- كونكيدەن ەلىمىزدىڭ جاسوسپىرىمدەر قۇراماسىنىڭ مۇشەسى الينا داۋرانوۆا يتاليانىڭ كوللابالبو قالاسىندا جالاۋى جەلبىرەگەن الەم كۋبوگىنىڭ كەزەڭدىك سايىسىندا التىننان القا تاقتى. 1 000 مەترلىك قاشىقتىققا مارە سىزىعىن ءبىرىنشى بولىپ قيىپ ءوتتى. كۇمىس, قولا مەدالدى يتاليالىق مەيبريت ۆيگل مەن نورۆەگيالىق يننا ناكەن ەنشىلەدى. قۇرامىندا الەنا ليفاتوۆا, الينا داۋرانوۆا, ارينا يلياششەنكو سىندى بۇرىمدىلارى بار ەلىمىزدىڭ كومانداسى سپرينتتە دە الدىنا جان سالمادى. ەكىنشى, ءۇشىنشى ورىندا – يتاليا مەن نورۆەگيا قۇرامالارى. كەلەسى كۇنى الينا ءوز جانكۇيەرلەرىن تاعى دا قۋانتتى. 500 مەترلىك باسەكەدە ماجارستاندىق حاننا بيرودان عانا قالىپ قويىپ, كۇمىس مەدالدى موينىندا جارقىراتتى.
- كانادانىڭ ۆال-سەنت-كوم كۋرورتىندا فريستايل-موگۋلدان الەم كۋبوگىنىڭ كەزەڭدىك باسەكەسىنىڭ شىمىلدىعى ءتۇرىلدى. جارىستا اناستاسيا گورودكو وتە جاقسى ونەر كورسەتتى. جارتىلاي فينالدا فرانتسيانىڭ ماقتانىشى, وليمپيا ويىندارىنىڭ جەڭىمپازى, الەمنىڭ بەس دۇركىن چەمپيونى پەررين لاففوندى ارتقا تاستاعان 19 جاستاعى جەرلەسىمىز شەشۋشى تۇستا اقش ارۋى, بەيجىڭ وليمپياداسى مەن الەم چەمپيوناتىنىڭ ءۇش دۇركىن كۇمىس جۇلدەگەرى دجەيلين كاۋفكە ەسە جىبەردى. يۋليا گالىشەۆا 9-ورىنعا تۇراقتاسا, اياۋلىم امرەنوۆا 13-ساتىعا تابان تىرەدى.
- فۋتزالدان 2026 جىلى وتەتىن ەۋروپا چەمپيوناتىنىڭ ىرىكتەۋ تۋرنيرىندە ەلىمىزدىڭ قۇراماسى ويدا جوقتا دانيادان ۇتىلىپ قالدى. سيوننەربورگتە وتكەن باسەكە 3:2 ەسەبىمەن اياقتالدى. 27-مينۋتتا ادام فوگت الاڭ يەلەرىن العا شىعارسا, 31-مينۋتتا نارۋن سەرىكوۆ تارازى باسىن تەڭەستىردى. 34, 38 مينۋتتاردا موحاممەد يۋسسەف قاتارىنان ەكى رەت نىسانانى ءدال كوزدەدى. ماتچ اياقتالار تۇستا داۋرەن تۇرساعۇلوۆ ەسەپ ايىرماشىلىعىن قىسقارتتى. قازىردە جەرلەستەرىمىز جارىس كەستەسىندە ەكىنشى ورىندا تۇر. قورجىنىمدا – 4 ۇپاي. 7 ۇپاي ەنشىلەگەن ارمەنيا كوش باسىندا, البانيا مەن دانيادا 3 ۇپايدان بار.
- استانادا دەۆيس كۋبوگى الەمدىك توبىنىڭ پلەي-وفف كەزەڭى اياسىندا قازاقستان – پاكىستان قۇرامالارى كۇش سىناستى. بۇل باسەكەدە ەلىمىزدىڭ تەننيسشىلەرى ايقىن باسىمدىق تانىتتى. جەكەلەگەن سايىستا الەكساندر شەۆچەنكو مۋزاميل مۇرتازاعا (6:2, 6:1) شاڭ قاپتىرسا, بەيبىت جۇقاەۆ حۋزايف ابدۋل رەحماننان (7:5, 6:0) باسىم ءتۇستى. كەلەسى كۇنى جۇپتىق سىندا الەكساندر شەۆچەنكو/تيموفەي سكاتوۆتىڭ اكەل حان/مۋزاميل مۇرتازادان (6:4, 7:6) مەرەيلەرى ۇستەم بولدى. ءسويتىپ, پاكىستاندى 3:0 ەسەبىمەن ۇتقان جەرلەستەرىمىز اتالعان جارىستىڭ ءى الەمدىك توبىنا قايتا جولداما الدى.
- بۇل كۇندەرى سپورتتىق گيمناستيكادان ەلىمىزدىڭ قۇراماسى قاتاردىڭ باس شاھارى – دوحادا وقۋ-جاتتىعۋ جيىنىن وتكىزىپ جاتىر. بيىلعى ماۋسىمنىڭ تۇساۋكەسەر ءتۋرنيرى 20-23 اقپان ارالىعىندا گەرمانيانىڭ كوتبۋسىندە وتەدى. ودان كەيىن ناۋرىز ايىنداعى الەم كۋبوگىنىڭ كەزەڭدىك سايىستارىن باكۋ مەن انتاليا قابىلدايدى. العاشقى ەكى دودادا ميلاد كاريمي, دميتري پاتانين, ءىلياس ءازيزوۆ, زەينوللا ىدىرىسوۆ ونەر كورسەتەدى. ءۇشىنشى كەزەڭدە ولاردىڭ قاتارىنا ناريمان قۇربانوۆ قوسىلادى. وليمپيا ويىندارىنىڭ كۇمىس جۇلدەگەرى قازىرگى كەزدە پراگادا جەكە باعدارلامامەن دايىندالىپ جاتىر.
- فۋتبولدان ۋەفا چەمپيوندار ليگاسىنىڭ پلەي-وفف سايىستارىنىڭ جەرەبەسى تارتىلدى. ۇزدىكتەر ساناتىنا قوسىلۋ جولىندا مىنا كلۋبتار ءوزارا شەبەرلىك بايقاسادى: «برەست» – «پسج», «موناكو» – «بەنفيكا», «يۋۆەنتۋس» – پسۆ, «فەيەنوورد» – «ميلان», «مانچەستەر سيتي» – «رەال», «سەلتيك» – «باۆاريا», «بريۋگگە» – «اتالانتا», «سپورتينگ» – «بورۋسسيا». جالپى كەزەڭدە 1-8 ورىنداردى يەلەنگەن «ليۆەرپۋل», «بارسەلونا», «ارسەنال», «ينتەر», «اتلەتيكو», «بايەر», «ليلل», «استون ۆيللا» بىردەن 1/8 فينالعا جولداما الدى. جاڭا فورماتتا ءوتىپ جاتقان دوپ دوداسىندا ءساتسىز ويناعان «دينامو» (زاگرەب), «شتۋتگارت», «شاحتەر», «بولونيا», «تسرۆەنا زۆەزدا», «شتۋرم», «سپارتا», «لەيپتسيگ», «جيرونا», «زالتسبۋرگ», «سلوۆان», «يانگ بويز» جارىس جولىنان شىعىپ قالدى.
- ەلىمىزدىڭ ەڭ ۇزدىك تەننيسشىسى ەلەنا رىباكينانى ەندى يتاليالىق مامان داۆيدە سانگۆينەتتي جاتتىقتىراتىن بولدى. بۇل اقپاراتتى عالامتور ارقىلى ەلىمىزدىڭ ءبىرىنشى راكەتكاسىنىڭ ءوزى تاراتتى. 52 جاستاعى اپەننين تۇبەگىنىڭ وكىلى 1993–2003 جىلدار ارالىعىندا ءتۇرلى تۋرنيرگە قاتىستى. اتر رەيتينگىندە 42-ورىنعا دەيىن كوتەرىلدى. 1998 جىلى ۋيمبلدوننىڭ شيرەك فينالىندا ونەر كورسەتتى. كەيىننەن باپكەرلىك قىزمەتكە اۋىسىپ, ۆينسەنت سپەيدي, گو سوەدا, دينارا سافينا سىندى تانىمال ويىنشىلاردى جاتتىقتىردى.
