قازاقشا ءبىلىم العانىمىزدى ماقتان ەتەمىز

مەن باياناۋىلدىڭ بىرلىك اۋى­لىندا تۋىپ-ءوستىم. وتباسىندا بەس قىز بولساق, ءبارىمىز دە اۋىل­دا كورشى قىزدارمەن قازاقشا سويلەسەتىنبىز. اكەم نيكولاي رۋدولفوۆيچ, انام ليۋدميلا اناتولەۆنا دا قازاقشا ءبىر كىسىدەي سويلەي الاتىن. قازاق مەكتەبىندە وقىپ, ءبىلىم العانىمىزدى ماقتان ەتەمىز. وبلىس ورتالىعىنداعى  بەيسەن احمەتوۆ اتىنداعى پەداگوگيكالىق كوللەدجدە اۋدارماشى-رەفەرەنت ماماندىعى بويىنشا ءبىلىم الدىم. قازاق تىلىنەن اعىلشىن تىلىنە اۋدارماشى, كەيىن ەۋرازيا يننوۆاتسيالىق ۋنيۆەرسيتەتىندە قازاق ءتىلى مەن ادەبيەتى پاندەرىنىڭ مۇعالىمى ماماندىعىن الىپ شىقتىم. قازاق ءتىلىن بىلگەنىمنىڭ ارقاسىندا ۋنيۆەرسيتەتكە ءتۇستىم, رەكتورلىق گرانت ءبولىندى. اباي, مۇقاعالي وقۋلارىنا قاتىسىپ, جۇلدەلى ورىندارعا يە بولدىم. ءتۇرلى قالالىق, رەسپۋبليكالىق  فورۋمدارعا, دوڭگەلەك ۇستەلدەرگە قاتىستىم. ارينە, قازاق ءتىلىن جاقسى بىلگەنىم ءۇشىن رەجيسسەرلەردىڭ جاقسى دەگەن باعاسىن الىپ, ەفير جۇرگىزۋگە ارنالعان كاستينگتەن ءوتتىم. سول كەزدەگى وبلىس اكىمى باقىتجان ساعىنتاەۆتىڭ قاتىسۋىمەن بولعان ءبىر جيىندا ول كىسىگە قازاق تىلىندە  سويلەگەنىم قاتتى ۇنادى ما, مەنىڭ وبلىستىق تەلەارناعا كەلۋىمە ۇلكەن جول اشتى. اركەز ەسىمە الىپ, قۋانا راحمەت ايتىپ جۇرەمىن. ءبىز –  قازاقستاندىقتارمىز. تۋعان اۋىلىم بىرلىك – مەنىڭ كىشى وتانىم, ماعان وتە قىمبات, سوندىقتان ەشتەڭەگە ايىرباستامايمىن,  دوستارىم دا وسىندا. اۋىلدا ءبىز قازاق بولىپ وستىك. وسى سەبەپتى قازاقستان – ءبىزدىڭ ماڭگىلىك وتانىمىز. تۇرمىسقا شىقتىم. جۇبايىم اندرەيدى ءبىزدىڭ وتباسىمىزداعى جالعىز ورىس دەپ ك ۇلىپ قويامىز. ول دا قازىر ازداپ  قازاقشا تۇسىنەتىن بولدى. سەبەبى, دوستارىنىڭ كوبى قازاق. قىزىمىز ارينا كىشكەنتاي, ول دا  قازاقشا تۇسىنەدى, بىلدىرلاپ ەندى-ەندى سويلەي باستادى. ءبىز ءوز ەلىمىزدەگى تىنىشتىق, بىرلىك ءۇشىن ەلباسىنا راحمەت ايتامىز, وزگە ۇلتتار دەگەن  ءسوزدىڭ ءوزىن ۇمىتا باستاعاندايمىز. ءبارىمىز ءبىر ەلدىڭ ۇل-قىزىمىز دەگىم كەلەدى. مارينا ساحاروۆا, وبلىستىق «قازاقستان-پاۆلودار» تەلەارناسىنىڭ ديكتور-تەلەجۇرگىزۋشىسى. پاۆلودار.