قوستانايدا ءوزىن باسىنان اتقان پوليتسەي قايتىس بولدى

استانا. 6 اقپان. كەشە ءوزىن-ءوزى ولتىرمەك بولعان قوستاناي قالالىق ىشكى ىستەر باسقارماسىنىڭ قىزمەتكەرى جانساقتاۋ بولىمىندە قايتىس بولدى. بۇل تۋرالى «كوستانايسكيە نوۆوستي» حابارلادى. بۇگىن ساعات 10.10-دا دارىگەرلەر ىشكى ىستەر قىزمەتكەرىنىڭ قايتىس بولعانىن انىقتادى. باسىنا تيگەن وق مي قاباتىن زاقىمداعاندىقتان, ونى قۇتقارۋ مۇمكىن بولماعان. بۇعان دەيىن قوستاناي قالالىق ىشكى ىستەر باسقارماسى قىزمەتكەرىنىڭ ءوزىن-ءوزى ولتىرۋگە ارەكەت جاساۋىنا دوستاسىپ جۇرگەن قىزىمەن رەنجىسىپ قالعانى سەبەپ بولۋى مۇمكىن ەكەنى ايتىلعان ەدى. «قازىرگى تاڭدا تەرگەۋشىلەر پوليتسيا قىزمەتكەرىنىڭ قۇربىسىمەن تەلەفون ارقىلى سويلەسكەننەن كەيىن قوستاناي ىشكى ىستەر باسقارماسى عيماراتىنان شىعىپ كەتكەنىن انىقتادى. ول قوڭىراۋعا جاۋاپ بەرمەگەن, سوعان بايلانىستى جول-پاترۋل پوليتسياسى ونى ىزدەۋگە شىعادى. ساعات 10.40-تا پوليتسەي وتىرعان اۆتوكولىك مايلين كوشەسىندە كوزگە شالىنىپ, پاترۋل جاساعى ونى ارنايى قۇرال مەن قارۋدى قولدانباي-اق توقتاتتى», - دەپ حابارلاعان بولاتىن وبلىستىق ىشكى ىستەر دەپارتامەنتى وزىندىك قاۋىپسىزدىك باسقارماسىنىڭ باسشىسى جاراسحان اقبەرديەۆ. پوليتسيا ءتارتىپ ساقشىسىنىڭ قۇربىسىنان جاۋاپ الدى, ول جىگىتىمەن ارادا قىزعانىشقا بايلانىستى جانجال شىققانىن راستادى. وقيعاعا قاتىستى «ءوزىن-ءوزى ولتىرۋگە يتەرمەلەۋ» بابىمەن قىلمىستىق ءىس قوزعالدى. ەسكە سالا كەتەيىك, 5 اقپان كۇنى قوستاناي قالالىق ىشكى ىستەر باسقارماسىنىڭ قىزمەتكەرى ءوز ماشيناسىندا تابەل قارۋىمەن ءوزىن-ءوزى باسىنان اتقان ەدى. وقيعا ورنىنا جەدەل جاردەم كەلىپ, ونى اۋرۋحاناعا جەتكىزدى. پوليتسەي جانساقتاۋ بولىمىنە جاتقىزىلعان بولاتىن. قۇرىش نۇرىمبەت. دەرەك, فوتو: «كوستانايسكيە نوۆوستي».