كوللاجدى جاساعان – زاۋرەش سماعۇل ,«EQ»
«مۇنداي ءوسىم كەيىنگى 5 جىلدا ءبىرىنشى رەت بولدى. بىلتىر شامامەن 1,3 ترلن تەڭگەنى قۇرايتىن 180 جوبا ىسكە قوسىلىپ, 14,4 مىڭعا جۋىق تۇراقتى جۇمىس ورنى اشىلدى. جىل قورىتىندىسىندا قۇرىلىستا وڭ ناتيجەگە قول جەتتى. كەيىنگى 10 جىلدا تۇرعىن ءۇي قۇرىلىسىنىڭ رەكوردتىق كولەمى بايقالدى. جوسپار بويىنشا 18 ملن شارشى مەتر بولعانىمەن, 18,9 ملن شارشى مەتر جاڭا تۇرعىن ءۇي سالىندى», دەدى مينيستر.
ۆيتسە-مينيستر ولجاس ساپاربەكوۆتىڭ ايتۋىنشا, ءتۇستى مەتالل وڭدەۋ سەكتورى جىل سايىن ءوسۋدىڭ وڭ ديناميكاسىن كورسەتىپ جاتىر. وتكەن جىلى وتاندىق وندىرۋشىلەر مىس وڭدەۋدى 16,5%-عا, ءاليۋمينيدى 9,6%-عا, مىرىشتى 33%-عا, قورعاسىندى 4,6%-عا كوبەيتتى. ۆيتسە-مينيستر بىلتىر ماشينا جاساۋ ءوندىرىسىنىڭ كولەمى 9,7%-عا ارتقانىن العا تارتتى. بيىل 5%-دىق ءوسىم كۇتىلەدى.
ۆيتسە-مينيستر قۋاندىق قاجكەنوۆتىڭ سوزىنشە, مينيسترلىك قۇرىلىس سالۋشىلارعا قويىلاتىن تالاپتى ازايتىپ, جاعدايدى جاقسارتۋعا, ۇلەستىك قاتىسۋدىڭ تارتىمدىلىعىن ارتتىرۋعا جانە قۇرىلىس نارىعىندا تەڭ جاعدايدى قامتاماسىز ەتۋگە باعىتتالعان شارالار ازىرلەنگەن. بۇل ءتاسىل ماجىلىستە قارالىپ جاتقان تۇرعىن ءۇي قۇرىلىسىنا ۇلەستىك قاتىسۋدى جاقسارتۋ تۋرالى زاڭ جوباسىندا قاراستىرىلعان.
مينيستر ورىنباسارى يران شارحان وتكەن جىلى 23 قاتتى پايدالى قازبا كەن ورنى العاش رەت مەملەكەتكە تىركەلگەنىن ايتتى.
«جەر قويناۋىن مەملەكەتتىك گەولوگيالىق زەرتتەۋدىڭ وڭىرلىك جۇمىسىنىڭ ناتيجەسىندە قاتتى پايدالى قازبالار بويىنشا پەرسپەكتيۆالى 38 تەلىم انىقتالدى. ولاردىڭ اراسىندا سيرەك كەزدەسەتىن مەتالدار, بەريللي, قوڭىر كومىر, التىن, تسيركوني, نيوبي, ۆولفرام بار», دەدى ي.شارحان.
ۆيتسە-مينيستر جاننات ءدۇبىروۆا مينيسترلىكتىڭ سالالارىن تسيفرلاندىرۋ جوبالارى تۋرالى اڭگىمەلەدى. ونىڭ قاتارىندا 2025 جىلعى 1 قاڭتاردا ىسكە قوسىلعان جەر قويناۋىن پايدالانۋدىڭ بىرىڭعاي پلاتفورماسى مەن بارلاۋعا نەمەسە وندىرۋگە ءوتىنىم بەرۋدەن باستاپ ونىڭ اۋكتسيونىنا جانە ليتسەنزيانى بەرۋگە دەيىن تسيفرلىق فورماتتا ۇزدىكسىز ۇدەرىستى جۇزەگە اسىرۋ جونىندە باياندادى. بۇگىندە جەر قويناۋىن پايدالانۋدىڭ بىرىڭعاي پلاتفورماسى ارقىلى گەولوگيا جانە جەر قويناۋىن پايدالانۋ سالاسىنداعى 22 مەملەكەتتىك قىزمەت ەلەكتروندى تۇردە قولجەتىمدى ەكەن.
«ەگەر بۇرىن جەر قويناۋىن پايدالانۋشى اكىمدىكتەرگە, مينيسترلىككە بارىپ, دەلدال ىزدەپ, كەلىسسوز جۇرگىزۋى كەرەك بولسا, ەندى بارلىعىن قاعازباستىلىقسىز ونلاين رەجىمدە الۋعا بولادى», دەدى ۆيتسە-مينيستر.
سونىمەن قاتار جاساندى ينتەللەكتىنى ەنگىزۋ جۇمىستارى قولعا الىنعان. ول گەولوگيالىق اقپاراتتى تانىپ قانا قويماي, ءارتۇرلى سيپاتتامانى تالداپ, Big Data نەگىزىندە ەلدەگى كەن ورىندارى مەن پايدالى قازبالاردىڭ بولجامدى ۇلگىلەرىن جاسايدى.
