جەر جاھاننىڭ دارىندى جاستارىنىڭ باسىن قوساتىن باسەكە 2012 جىلدان بەرى ۇيىمداستىرىلىپ كەلەدى. تۇساۋكەسەر جارىستى اۋستريانىڭ ينسبرۋك قالاسى قابىلدادى. دودادا 67 مەملەكەتتەن كەلگەن 1059 جاس ورەن باق سىنادى. 15 سپورت تۇرىنەن 68 جۇلدە جيىنتىعى ساراپقا سالىندى. جالپىكوماندالىق ەسەپتە گەرمانيا وزدى. نەمىستەر 17 رەت (8 التىن+7 كۇمىس+2 قولا) جەڭىس تۇعىرىنا كوتەرىلدى. ودان كەيىنگى ساتىلارعا قىتاي (8+7+2), اۋستريا (6+4+3) وڭتۇستىك كورەيا (6+3+2), رەسەي (5+4+7) جايعاستى. اۋسترياداعى الاماندا ەلىمىزدىڭ تانىمال شاڭعىشىسى گالينا ۆيشنەۆسكايا 1 كۇمىس, 1 قولا مەدال يەلەنسە, بياتلونشى سەرگەي مالىشەۆ ءۇشىنشى ورىنعا تابان تىرەدى.
ارادا ءتورت جىل وتكەن سوڭ القىزىل الاۋ نورۆەگيانىڭ ليللەحاممەرىندە تۇتاندى. بۇل جولى 71 ەلدىڭ سپورتشىلارى ونەر كورسەتتى. سولاردىڭ اراسىنان اقش-تىڭ اسىعى الشىسىنان ءتۇستى. امەريكالىقتار 16 (10+6+0) جۇلدە الدى. وڭتۇستىك كورەيا دا 16 (10+3+3) مەدال ولجالادى. الايدا جۇلدەلەردىڭ ساپاسى جاعىنان باستى باسەكەلەستەرىنەن قالىپ قويدى. ودان كەيىنگى ورىندارعا رەسەي (7+8+9), گەرمانيا (7+7+8), نورۆەگيا (4+9+6) ورنالاستى. سكانديناۆيا تۇبەگىندە جەرلەستەرىمزگە قوس قولا مەدال بۇيىردى. ونى مانەرلەپ سىرعاناۋشى ەليزابەت تۇرسىنباەۆا مەن بياتلونشى ارينا كريۋكوۆا ەنشىلەدى.
2020 جىلى شۆەيتساريانىڭ لوزانناسىندا شىمىلدىعى تۇرىلگەن دودادا رەسەي قۇراماسى (10+11+8) دارا شىقتى. شۆەيتساريا (10+6+8) مەن جاپونيا (9+7+1) ەكىنشى, ءۇشىنشى ورىنداردى يەلەنسە, ارالاس قۇراما (6+6+6) مەن شۆەتسيا (6+4+7) ءتورتىنشى, بەسىنشى ساتىلارعا تابان تىرەدى. وكىنىشكە قاراي, بۇل جارىستان قورجىنىمىز بوس قايتتى.
2024 جىلعى جارىس وڭتۇستىك كورەيانىڭ كونۆوندو قالاسىندا ۇيىمداستىرىلدى. 70 مەملەكەتتەن جينالعان 1800 سپورتشى سايىسقا ءتۇستى. باسەكەدە يتاليانىڭ الدىنا ەشكىم تۇسە المادى. اپەننين تۇبەگىنىڭ جاستارى 18 (11+3+4) جۇلدەنى ەنشىلەدى. گەرمانيا (9+5+6), جارىس قوجايىندارى (7+6+4), فرانتسيا (7+5+6), قىتاي (6+9+3) ۇزدىك بەستىكتىڭ قاتارىنان كورىندى. كورەيا تۇبەگىندە بارلىعى 22 مەملەكەتتىڭ ءانۇرانى شىرقالىپ, 32 ەلدىڭ تۋى كوكتە جەلبىرەدى.
ۇزدىكتەر تىزىمىندە ەلىمىز 20 ورىندا تۇر. وتانداستارىمىزعا 1 التىن, 2 قولا بۇيىردى. جارىس جولىنا شىققان 41 ورەننىڭ اراسىنان يليا ميزەرنىحتىڭ مەرەيى ۇستەم بولدى. شاڭعىمەن ترامپليننەن سەكىرۋشىلەر سايىسىندا ول باستى قارسىلاستارى – اۋستريالىق نيككي حامل مەن پولشالىق لۋكاس لۋكاششۋكتى باسىپ وزىپ, باس جۇلدەنى قانجىعاسىنا بايلادى. ەلىمىز ءۇشىن بۇل – تاريحي وقيعا. ويتكەنى ميزەرنىحكە دەيىن ەلىمىزدىڭ بىردە-ءبىر سپورتشىسى اتالعان جارىستا جەڭىس تۇعىرىنىڭ ەڭ بيىك ساتىسىنا كوتەرىلگەن ەمەس. شورت-ترەكشى پولينا ومەلچۋك پەن 3ح3 فورماتتاعى شايبالى حوككەيدەن ەلىمىزدىڭ ۇلدار قۇراماسى قولا مەدالعا قول جەتكىزدى.
