“اراي” اۋىلدى اجارلاندىرا تۇسەدى

قازاقستانداعى ءىرى ينۆەستور “لۋكويل” مۇناي كومپانياسى بيىل ءتورتىنشى رەت ماڭعىستاۋ وبلى­سى­نىڭ اۋىل ەڭبەككەرلەرىنە قايتا­رىمسىز گرانتتار ءبولدى. ماڭعىستاۋ وبلىسى بويىنشا سوڭعى ءتورت جىلدا جۇزەگە اسا باس­تاعان بۇل يگى شارا نەگىزىنەن اۋىل ادامدارىنىڭ ورتا جانە شاعىن بيزنەسىن دامىتۋعا باعىت­تالعان. جانە دە ءبىر قۋانىشتىسى ول ءوز جە­مىسىن بەرىپ تە كەلەدى. سونى باع­دارلاعان “لۋكويل” مۇناي كومپا­نياسى جىل سايىنعى گرانت­تار سا­نىن كوبەيتىپ وتىر. بۇل رەت­تە ءتورت جىل ىشىندە 142 كاسىپكەر گرانتقا يە بولىپ, 211 جاڭا جۇمىس ورنى اشىلعاندىعىن اتاپ ايتقان ءجون. “اراي” گرانتتارىنىڭ دەنى ورال­ماندارعا, كوپ بالالى وتباسى­لارىنا جانە مۇگەدەك جاندارعا ۇسىنىلىپ, جوبالارى جان-جاقتى سارالانىپ وتىرادى. ولاردىڭ جىل سايىنعى ۇسىنىس-جوبالارىنىڭ سان الۋاندىعى دا كوڭىل قۋانتادى. وسى ورايدا سوڭعى تاپسىرىستاردا اۋىلدىڭ الەۋمەتتىك الەۋەتىن كو­تەرۋگە باعىتتالعان جوبالار كوپ كەز­دەستى. بۇل سايىپ كەلگەندە اي­ماق­تاعى التىن بەسىك اۋىلدىڭ ءىر­گەسىن بەكىتە تۇسۋگە يگى ىقپال ەتۋدە. ناتيجەسىندە ماڭعىستاۋ ءوڭىرىنىڭ تۇرعىندارى اۋىلدان قالاعا قونىس اۋدارۋ بويىنشا ەلىمىزدەگى ەڭ سوڭ­عى ورىنعا شىعۋى دالەل. بۇل يگى­لىكتى باستاما وبلىس اكىمدىگىنىڭ ءجا­نە وبلىستاعى ازاماتتىق اليانس­تىڭ ۇيىمداستىرۋىمەن ءجۇ­زەگە اسقاندى­عى دا قۇپتارلىق, ال­يانس پرەزي­دەنتى ج. ماحامبەتوۆا مەن “لۋ­كويل” كومپانياسىنىڭ وبلىستاعى وكىلى ە. كۇمىسقاليدىڭ ايتۋىنشا, اۋىلداعى الەۋمەتتىك قىزمەتكە, سا­لاماتتى ءومىر سالتىن قالىپتاس­تىرۋعا, دەنساۋلىق پەن سپورتتى دامىتۋ سالالارىنا كو­بىرەك كوڭىل بولىنبەكشى. كەزەكتى گرانتتار تاپسىرۋعا ارنالعان سال­تا­ناتتا وتكەن جىلداردا بەرىلگەن قاراجات بويىنشا اتقارىلعان جۇمىستىڭ جەمىسىن كورسەتەتىن كورمەنىڭ ۇيىمداستىرىلۋى دا سونىڭ ايعاعى. ونداعى بۇيىمدار, ونىمدەر, قۇرال-جابدىقتار بىردەن نازار اۋدارتتى. مىسالى, تاۋشىق اۋىلىنان كەلگەن جەكە كاسىپكەر ن. ورىنباسارقىزى “اراي” الەۋمەت­تىك باعدارلاما­سىنىڭ ناتيجەسىندە قازاقتىڭ كيىز ءۇي جابدىقتارى: ءىر­گە­لىك, ۋىق باۋ, دودەگە جۇزىك, ءتۇن­دىكپەن قاتار شىم وراۋلى شي, ەشكىنىڭ قىلىنان ءيى­رىلگەن ءتۇرلى ءجىپتى جايىپ سالىپتى. وسى قادىرلى ماماندىققا ەكى ۇل مەن كەلىندەرىن دە تارتىپ وتىرعاندىعىن كاسىپكەر ماقتانىشپەن ايتتى. ال, اقشۇ­قىر­لىق ە. اليەۆتىڭ “مادەني مۇ­را” باعدارلاماسىنا وراي وبلىس­تىق تاريحي مۇراجايدان ۇمىتىلا باستاعان ۇلتتىق ىدىس-اياق, قۇرال-جابدىقتاردى, ياعني سيرەك كەزدە­سەتىن جادىگەرلەردى الىپ ونىڭ كو­شىرمەلەرىن جاس ۇرپاققا جاريا ەتۋى قۇپتارلىق ءىس ەكەن. ونەگەلى ءىستىڭ ايعاعىنداي وسى جەردە مە­ساياق, تۇزباسپاق, شاي ساندىق پەن اقباس ەر ءتارىزدى كوز جاۋىن الار ءجادى­گەرلەر مەنمۇندالايدى. اۋى­لىندا شاعىن كاسىپ اشىپ, ءتۇرلى بۇيىمدار جاسايتىن تۇپقاراعان­دىق ب.راما­زانوۆانى, شەبەر شاش­تاراز ا.سۇيە­گەنوۆانى, سونداي-اق سپورت زالدا­رىنىڭ, گازبەن دانە­كەرلەۋ تسە­حىنىڭ, ۇلتتىق كيىمدەر شەبەرحانا­سىنىڭ جۇمىسىن جولعا قويعان ىسكەر جانداردىڭ قىز­مەتتەرى كوپ كوڭىلىنەن شىقتى. بۇل كورمەدەن “اراي” الەۋمەت­تىك جوباسى ارقىلى وڭىردە ۇمى­تىلا باستاعان كەيبىر ماماندىق­تاردىڭ دا جاندانا باستاۋىنىڭ كۋاسى بولدىق. كورمە زالىندا تۇپقاراعان اۋدانىنىڭ تاۋشىق اۋىلىندا ءوز ءىسىن دوڭگەلەتىپ وتىر­عان كاسىپكەر م.ادىروۆ ءوزىنىڭ با­لىق اۋلاۋ شا­رۋاشىلىعىن قۇرعان ەدى. بۇدان ەكى-ءۇش جىل بۇرىن قا­راپايىم عانا قۇ­رال-جابدىقتار­مەن كاسىبىن باس­تا­عاندا شارۋاسى ونشا شالقي قويعان جوق بولاتىن. ۋاقىت وتە كەلە اتالمىش جوبا ارقاسىندا موتورلى قايىق, قۋاتتى توڭازىتقىش, باسقا دا زاماناۋي قۇرال-جابدىقتارعا قول جەتكىزىپ, ەندى جەمىسىن كورىپ وتىر. با­لىق­شىنىڭ سۋ تۇبىنەن سۇزگەن ءونىم­دەرى ۇلكەن سۇرانىسقا يە. سونى­مەن بىرگە تابيعاتى قاتال, سۋى تاپشى بۇل وڭىردە كوكونىس, باۋ-باقشا وسىرۋشىلەر سانى دا كوبەيە تۇسكەنى اڭعارىلادى. ءسويتىپ بيىل “اراي-2010 ءال­ەۋمەتتىك سەرىكتەستىك” جوباسىنىڭ جەڭىمپازدارىنا گرانتتار, سەرتي­فيكاتتار تابىستاۋ ءراسىمى دە سال­تاناتتى جاعدايدا باستالدى. بيىل بايقاۋعا 300-گە جۋىق ۇمىتكەر قاتىسىپتى. ولاردىڭ ىشىنەن ەڭ ءۇز­دىكتەر دەپ تانىلعان 62 ادام گرانت­قا يە بولدى. اتالعان گرانت­تاردى وبلىس اكىمى ق.كوشەرباەۆ, “لۋ­كويل” مۇناي كومپانياسىنىڭ قا­زاقستان رەسپۋبليكاسىنداعى وكىل­دى­گىنىڭ باسشىسى ا.كيريلوۆ سالتا­نات­تى جاعدايدا تابىس ەتتى. اۋىلدى ودان ءارى كوركەيتىپ, گۇل­دەندىرە تۇسۋلەرىنە ساتتىلىك تىلەدى. ءسويتىپ, وسى جىلى اتالمىش الەۋ­مەتتىك جوبا بويىنشا بارلىق اۋدانداعى اۋىلداردا دەرلىك 13 تىگىن تسەحى, 5 شەبەرحانا, 7 ناۋ­بايحانا, كونديتەر تسەحى, اۆتوكولىك جوندەيتىن ورتا­لىق­تار, گازبەن ءدا­نەكەرلەۋ شەبەر­حانالارى, كوپتەگەن جىلىجايلار اشىلاتىن بولدى. ياعني “لۋكويل” مۇناي كومپانيا­سىنىڭ “اراي” الەۋمەتتىك جوباسى اۋىلدى بۇدان دا اجارلاندىرا ءتۇسىپ, كوركەيتپەك. جولامان بوشالاق, ماڭعىستاۋ وبلىسى.