- 25 اقپاندا الماتىدا PWL 8 ءتۋرنيرى وتەدى. سول جارىستا 86 كگ سالماقتاعى قازاقتىڭ بەلگىلى ەركىن كۇرەس شەبەرى, ەكى دۇركىن الەم چەمپيوناتىنىڭ قولا جۇلدەگەرى, ازيانىڭ ءۇش دۇركىن چەمپيونى ازامات داۋلەتبەكوۆ ماگومەدحابيب كاديماگومەدوۆپەن كۇش سىناسادى. ەكەۋىنىڭ دە جاسى 30-دا. ماگومەدحابيب داعىستاندا دۇنيەگە كەلگەنىمەن, بەلارۋستىڭ نامىسىن قورعاپ جۇرگەنىنە بىرەر جىلدىڭ ءجۇزى بولدى. ول – توكيو وليمپياداسىنىڭ كۇمىس جۇلدەگەرى, الەم كۋبوگىنىڭ قولا جۇلدەگەرى, ەۋروپا چەمپيونى. بىراق ءبىر ايتا كەتەرلىگى, بۇل تابىستارىنا كاديماگومەدوۆ 74 كگ, 79 كگ سالماق دارەجەلەرىندە ونەر كورسەتىپ جۇرگەن كەزدەرىندە قول جەتكىزدى.
- حالىقارالىق شاحمات فەدەراتسياسى ءوز رەيتينگىن جاڭارتتى. ۇزدىكتەر ساناتىندا ەلىمىزدىڭ بىرنەشە وكىلى بار. ايەلدەر اراسىندا ءبيبىسارا اساۋباەۆانىڭ (2 494 ۇپاي) اياقالىسى قۋانتادى. ەلىمىزدىڭ ەڭ ۇزدىك ويىنشىسى كلاسسيكالىق شاحماتتان 13-ورىندا تۇر. راپيدتە 9 (2 446 ۇپاي), بليتستە 6 (2 441 ۇپاي) ساتىعا جايعاستى. قىزداردىڭ رەيتينگىندە مەرۋەرت كاماليدەنوۆا (2 355 ۇپاي) 10, ءامينا قايىربەكوۆا (2 336 ۇپاي) 13, الۋا نۇرمان (2 336 ۇپاي) 14-ورىندى ەنشىلەدى. سونداي-اق مەرۋەرتتىڭ راپيد (4-ورىن, 2 368) پەن بليتستەگى (5-ورىن, 2 324) ناتيجەلەرى دە ءتاۋىر.
- 14–16 اقپان ارالىعىندا ازەربايجاننىڭ باس شاھارى – باكۋدە وتەتىن Grand Slam تۋرنيرىندە ەلىمىزدىڭ ءۇش دزيۋدوشىسى بەلدەسەدى. ولار – ادىلبەك بەرىك ۇلى (66 كگ), يسلام توقتاسىن (81 كگ), قۋانىش راتاەۆ (100 كگ).
- 27 جاستاعى كاسىپقوي بوكسشى سادريددين احمەدوۆ (15-0, 13 كو) ءوزىنىڭ كەلەسى كەزدەسۋىن 19 ساۋىردە اقش-تىڭ كاليفورنيا شتاتىنداعى كوممەرس قالاسىندا «لاتىن بالاسى» دەگەن بۇركەنشىك ەسىممەن تانىلعان 34 جاستاعى مەكسيكانىڭ مارقاسقاسى ەلياس ەسپاداسقا (23-6, 16 كو) قارسى وتكىزەدى. بۇل سول كەشتىڭ باستى جەكپە-جەگى بولماق.
- ابۋ-دابيدە WTA-500 ءتۋرنيرى باستالدى. جۇلدە قورى 1 064 510 اقش دوللارىن قۇرايتىن ءدۇبىرلى دودادا ەلىمىزدىڭ ەكى تەننيسشىسى باق سىنايدى. ولاردىڭ ەكەۋى دە جارىستى ەكىنشى كەزەڭنەن باستايدى. ەلەنا رىباكينا الەمدىك رەيتينگتە 68 ورىندا تۇرعان امەريكالىق كەتي ۆولىنەتسپەن كەزدەسەدى. يۋليا پۋتينتسەۆا چەحيالىق ماركەتا ۆوندروۋشەۆا مەن ۇلىبريتانيالىق ەمما رادۋكانۋ اراسىنداعى باسەكەنىڭ جەڭىمپازىمەن شەبەرلىك بايقاسادى. روتتەردامداعى تۋرنيردە الەكساندر بۋبليك باق سىنايدى. تۇساۋكەسەر كەزدەسۋدەگى ونىڭ قارسىلاسى – چەحيانىڭ وكىلى ياكۋب مەنشيك. دودانىڭ جۇلدە قورى 2,5 ميلليون دوللاردان اسادى.
- 13–18 اقپان ارالىعىندا تالدىقورعانداعى «جاستار» سپورت سارايىندا 22 جاسقا دەيىنگى بوكسشىلار اراسىندا ەل چەمپيوناتى ۇيىمداستىرىلادى. جەكپە-جەكتەر 13 سالماق دارەجەسىندە وتەدى. جارىستا الداعى ۋاقىتتا ۇلتتىق قۇراما كوماندانىڭ ساپىنا قابىلداناتىن رەزەرۆ قاراستىرىلادى. ءبىر ايتا كەتەرلىگى, بۇرىن-سوڭدى ەلىمىزدە وسى جاس ەرەكشەلىگى بويىنشا جارىس وتپەگەن. بۇل جوبا جاڭادان تاعايىندالعان اعا جاتتىقتىرۋشى, وليمپيادا چەمپيونى باقىت سارسەكباەۆتىڭ جەتەكشىلىگىمەن جۇزەگە اسىپ جاتىر.
- كۋۆەيتتىڭ ەل-كۋۆەيت قالاسىندا ستەند اتۋدان ەلىمىزدىڭ قۇراماسى وقۋ-جاتتىعۋ جيىنىن باستادى. وعان ۇلتتىق كوماندا ساپىنداعى 42 مەرگەن قاتىسىپ جاتىر. جيىن 13 اقپاندا اياقتالادى.
