فوتو: اقوردا
«قازاقستان جاپونيامەن ستراتەگيالىق سەرىكتەستىكتى دامىتۋعا ەرەكشە ءمان بەرەدى. ەكى ەل اراسىندا دوستىق پەن ءوزارا تۇسىنىستىككە نەگىزدەلگەن تىعىز ىنتىماقتاستىق ورناعان. ءبىز «قازاقستان مەن جاپونيانىڭ اراسى الىس بولعانىمەن, دوستىعىمىز بەرىك» دەپ ايتامىز», دەدى مەملەكەت باسشىسى.
قاسىم-جومارت توقاەۆ مەملەكەتتەر اراسىنداعى ساۋدا-ەكونوميكالىق, ينۆەستيتسيالىق جانە عىلىمي-تەحنيكالىق بايلانىستاردى كەڭەيتۋگە ايتارلىقتاي الەۋەت بار ەكەنىنە توقتالدى. پرەزيدەنت قازاقستان ەكونوميكاسىنا تارتىلعان جاپون ينۆەستيتسياسىنىڭ كولەمى 8 ميلليارد دوللاردان اسقانىن ايتتى. سونداي-اق ەلىمىزدىڭ شەتەلدىك ينۆەستورلارعا, سونىڭ ىشىندە جاپونيانىڭ وزىق كومپانيالارىنا قولايلى جاعداي جاساۋعا دايىن ەكەنىن اتاپ ءوتتى.
ارناۋلى كەڭەسشى پرەزيدەنتكە جاپونيا پرەمەر-ءمينيسترى شيگەرۋ يشيبانىڭ ىستىق ىقىلاسىن جەتكىزدى, سونىمەن قاتار توكيونىڭ قازاق-جاپون سان قىرلى قارىم-قاتىناسىن ودان ءارى جانداندىرۋعا بەيىلدىگىن راستادى.
قاسىم-جومارت توقاەۆ پەن اكيحيسا ناگاشيما جوعارى دەڭگەيدەگى ساياسي ديالوگتى نىعايتۋدىڭ ماڭىزىن اتاپ ءوتىپ, ساۋدا, ەنەرگەتيكا, كولىك, ءبىلىم بەرۋ, مادەني-گۋمانيتارلىق سالالارىنداعى, سونداي-اق كليماتتىق وزگەرىس ماسەلەلەرى بويىنشا ەكىجاقتى ءوزارا ىقپالداستىقتى تەرەڭدەتۋدىڭ پەرسپەكتيۆاسىن تالقىلادى.
