فوتو: ەڭبەك جانە حالىقتى الەۋمەتتىك قورعاۋ مينيسترلىگى
قونىستاندىرۋ وڭىرلەرى بولىنىسىندە پاۆلودار وبلىسىنا – 3 422 ادام, سولتۇستىك قازاقستان وبلىسىنا – 2 547 ادام, قوستاناي وبلىسىنا – 1 020 ادام, شىعىس قازاقستان وبلىسىنا – 781 ادام, اقمولا وبلىسىنا – 537 ادام, اباي وبلىسىنا – 530 ادام, ۇلىتاۋ وبلىسىنا – 70 ادام, قاراعاندى وبلىسىنا – 43 ادام قونىس اۋدارعان.
قونىستانۋ ايماقتارىنا كوشكەن قانداستارىمىز نەگىزىنەن موڭعوليادان – 1 072 ادام, وزبەكستاننان – 908 ادام, قحر – 762 ادام, رەسەيدەن – 164 ادام, باسقا ەلدەردەن – 94 ادام كەلگەن.
كەلۋشىلەر قاتارىنان ەڭبەككە قابىلەتتى جاستاعى 4 279 ادامنىڭ (قونىس اۋدارۋشىلار مەن قانداستار) 2 721-ءسى تۇراقتى جۇمىس ورىندارىنا ورنالاستىرىلعان, 207 ادام كاسىپكەرلىك قىزمەتپەن اينالىسۋدا, بيزنەس اشۋ ءۇشىن 25 ادام گرانت العان.
قونىس اۋدارۋشىلار مەن قانداستار دەنساۋلىق ساقتاۋ, اۋىل شارۋاشىلىعى, ءبىلىم بەرۋ, ونەركاسىپ جانە ت.ب. سالالارعا جۇمىسقا ورنالاسقان.
ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتىنىڭ ءمالىم ەتۋىنشە قونىس اۋدارۋشىلاردىڭ ءبىرى – سۇلەيمەنوۆتەر وتباسى, ولار قونىس اۋدارعاننان كەيىنگى ومىرلەرىندەگى وڭ وزگەرىستەرىمەن بولىسكەن. 2023 جىلى وبلىستىق قونىس اۋدارۋ كۆوتاسىنا ەنگىزىلگەننەن كەيىن ولار ماڭعىستاۋ وبلىسىنان سولتۇستىك قازاقستان وبلىسىنىڭ تايىنشا قالاسىنا قونىس اۋدارعان.
«وتباسىنىڭ ءاربىر مۇشەسىنە قونىس اۋدارۋعا 1 690 500 تەڭگە كولەمىندە ماتەريالدىق كومەك تۇرىندە مەملەكەتتىك قولداۋ كورسەتىلدى, سونىمەن قاتار ەكونوميكالىق ۇتقىرلىق سەرتيفيكاتى بويىنشا تۇرعىن ءۇي ساتىپ الدىق. ءبىز كوشۋگە شەشىم قابىلداعانىمىزعا جانە قونىس اۋدارۋشىلارعا جۇمىس ىزدەۋگە كومەكتەسەتىن, العاشقى ماتەريالدىق كومەك كورسەتەتىن مەملەكەت تاراپىنان وسىنداي باعدارلاما بار ەكەنىنە وتە قۋانىشتىمىز», دەدى وتاعاسى جانبولات سۇلەيمەنوۆ.
ول اقتاۋ قالاسىنىڭ №1 كاسىپتىك ليتسەيىن «ەسەپتەۋ تەحنيكاسىنا قىزمەت كورسەتۋ جونىندەگى تەحنيك وپەراتور» ماماندىعى بويىنشا بىتىرگەن, جۇبايى «پەداگوگيكا جانە پسيحولوگيا» ماماندىعى بويىنشا جوعارى ءبىلىمى بار. تايىنشا اۋدانىنىڭ مانساپ ورتالىعى جۇمىسقا ورنالاسۋعا كومەك كورسەتتى. جانبولات «كوكشە تەحستروي» جشس-دە جۇمىس ىستەيدى. جۇبايى «قارلىعاش» بالاباقشاسىنا تاربيەشى بولىپ جۇمىسقا ورنالاستى.
ەستەرىڭىزگە سالايىق, ەرىكتى قونىس اۋدارۋ اياسىندا قونىس اۋدارۋشىلارعا مەملەكەتتىك قولداۋدىڭ مىناداي شارالارى ۇسىنىلادى:
- وتاعاسىنا جانە وتباسىنىڭ ءاربىر مۇشەسىنە 70 اەك مولشەرىندە كوشۋگە ارنالعان ءبىر رەتتىك سۋبسيديا;
- وتباسى مۇشەلەرى سانى مەن ەلدى مەكەنگە بايلانىستى 15-تەن 30 اەك-كە دەيىنگى مولشەردە 12 اي ىشىندە تۇرعىن ءۇي جالداۋعا جانە كوممۋنالدىق قىزمەتتەرگە اقى تولەۋگە اي سايىنعى سۋبسيديالاۋ;
- قىسقا مەرزىمدى كاسىپتىك وقىتۋعا جولداما;
- جۇمىسقا ورنالاسۋعا نەمەسە كاسىپكەرلىك باستامانى دامىتۋعا جاردەمدەسۋ;
- ەكونوميكالىق ۇتقىرلىق سەرتيفيكاتتارىن بەرۋ.
بۇدان باسقا, وڭىرارالىق قونىس اۋدارۋعا جاردەم كورسەتەتىن جۇمىس بەرۋشىلەرگە تۇرعىن ۇيمەن قامتاماسىز ەتىلگەن جانە كەمىندە 2 جىل مەرزىمگە تۇراقتى جۇمىسقا قابىلدانعان ءاربىر قىزمەتكەر ءۇشىن 400 اەك مولشەرىندە جۇمىسقا ورنالاسۋعا بىرجولعى سۋبسيديا بەرىلەدى.
