«ماتىبۇلاق» پوليگونىندا وتكەن تاجىريبەلىك ساباقتار بارىسىندا بمپ-2 جاياۋ اسكەر جاۋىنگەرلىك ماشيناسىنىڭ قارۋ-جاراعىنان شارتتى قارسىلاستىڭ ساۋىتتى تەحنيكاسى مەن قارۋلانعان كۇشتەرى جويىلدى.
قورعانىس مينيسترلىگىنىڭ ءباسپاسوز قىزمەتىنىڭ دەرەكتەرى بويىنشا, جاۋىنگەرلىك ءىس-شارانىڭ ماقساتى – مەرزىمدى قىزمەت ساربازدارىنىڭ تاكتيكالىق-ارنايى دايىندىق داعدىلارىن پىسىقتاپ, ۇرىس قيمىلدارى كەزىندە شتاتتىق قارۋدان اتۋعا ماشىقتانۋ.
اسكەري قىزمەتشىلەر بمپ-2 جاياۋ اسكەر جاۋىنگەرلىك ماشيناسىنىڭ شتاتتىق قارۋ-جاراعىنان شارتتى قارسىلاستىڭ 1 500 مەتر قاشىقتىقتاعى ساۋىتتى تەحنيكاسى مەن ءتىرى كۇشتەرىن يميتاتسيالايتىن نىسانداردى جويدى. بۇعان قوسا ساباق بارىسىندا اسكەري قىزمەتشىلەر اتىس دايارلىعى, جاۋىنگەرلىك ماشينانىڭ ۇرىستىق جيىنتىعىن جارتىلاي جۇكتەۋ, وقجاتار مەن تاسپالاردى جابدىقتاۋ نورماتيۆتەرىن ورىنداعان. سونداي-اق اسكەري قىزمەتشىلەر جاۋىنگەرلىك داعدىلاردى عانا ەمەس, ناقتى ۇرىس كەزىندە امان قالۋ تاسىلدەرىن دە ۇيرەنىپ, جاتتىققان. اتاپ ايتقاندا, قيراعان تەحنيكادان ەكيپاجداردى ەۆاكۋاتسيالاۋ جانە جارالانعان جاۋىنگەرلەرگە العاشقى مەديتسينالىق كومەك كورسەتۋ تاجىريبەسىن پىسىقتادى.
– تاجىريبەلىك اتىس ساباقتارىن ساۋاتتى ورىنداۋعا ءاربىر جاۋىنگەر اتىس ەرەجەلەرىن, قارۋ-جاراقتىڭ ماتەريالدىق بولىگىن جانە جاياۋ اسكەر جاۋىنگەرلىك ماشيناسىن قولدانۋ تاكتيكاسىن مۇقيات ءبىلۋى قاجەت. ساباق كەزىندە ساربازدار كليماتى قاتال قىسقى جاعدايدا تاباندىلىق تانىتىپ, قويىلعان بارلىق مىندەتتى ءساتتى ورىندادى, – دەدى شابۋىلداۋ باتالونىنىڭ سەرجانتى ءانۋار مولدابەكوۆ.
سونداي-اق سەرجانتتىڭ ايتۋىنشا, جاۋىنگەرلىك دايىندىق جوعارى دەڭگەيدە وتكەن. وندا اسكەري قىزمەتشىلەر ءوزارا ءىس-قيمىل جاساۋ داعدىلارى مەن ناقتى جاۋىنگەرلىك جاعدايدا تاكتيكالىق تاسىلدەردى قولدانۋ قابىلەتىن جاقسى ءارى دەر كەزىندە كورسە بىلگەن. تاجىريبەلىك ساباقتارعا توقسانعا جۋىق اسكەري قىزمەتشى قاتىسقان.
