فوتو: وقۋ-اعارتۋ مينيسترلىگى
فەستيۆالدە وقۋ-اعارتۋ ءمينيسترى تەحنيكالىق جانە كاسىپتىك ءبىلىم بەرۋ جۇيەسىن ترانسفورماتسيالاۋدىڭ ماڭىزدىلىعىن اتاپ ءوتتى.
«جۇمىسشى ماماندىقتار جىلىندا ىسكە اسىرىلاتىن نەگىزگى ءىس-شارالاردىڭ ءبىرى ەلىمىزدىڭ 10 كوللەدجىن ينتەرناتسيونالداندىرۋ بولماق. نەگىزگى ماقسات — ولاردىڭ جاھاندىق دەڭگەيدە باسەكەگە قابىلەتتىلىگىن ارتتىرۋ جانە ءبىلىم بەرۋ باعدارلامالارىن حالىقارالىق ستاندارتتارعا سايكەستەندىرۋ. اتوم ەنەرگەتيكاسى بويىنشا مامانداردى دايارلاۋدا ۆەنگريانىڭ تاجىريبەسىن ەنگىزۋ, سونداي-اق قىتايدىڭ IT, درون قۇراستىرۋ جانە ماشينا جاساۋ سالاسىنداعى تاجىريبەسىن قولدانۋ جوسپارلانۋدا», دەدى عاني بەيسەمباەۆ.
سونىمەن قاتار, استانادا تەحنيكالىق جانە كاسىپتىك ءبىلىم بەرۋ ۇيىمدارىنىڭ ستۋدەنتتەرىن قولداۋ جانە دامىتۋ ماقساتىندا ۇلتتىق قۇزىرەتتىلىك ورتالىعى قۇرىلادى. سونداي-اق وسى كۇزدە اقتاۋدا TurkicSkills — تۇركىتىلدەس ەلدەر اراسىندا I-ءشى كاسىبي شەبەرلىك چەمپيوناتى وتەدى.
ەستەرىڭىزگە سالا كەتەيىك, مەملەكەت باسشىسى جاريالاعان جۇمىسشى ماماندىقتارىنىڭ جىلى اياسىندا استانادا تەحنيكالىق جانە كاسىپتىك ءبىلىم بەرۋ سالاسىنداعى ەڭ اۋقىمدى ءىس-شارا — «جۇمىسشى ماماندىقتار قالاسى» فەستيۆالى اشىلدى. بىرنەشە كۇن بويى قالا اۋماعىندا ءتۇرلى سەمينارلار مەن ماستەر-كلاسستار, مۇناي جانە ەنەرگەتيكا ونەركاسىبى تاقىرىپتارى بويىنشا حاكاتون, ماماندىقتار شەرۋى, بوس ورىندار جارمەڭكەسى, ستارتاپتاردىڭ تۇساۋكەسەرلەرى, كونتسەرتتەر مەن ترەنينگتەر وتەدى.
