روزا باعلانوۆا اتىنداعى «قازاقكونتسەرت» مەملەكەتتىك اكادەميالىق ۇيىمىندا مۇزبالاق اقىن مۇقاعالي ماقاتاەۆتىڭ شىعارماشىلىعىنا ارنالعان «قازاعىم-اي» اتتى مۋزىكالىق-پوەزيالىق كەش ءوتتى.
ايتۋلى باعدارلامادا كورەرمەندەر «قازاقكونتسەرت» ارتىستەرى مەن شىعارماشىلىق ۇجىمدارىنىڭ ونەرىن تاماشالاپ, اقىننىڭ ىرگەلى شىعارمالارىمەن سۋسىندادى. كەش شىمىلدىعى اقىننىڭ تاسپاعا جازىلىپ الىنعان ءوز داۋسىمەن اشىلىپ, «پاي-پاي, ءومىر» ولەڭى وقىلدى. سونىمەن قاتار مۇقاعالي ماقاتاەۆتىڭ ولەڭدەرىنە جازىلعان ەلىمىزگە تانىمال ەركەعالي راحماديەۆ, نۇرعيسا تىلەنديەۆ, تولەگەن مۇحامەدجانوۆ, دانەش راقىشەۆ, بولات ەسمۇحانوۆ, ەلەنا ابدىحالىقوۆا, ابيىربەك تىناليەۆ سىندى دارابوز كومپوزيتورلاردىڭ اندەرى شىرقالدى. اتاپ ايتقاندا, «ايتاتىن ساعان سىرىم بۇل», «وتان», «ەسىڭە مەنى العايسىڭ», ء«سابي بولعىم كەلەدى», «كەل ەركەم الاتاۋىڭا», «كۇرەڭ كۇز», «ساعان قاراي بارادى ۇشىپ», «جارىعىم-اي», ت.ب. بەلگىلى اندەر ورىندالىپ, دارا بولمىس يەسىنىڭ ليريكالىق شىعارمالارى كەزەكپە-كەزەك وقىلدى.
– «قازاقكونتسەرت» ۇجىمى جىل سايىن اقىننىڭ شىعارماشىلىعىن اتاپ وتەدى. بۇل – ءبىزدىڭ اقىن الدىنداعى بورىشىمىز. مۇقاعاليدىڭ ولەڭىنە ورىلگەن اندەر وتە كوپ. بۇگىنگى كەشتە سيرەك ورىندالاتىن اندەرگە باسا نازار اۋداردىق. تاعى ءبىر ەرەكشەلىگى – اقىننىڭ پوەزياسىن وقىپ, ودان كەيىن سول ولەڭنىڭ ءانىن ۇسىنىپ وتىردىق. وسى ارقىلى ونەرسۇيەر قاۋىمدى اننەن بولەك, ولەڭنىڭ مازمۇنىنا ءمان بەرۋىن قالادىق. ياعني اقىننىڭ ولەڭگە دەگەن كوزقاراسىن كورسەتتىك, – دەدى ونەر ۇجىمىنىڭ كوركەمدىك جەتەكشىسى, ءداستۇرلى ءانشى ەرلان رىسقالي.
ءىس-شارادا قازاقستاننىڭ ەڭبەك سىڭىرگەن قايراتكەرلەرى جەڭىس ىسقاقوۆا, مەدەت سالىقوۆ, كلارا تولەنباەۆا, ازامات جىلتىركوزوۆ, نۇربولات ارزاماس ۇلى, گۇلسىم مىرزابەكوۆا, مادەنيەت قايراتكەرلەرى تولعانباي سەمباەۆ, ەربولات شالدىبەكوۆ, «قۇرمەت» وردەنىنىڭ يەگەرى ايزادا قاپونوۆا, «دارىن» مەملەكەتتىك جاستار سىيلىعىنىڭ لاۋرەاتتارى الىبەك الماديەۆ, اسقار مۇقيات, ازات مالىك , اياۋلىم قاماجان, «ەرەن ەڭبەگى ءۇشىن» مەدالىنىڭ يەگەرى التىنشاش مۇقاتاەۆا, حالىقارالىق جانە رەسپۋبليكالىق بايقاۋلاردىڭ لاۋرەاتتارى ءبىرجان ايتاحمەت, سۇلتان احمەت, ەربول تاجىباەۆ, ايدوس سانيازبەك, امين يبراھيم, اننا ۋۆاروۆا جانە «Birlik» بي ءانسامبلى ونەر كورسەتتى.
كەش سوڭى اقىننىڭ «قازاعىم-اي» ولەڭىنە جازىلعان تانىمال كومپوزيتور تۇرسىنعازى راقىموۆتىڭ انىمەن قورىتىندىلاندى.
