ءىستىڭ ءمان-جايىن اقمولا وبلىستىق سوتىنىڭ ءباسپاسوز قىزمەتى حابارلادى. وسىلايشا, اۋداندىق تۇرعىن ءۇي-كوممۋنالدىق شارۋاشىلىق ءبولىمىنىڭ باسشىسى مەملەكەتكە زيان كەلتىرە وتىرىپ, لاۋازىمدىق وكىلەتتىكتەرىن اسىرا پايدالانعانى ءۇشىن قر قك 361-بابىنىڭ 4-بولىگىنىڭ 3-تارماعى بويىنشا, جشس ديرەكتورى ءىرى مولشەردە م ۇلىكتى ۇرلاعانى ءۇشىن قر قك 189-بابىنىڭ 3-بولىگىنىڭ 1-تارماعى بويىنشا سوتقا تارتىلدى.
«سوت 2022 جىلى تۇرعىن ءۇي-كوممۋنالدىق شارۋاشىلىق ءبولىمى مەن جشس اراسىندا قازاندىقتاردى جوندەۋگە كەلىسىم-شارت جاسالعانىن انىقتادى. وسى كەلىسىم اياسىندا 2022 جىل ىشىندە اقكول قالاسىنداعى قازاندىقتارعا ءۇش جىلىتۋ قازاندىعىن ورناتۋ جۇمىستارىن ناقتى ورناتپاي اياقتاۋ اكتىسىن راسىمدەگەن توو ديرەكتورى ك. تۇرعىن ءۇي-كوممۋنالدىق شارۋاشىلىق ءبولىمىنىڭ باسشىسى ۆ., قازاندىقتاردىڭ ورناتىلماعانىن بىلە تۇرا, اكتىلەرگە جانە تولەمگە شوت-فاكتۋرالارعا قول قويعان. سالدارىنان ك. 8 ميلليون تەڭگەدەن استام اقشانى جىمقىرعان», دەپ ءبولىستى دەپارتامەنتتەگىلەر.
اقكول اۋداندىق سوتى بۇل ءىس بويىنشا ءاربىر سوتتالۋشىنى پروباتسيالىق باقىلاۋمەن ءۇش جىل التى ايعا باس بوستاندىعىن شەكتەۋ جازاسىنا ۇكىم شىعاردى. تۇرعىن ءۇي-كوممۋنالدىق شارۋاشىلىق سالاسىنىڭ بۇرىنعى باسشىسىنا ءومىر بويىنا مەملەكەتتىك قىزمەتتە لاۋازىمداردى اتقارۋعا تىيىم سالىندى, ال كاسىپكەر باسشىلىق جانە قارجىلىق جاۋاپتى قىزمەتتەردى اتقارۋ قۇقىعىنان ايىرىلدى.
ۇكىم زاڭدى كۇشىنە ەنگەن جوق.
