فوتو: سەنات
سەنات سپيكەرى بۇگىندە ەكى ەل اراسىنداعى قارىم-قاتىناس جان-جاقتى ماڭگى ستراتەگيالىق سەرىكتەستىكتىڭ بۇرىن-سوڭدى بولماعان دەڭگەيىنە جەتكەنىن اتاپ ءوتتى. سونداي-اق ماۋلەن اشىمباەۆ ەلشى حان ءچۋنليننىڭ ديپلوماتيالىق ميسسياسى ەكىجاقتى ىنتىماقتاستىقتىڭ جاڭا «التىن داۋىرىمەن» تۇسپا-تۇس كەلگەنىنە نازار اۋدارىپ, مۇنىڭ سيمۆولدىق ءمانى زور ەكەنىن تىلگە تيەك ەتتى جانە الداعى ۋاقىتتا كوپجاقتى بايلانىس ودان ءارى نىعايا تۇسەتىنىنە سەنىم ءبىلدىردى. سۇحبات بارىسىندا قازاق-قىتاي ىنتىماقتاستىعىن ارتتىرۋدا ەكى ەل باسشىلارىنىڭ دوستىق قارىم-قاتىناسى شەشۋشى ءرول اتقارىپ وتىرعانى جانە سونىڭ ارقاسىندا بۇگىندە ماڭىزدى كەلىسىمدەرگە قول جەتكىزىلگەنى ءسوز بولدى.
«ەلدەرىمىزدىڭ باسشىلارى اراسىنداعى تىعىز جانە سەنىمدى ديالوگ ستراتەگيالىق سەرىكتەستىكتى نىعايتۋ جولىندا ايرىقشا ءرول اتقارادى. جوعارى دەڭگەيدەگى تۇراقتى كەزدەسۋلەر مەن ءوزارا ساپارلاردىڭ ناتيجەسىندە ماڭىزدى كەلىسىمدەر جاسالدى جانە بىرقاتار پەرسپەكتيۆالى ەكىجاقتى قۇجاتتارعا قول قويىلدى. وسىنداي قارقىننىڭ ارقاسىندا قازاقستان مەن قىتاي اراسىنداعى قارىم-قاتىناس دامۋدىڭ جاڭا «التىن داۋىرىنە» قادام باسىپ وتىر. ءبىزدىڭ باستى مىندەتىمىز – مەملەكەت باسشىلارى دەڭگەيىندە قول جەتكىزىلگەن ۋاعدالاستىقتاردى ءتيىمدى ىسكە اسىرۋعا ىقپال ەتۋ», دەدى ماۋلەن اشىمباەۆ.
سەناتتىڭ ءباسپاسوز قىزمەتىنىڭ مالىمدەۋىنشە كەزدەسۋدە تاراپتار جاھاندىق جانە وڭىرلىك كۇن تارتىبىندەگى وزەكتى ماسەلەلەر بويىنشا قازاقستان مەن قىتايدىڭ ۇستانىمدارى ۇقساس ەكەنىنە توقتالدى. سونداي-اق پارلامەنتارالىق, بۇۇ, شىۇ, اوسشك سياقتى حالىقارالىق جانە وڭىرلىك ۇيىمدار اياسىنداعى ءوزارا ءىس-قيمىل شەڭبەرىندە جاھاندىق دامۋ جانە جالپىعا بىردەي قاۋىپسىزدىك پەن بەيبىتشىلىكتى قامتاماسىز ەتۋ جونىندەگى بىرلەسكەن باستامالارعا ءمان بەرىلدى.
سونىمەن قاتار سەنات توراعاسى ەلشى حان چۋنلينگە قازاقستان پرەزيدەنتى قاسىم-جومارت توقاەۆتىڭ باستاماسىمەن ەلىمىزدە جۇرگىزىلىپ جاتقان رەفورمالار جونىندە ايتىپ بەردى. ول ءوز سوزىندە مەملەكەت باسشىسىنىڭ وڭىرلەردى دامىتۋعا جانە ۇلتتىق ەكونوميكانى ارتاراپتاندىرۋعا ارنالعان باستامالارىنا ەگجەي-تەگجەيلى توقتالىپ, قولعا الىنعان رەفورمالاردىڭ ستراتەگيالىق ماڭىزىنا نازار اۋداردى.
ءوز كەزەگىندە ەلشى بەلسەندى ءوزارا ءىس-قيمىل ءۇشىن العىس ءبىلدىرىپ, قازاقستاندا جۇرگىزىلىپ جاتقان قوعامدىق-ساياسي جاڭعىرتۋلاردى جوعارى باعالادى. سونداي-اق قازاقستان مەن قىتاي اراسىنداعى ىنتىماقتاستىقتى ودان ءارى نىعايتۋعا مۇددەلى ەكەنىن جەتكىزدى.
