شىعىس قازاقستاندا كونستيتۋتسيانىڭ 20 جىلدىعى كەڭىنەن اتالىپ وتەدى

وسكەمەن. 5 اقپان. بيىل شىعىس وڭىرىندە قازاقستان رەسپۋبليكاسى كونستيتۋتسياسىنىڭ 20 جىلدىعىنا وراي «جەتى جارعىدان كونستيتۋتسياعا دەيىنگى ەگەمەندى مەملەكەت» اتتى ۆەدومستۆوارالىق اكتسيا وتەدى. وعان وبلىستىڭ بارلىق دەڭگەيدەگى پروكۋراتۋرا, سوت, ادىلەت, مەملەكەتتىك قىزمەت ىستەرى جانە سىبايلاس جەمقورلىققا قارسى كۇرەس اگەنتتىگىنىڭ وكىلدەرى مەن ءماسليحات دەپۋتاتتارى قاتىسادى. بۇل تۋرالى egemen.kz ءتىلشىسى حابارلادى. «قر كونستيتۋتسياسىنىڭ 20 جىلدىعىن مەرەكەلەۋگە ارنالعان ماڭىزدى قوعامدىق شارالار وبلىس كولەمىندە جىل بويى وتكىزىلەدى. شارالاردىڭ نەگىزگى باسىمدىعى قۇقىقتىق مادەنيەتتى قالىپتاستىرۋ, مەملەكەت قىزمەتىندە زاڭنىڭ ۇستەمدىك ەتەتىنىن ناسيحاتتاۋعا باعىتتالادى. بۇل شارالارعا وڭىردەگى بارلىق قالالار مەن اۋداندارداعى جاستار دا, ارداگەرلەر دە قاتىسا الادى», – دەدى وبلىس اكىمىنىڭ ورىنباسارى جاقسىلىق ومار. شىعىس قازاقستان وبلىسىنىڭ اقپاراتتىق ورتالىعىندا باق وكىلدەرىمەن بريفينگ وتكىزگەن ج.وماردىڭ ايتۋىنشا, مەرەيتويدىڭ مەرەكەلىك باعدارلاماسى شەڭبەرىندە عىلىمي-تاجىريبەلىك كونفەرەنتسيالار, دارىستەر, سىنىپ ساعاتتارى, پاتريوتتار فورۋمى, مەرەكەلىك شەرۋلەر سياقتى كوپتەگەن شارالار ۇيىمداستىرىلادى. ال تامىز ايىندا شىعىسقازاقستاندىقتار جالپىحالىقتىق اكتسيا اياسىندا كونستيتۋتسيا كۇنىندە 16 جاسقا تولعان ازاماتتارعا جەكە كۋالىكتى تاپسىرۋ سالتاناتىنا كۋا بولادى. بۇل شارا وسكەمەننىڭ بارلىق تۇسىنان كورىنىپ تۇراتىن مەملەكەتتىك رامىزدەر ورنالاسقان بوتپاي تاۋىندا وتەدى. وندا جىلداعى ءداستۇر بويىنشا جاس مەملەكەتتىك قىزمەتكەرلەر دە سالتاناتتى تۇردە انت قابىلدايدى. سونداي-اق «مەن – قازاقستان رەسپۋبليكاسىنىڭ ازاماتىمىن!» اتتى وبلىستىق فلەش-موب اكتسياسى وتەدى. اكتسيا شەڭبەرىندە مەكتەپ جاسىنا دەيىنگى بالالار ءبىر مەزەتتە ەلىمىزدىڭ ءانۇرانىن شىرقايدى. دۋمان اناش. دەرەك: egemen.kz. سۋرەت: شىعىس قازاقستان وبلىسىنىڭ اقپاراتتىق ورتالىعى.