ۇكىمەتتىڭ 2017 جىلعى 31 قازانداعى قاۋلىسىنا وزگەرىستەر ەنگىزىلىپ, قازاقستانداعى مەرەكەلىك كۇندەر ءتىزىمى «3 قىركۇيەك – قازاقى يت تۇقىمدارى كۇنى» دەگەن تارماقپەن تولىقتى.
مينيسترلىكتىڭ مالىمدەۋىنشە, بۇل مەرەكەنى ەنگىزۋ – قازاق حالقىنىڭ مادەني مۇراسىن, تاريحىن جانە ءداستۇرىن دارىپتەۋگە باعىتتالعان ماڭىزدى قادام. سونداي-اق, مەرەكە ەتنوگرافيا مەن ۇلتتىق مادەنيەتكە قىزىعاتىن تۋريستەردىڭ نازارىن اۋدارۋعا ىقپال ەتەدى.
«تازى مەن توبەتتىڭ ماڭىزىن ارتتىرۋ, كينولوگيا سالاسىن دامىتۋ جانە ونىمەن بايلانىستى سالالاردىڭ وركەندەۋى جاڭا جۇمىس ورىندارىن اشۋعا, سالىقتىق تۇسىمدەردى ارتتىرۋعا جانە ەكونوميكالىق وسىمگە وڭ اسەرىن تيگىزەدى», دەپ اتاپ ءوتتى مينيسترلىك.
قازاقى يت تۇقىمدارى كۇنى اياسىندا دارىستەر, سەمينارلار, كورمەلەر مەن جارىستار ۇيىمداستىرىلادى. بۇل شارالار يت اسىراۋشىلار مەن كينولوگيالىق ۇيىمدارعا تاجىريبە الماسۋعا, قازاقى يت تۇقىمدارىنىڭ ەرەكشەلىكتەرىن زەرتتەۋگە جانە ولاردى ساقتاۋ ماسەلەسىن كوتەرۋگە مۇمكىندىك بەرەدى.
