ساپار بارىسىندا ءباسپاسوز وكىلدەرى اسكەري بولىمدەردىڭ بىرنەشە نەگىزگى نىساندارىن, ياعني جاۋىنگەرلەر ۇرىس قيمىلدارىنا جاتتىعاتىن وقۋ پوليگوندارىن, سونداي-اق تەحنيكالىق قامتاماسىز ەتۋ ورتالىقتارىن ارالاپ شىقتى. جۋرناليستەر مەرزىمدى قىزمەتتەگى اسكەري قىزمەتشىلەردىڭ كۇندەلىكتى ومىرىمەن دە تانىستى. ولاردىڭ جاۋىنگەرلىك دايارلىعىنىڭ قىر-سىرىنا قانىقتى. سونىمەن بىرگە, سونداعى بىلىكتى اسكەري قىزمەتشىلەر تاراپىنان رەسپۋبليكالىق اۋقىمداعى ءتۇرلى وقۋ-جاتتىعۋلارعا قاتىستى جانە باسقا دا ماسەلەلەرگە بايلانىستى تۇشىمدى جاۋاپ الدى.
سونىمەن قاتار, جۋرناليستەر اسكەري قىزمەتشىلەردىڭ قىزمەت ەتۋ جانە تۇرمىس جاعدايلارىن كورسەتەتىن تۇرعىن جانە وقۋ كورپۋستارىنا دا باردى. قولباسشىلىق وكىلدەرى قارۋلى كۇشتەردى جاڭعىرتۋ, جەكە قۇرامدى دايارلاۋ باعدارلامالارى جانە قۇرلىق اسكەرلەرىن دامىتۋ پەرسپەكتيۆالارى تۋرالى قويىلعان سۇراقتارعا جاۋاپ بەردى.
ساپار بارىسىندا اسكەري تەحنيكا سالاسىنداعى ەڭ جاڭا ازىرلەمەلەر, سونداي-اق تاكتيكالىق جانە دەنە شىنىقتىرۋدى قامتيتىن وقۋ پروتسەسىنىڭ ەرەكشەلىكتەرى كورسەتىلدى.
«جۋرناليستەرمەن وتەتىن مۇنداي كەزدەسۋ ءبىزدىڭ اسكەري قىزمەتشىلەرىمىزدىڭ جاۋىنگەرلىك دايىندىعىن جانە ونىڭ دەڭگەيىن شىنايى كورسەتە وتىرىپ, ولاردىڭ قىزمەتى تۋرالى وبەكتيۆتى پىكىر قالىپتاستىرۋعا كومەكتەسەتىنىنە سەنىمدىمىز. ساپار قارۋلى كۇشتەر جۇمىسىنىڭ اشىقتىعىن نىعايتۋ مەن جۇرتشىلىقپەن سەنىمدى قارىم-قاتىناس ورناتۋداعى ماڭىزدى قادام بولدى», دەپ اتاپ ءوتتى گەنەرال-مايور مەرەكە كوشەكباەۆ.
ءباسپاسوز تۋرىنا قاتىسۋشىلار مۇنداي ساپارلاردىڭ قارۋلى كۇشتەردىڭ وڭ ءيميدجىن قالىپتاستىرۋ جانە اسكەري جانە ازاماتتىق قوعام اراسىنداعى اشىق ديالوگتى دامىتۋ ءۇشىن ماڭىزدى ەكەنىن ايتتى.
«ۇيىمداستىرىلعان بۇل شارا بىزگە ارميانىڭ جۇمىسىن تىكەلەي كوزبەن كورۋىمىزگە مۇمكىندىك بەردى. سونىڭ ناتيجەسىندە ءبىز اسكەري ءومىر مەن وندا كەزدەسەتىن ءارتۇرلى قيىندىقتار تۋرالى, سونداي-اق ەل قاۋىپسىزدىگىن قامتاماسىز ەتۋ ماقساتىندا جۇزەگە اساتىن جەكە قۇرامدى دايىنداۋ ءىسى جايىندا جان-جاقتى ماعلۇمات الدىق», دەپ اتاپ ءوتتى بەلگىلى قازاقستاندىق بلوگەر تيمۋر.
ءباسپاسوز تۋرىنىڭ سوڭىندا وعان قاتىسقان بۇقارالىق اقپارات قۇرالدارىنىڭ وكىلدەرى اشىق جانە مازمۇندى كەزدەسۋ ءۇشىن جانە اسكەري قىزمەتشىلەردىڭ ۇيىمشىلدىعى مەن جوعارى كاسىبيلىگىنە ءوز ريشالىقتارىن ءبىلدىردى.
