سوڭعى قىسقى ازيادا وسىدان جەتى جىل بۇرىن جاپونيانىڭ ساپپوروسىندا وتكەن ەدى. سول جارىستا بياتلونشىلار 6 التىن, 4 كۇمىس, 2 قولانى ولجالاپ, ايدى اسپانعا ءبىر-اق شىعاردى. وسى جولى دا ءدال سول سپورت ءتۇرى وكىلدەرىنىڭ جولىنا ۇلكەن ۇمىتپەن قاراپ وتىرمىز. قىتايدا 10 جەرلەسىمىز ونەر كورسەتەدى. سولاردىڭ اراسىنان دۇنيەجۇزىلىك ۋنيۆەرسيادانىڭ جەڭىمپازى ۆاديم كۋرالەس, اتالعان جارىستا ەكى رەتتەن جەڭىس تۇعىرىنا كوتەرىلگەن الەكساندر مۋحين مەن اسەت دۇيسەنوۆتىڭ الەۋەتى اسا جوعارى باعالانادى. كوماندا ساپىندا كەزىندە ازيا ويىندارىندا التىننان القا تاققان ولگا پولتورانينا مەن داريا كليمينا سىندى اتاقتارى الىسقا جايىلعان ارداگەرلەر دە بار.
ەلىمىز ازياداعا قاتىسقان كەزدەن بەرى ورەلى ونەرىمەن ءوز جانكۇيەرلەرىن قۋانتىپ كەلگەن شاڭعىشىلار ەكەنى ءسوزسىز. الايدا جاپونيادا ولار تىم سۇرەڭسىز ونەر كورسەتتى. ساپپوروداعى ساتسىزدىكتىڭ «كەزدەيسوقتىق» ەكەنىن دالەلدەۋ ءۇشىن 12 سپورتشىمىز حاربينگە اتتاندى. ولار – نادەجدا ستەپاشكينا, داريا رياجكو, كاميلا ەلعازينوۆا, كسەنيا شالىگينا, انگەلينا شۋرىگا, ماريا ليۋفت, ءىلياس يسابەك, نايل باشماكوۆ, ەرنار نۇرىسبەكوۆ, ولجاس كليمين, ۆلاديسلاۆ كوۆالەۆ, كونستانتين بورتسوۆ. وسىلاردىڭ اراسىنان كەمىندە ەكى-ۇشەۋىنىڭ باس جۇلدەگە تالاسۋعا قاۋقارى جەتەدى.
بىلىكتى باپكەر مادىعالي قارسىبەكوۆتىڭ ەڭبەكقورلىعى مەن تاباندىلىعىنىڭ ارقاسىندا ەلىمىزدىڭ شورت-ترەگى زور بيىككە كوتەرىلدى. بۇگىندە كۇللى الەم ءبىزدىڭ ورەندەرمەن ساناسادى. حاربيندە دەنيس نيكيشا, ابزال, الينا اجعاليەۆتەر, ءادىل عالياحمەتوۆ, يانا حان باستاعان 12 ساڭلاق جارىس جولىنا شىعادى. جوعارىدا ەسىمدەرى اتالعان سپورتشىلاردىڭ بارلىعى دا تالاي ءدۇبىرلى دودادا دارالانعان. د.نيكيشا وليمپيا ويىندارىندا جەڭىس تۇعىرىنا سىنىق سۇيەم قالعاندا سۇرىنسە, بىلتىر روتتەردامدا ۇيىمداستىرىلعان الەم چەمپيوناتىندا كۇمىس مەدالدى موينىندا جارقىراتتى. وزگە شورت-ترەكشىلەر الەم كۋبوگىنىڭ كەزەڭدىك سايىستارىندا ولجاعا كەنەلدى. سول سەبەپتى دە الداعى جارىستان جەرلەستەرىمىزدىڭ قورجىنى بوس قايتپايتىنىنا سەنىمدىمىز.
كونكيشىلەر سايىسىندا نادەجدا موروزوۆا, التاي جاردەمبەك ۇلى, اپالى-ءسىڭلىلى شۋمەكوۆالار ءوز جانكۇيەرلەرىن قۋانتۋعا ءتيىس. مانەرلەپ سىرعاناۋدا ميحايل شايدوروۆ بار. جاستار اراسىنداعى الەم چەمپيوناتىنىڭ كۇمىس جۇلدەگەرى دەگەن اتاعى بار 20 جاستاعى الماتىلىق ورەن بۇگىنگى تاڭدا ەرەسەكتەر دۋىندا دا ەلەۋلى تابىسقا قول جەتكىزىپ ءجۇر. ميحايلدىڭ مىقتىلىعىن مويىنداتىپ, ناعىز ەرلەيتىن تۇسى وسى. سوفيا سامودەلكيناعا دا سەنىم ارتىلىپ وتىر. بىلتىر عانا ەلىمىزدىڭ ازاماتتىعىن العان 17 جاستاعى رەسەيلىك لەگيونەر جۋىردا عانا تۋريندە وتكەن دۇنيەجۇزىلىك ۋنيۆەرسيادادا قولا مەدالدى قورجىنعا سالدى. بۇل – سوفيا بابىندا دەگەن ءسوز. شايدوروۆ پەن سامودەلكينادان بولەك, دياس جيرەنباەۆ, سوفيا فارافونوۆا, بايسانگۋر داتيەۆ, گاۋحار ناۋرىزوۆا سىندى ءتول تۇلەكتەرىمىز مۇز ايدىنىنا شىعادى.
ەلىمىز وسىعان دەيىن ازيا ويىندارىنا التى رەت قاتىستى. سول جارىستاردىڭ بارلىعىنان شايبالى حوككەيشىلەرىمىز ولجالى ورالدى. 1996, 1999, 2011, 2017 جىلدارى باس جۇلدەنى قانجىعاعا بايلاساق, 2003, 2007 جىلدارى كۇمىسپەن كۇپتەلدىك. حاربيندە قحل-دا كۇش سىناسىپ جۇرگەن اندرەي شۋتوۆ, تەمىرلان گايتاميروۆ, دانيل بۋتەنكو, ءادىل بەكەتاەۆ, سامات دانيار, ارتەم كورولەۆ, رومان ستارچەنكو, كيريلل ساۆيتسكي, ءاليحان ومىربەكوۆ, كيريلل پانيۋكوۆ, رۋسلان وسپانوۆ سىندى «بارىستىڭ» 11 سايىپقىرانىنان بولەك, رەسەي مەن ەلىمىزدىڭ چەمپيوناتتارىندا باق سىناپ جۇرگەن ويىنشىلار ونەر كورسەتەدى. جىگىتتەردەن تەك التىن كۇتەمىز. وسى سپورت ءتۇرىن سەرىك ەتكەن بۇرىمدىلارىمىز دا وسال ەمەس. بۇعان دەيىنگى ازيادادا قىزدارىمىز 3 التىن, 3 قولا يەلەندى. بۇل جولى دا باس جۇلدەنى ولجالاۋعا بارىنشا كۇش سالۋىمىز كەرەك. سونداي-اق سپورتشىلارىمىز تاۋ شاڭعىسى, كەرلينگ, سكي-الپينيزم, فريستايل-اكروباتيكادان وتەتىن باسەكەلەردە باق سىنايدى.
جۋىردا ۇكىمەتتىڭ وتىرىسىندا تۋريزم جانە سپورت ءمينيسترى ەربول مىرزابوسىنوۆ حاربيندە جالاۋى جەلبىرەيتىن اسا جاۋاپتى جارىسقا ساپالى دايىندالۋ ماقساتىندا جوعارىدا اتالعان سپورت تۇرلەرىنەن ۇلتتىق قۇراما كوماندالارىمىز 137 وقۋ-جاتتىعۋ جيىنىنا قاتىسقانىن, سپورتشىلاردىڭ شەبەرلىگىن شىڭداۋ ءۇشىن نيدەرلاند, پولشا, سلوۆەنيا, بەلارۋس, رەسەيدەن ارنايى شاقىرىلعان كەڭەسشى-باپكەرلەردىڭ كومەگىنە جۇگىنگەندەرىن, دايىندىق جوعارى دەڭگەيدە وتكەنىن تىلگە تيەك ەتتى. ولاي بولسا, الداعى قىسقى ازيادادا ەلىمىزدىڭ ورەندەرى ۇزدىكتەر ساناتىنان كورىنۋگە ءتيىس.
- ازياداعا ەڭ كوپ سپورتشىلار استانا قالاسىنان قاتىسادى. حاربينگە اتتانعان ەلوردالىقتاردىڭ سانى – 37. وزگە وڭىرلەردەن باق سىنايتىن ورەندەرىمىزدىڭ سانى: الماتى قالاسى – 27, شىعىس قازاقستان – 18, اقمولا – 17, قوستاناي – 9, سولتۇستىك قازاقستان – 7, شىمكەنت – 6, پاۆلودار – 4, الماتى وبلىسى – 3, قاراعاندى – 3, اباي – 3, ماڭعىستاۋ – 2, جەتىسۋ – 1, باتىس قازاقستان – 1.
- بيىلعى ازيا ويىندارىنا تۇركىستان, ۇلىتاۋ, جامبىل, قىزىلوردا, اقتوبە, اتىراۋ وبلىستارىنىڭ بىردە-ءبىر وكىلى قاتىسپايدى.
- قىتايعا اتتانعان ساڭلاقتاردىڭ كەيبىرەۋى بۇعان دەيىنگى ازيادادا جەڭىس تۇعىرىنىڭ ەڭ بيىك ساتىسىنا كوتەرىلگەن. ماسەلەن, 2011 جىلى استانا مەن الماتىدا الاۋى تۇتانعان الاماندا ولگا پولتورانينا (بياتلون), ەۆگەني رىمارەۆ, رومان ستارچەنكو, تاتيانا كوروليوۆا (شايبالى حوككەي) التىن مەدالدى يەلەنسە, 2017 جىلى ساپپورودا داريا كليمينا (بياتلون), كيريلل ساۆيتسكي, يۆان ستەپانەنكو, دميتري گرەنتس (شايبالى حوككەي) ءدال سول مەجەدەن كورىندى.
- وسىعان دەيىنگى ازيا ويىندارىندا مىنا سپورتشىلار جۇلدەگەرلەر ساناتىنا قوسىلدى: ابزال اجعاليەۆ (استانا-الماتى, 2011 جىل – قولا, شورت-ترەك), ولگا تيحونوۆا, ءمادينا جانبوسىنوۆا (ساپپورو, 2017 جىل – قولا, شورت-ترەك, ارالاس ەستافەتا), ارينا ششيوكولوۆا, ءمادينا تۇرسىنوۆا, ماليكا الدابەرگەنوۆا, پەرنەش ءاشىموۆا, تاتيانا كوروليوۆا (ساپپورو, 2017 جىل – قولا, شايبالى حوككەي), داريا كليمينا (ساپپورو, 2017 جىل – 2 قولا مەدال, بياتلون).
- ەلىمىز قۇراماسى ساپىنداعى ەڭ قارت سپورتشى – دەنيس ۆلاسوۆ. سكي-ءالپينيزمدى سەرىك ەتكەن ساڭلاقتىڭ جاسى 41-دە. ەڭ جاس ورەن – سوفيا زۋبكوۆا. شايبالى حوككەيدەن سايىسقا تۇسكەلى جاتقان بويجەتكەننىڭ جاسى 17-دە.
