مۋزەي ديرەكتورى مۇحامبەتقالي كيپيەۆتىڭ ايتۋىنشا, ارحەولوگيالىق زەرتتەۋ ناتيجەسىندە ۇلىق ۇلىس (التىن وردا) كەزەڭىنە ءتان كوپ جادىگەر تابىلعان. ونىڭ ىشىندە سوعۋ ادىسىمەن جاسالعان, ارابشا جازۋمەن, وسىمدىك سۋرەتىمەن بەزەندىرىلگەن كۇمىس, قولا تيىندار, كوپتەگەن قىش ىدىس, اشەكەيلەر, جانۋارلاردىڭ سۇيەكتەرى مەن مەتالل بۇيىمدار بار.
«ەرەكشە نازار اۋدارۋعا تۇراتىن جادىگەردىڭ ءبىرى – التىن وردا كەزەڭىنە تيەسىلى التىن جاپسىرما. مۇنداي جادىگەر العاش رەت تابىلدى. وسى كەزگە دەيىن ورتاعاسىرلىق سارايشىق قالاشىعىنا بىرنەشە رەت ارحەولوگيالىق زەرتتەۋ جۇمىسى جۇرگىزىلدى. بىراق التىن بۇيىم تابىلماعان بولاتىن», دەيدى م.كيپيەۆ.
ونىڭ پىكىرىنشە, التىن جاپسىرما قوبديشانىڭ نەمەسە كىشكەنتاي ساندىق قاقپاعىنىڭ توپساسى رەتىندە قولدانىلعان بولۋى مۇمكىن. بۇل بۇيىم ورنەكتەۋ ءتاسىلى ارقىلى جاسالعان. جوعارى بولىگىنىڭ اينالاسىنا يرەلەنگەن ورنەك سالىنىپتى. جوعارى جانە تومەنگى بولىگى قوشقار ءمۇيىز ويۋىمەن ورنەكتەلگەن. توپسا رەتىندە بەكىتۋگە ارنالعان ەكى تەسىگى بار.
التىن جاپسىرمانىڭ ولشەمى تىم ۇلكەن ەمەس. ونىڭ ۇزىندىعى – 6 سم, ەنى – 1 سم. ال قالىڭدىعى 0,2 سم-ءدى قۇرايدى.
مۋزەي قىزمەتكەرلەرى ۇلىق ۇلىس كەزەڭىندەگى التىن جاپسىرماعا رەستاۆراتسيا جۇرگىزىپتى. سودان ونى «سارايشىق» مەملەكەتتىك تاريحي-مادەني مۋزەي-قورىعىنا تاپسىردى. وسى كەزگە دەيىن تاريحي قالاشىقتاعى مۋزەي-قورىعى 286 جادىگەرمەن تولىعىپتى.
اتىراۋ وبلىسى
