەرەدى.
ءبىرىنشى كەزەڭدە ساراپتاما كەڭەسى تەك ستسەناريلەر مەن ستسەناري جوسپارلارىن سارالايدى. ءبىرىنشى كەزەڭنەن ءساتتى وتكەننەن كەيىن تاڭدالعان ستسەناريلەردىڭ اۆتورلارى ەكىنشى كەزەڭدە قۇجاتتاردىڭ تولىق پاكەتىن ۇسىنۋى كەرەك. ۇمىتكەرلەر قاجەتتى قۇجاتتاردى تاپسىرعاننان كەيىن انىقتالعان قاتەلەردى تۇزەتۋگە ءۇش كۇن ۋاقىت بەرىلەدى. قۇجاتتاردى قابىلداۋ اياقتالعان سوڭ, ورتالىق ساراپتاما كەڭەسىنىڭ قاراۋىنا ءوتىنىم جىبەرەدى. سودان كەيىن پيتچينگ كۇنى بەلگىلەنەدى.
«كەڭەس مۇشەلەرى جاۋاپكەرشىلىكتى تەرەڭ سەزىنىپ, كونكۋرستىڭ بارلىق كەزەڭدەرىندە ءادىل شەشىم شىعارىپ, اشىق كونكۋرس وتكىزۋگە ءتيىس. كينوجوبالاردىڭ بەلگىلەنگەن تالاپتارعا سايكەس بولۋىنا باسا نازار اۋدارىلادى. بۇل شارالار وتاندىق كينو سالاسىن دامىتۋعا, سونداي-اق ۇلتتىق مۇددە مەن يدەولوگياعا ساي كەلەتىن جوبالار سانىن ارتتىرۋعا كومەكتەسەدى», - دەپ اتاپ ءوتتى ايدا بالاەۆا.
2025 جىلى «ۇلتتىق قۇندىلىقتار», «وتباسى», «قورشاعان ورتانى قورعاۋ», «زاڭ مەن ءتارتىپ», «تاريحي ەلەۋلى وقيعالار», «دوس قادىرى», «ايەل قۇقىعى, بالا قاۋىپسىزدىگى»,«قازىرگى زاماننىڭ قاھارماندارى», «ەل بىرلىگى» جانە ت.ب. باسىم تاقىرىپتاردا كينوجوبالار دايىنداۋعا بولادى.
2025 جىلى مينيسترلىكتىڭ جانە ۇلتتىق كينونى قولداۋ ورتالىعىنىڭ قولداۋىمەن 10 جاڭا فيلم جارىق كورەدى. بيىل «كاپيتان بايتاسوۆ», لۋدومانيا تاقىرىبىن قوزعايتىن «يگرومانكا» اتتى دراما, فۋتبول تۋرالى «90+1» سپورتتىق دراماسى, سونداي-اق «كۇزگى سامال», «فەيكوۆىي ارمان», «Qaitadan», «تەزەك», «قارا قىز», «التىن ادام», «حوش ءيىستى جۇرەك» جانە «اۆەل» فيلمدەرى جارىققا شىعادى.
