كەلىسسوزدە ەكى ەل اراسىنداعى ساۋدا-ەكونوميكالىق, عىلىمي-تەحنيكالىق جانە مادەني-گۋمانيتارلىق ىنتىماقتاستىقتى كەڭەيتۋ جوسپارى ءسوز بولدى. ونەركاسىپ كووپەراتسياسى, اۋىل شارۋاشىلىعى, ەنەرگەتيكا, كولىك ونەركاسىبى جانە باسقا دا سالالارداعى ءوزارا ءىس-قيمىلدى نىعايتۋ جونىندەگى مىندەتتەردى جۇزەگە اسىرۋعا نازار اۋداردى.
رەسەي – قازاقستاننىڭ باستى ساۋدا سەرىكتەستەرىنىڭ ءبىرى. وتكەن جىلدىڭ 11 ايىندا ءوزارا ساۋدا كولەمى 24,2 ملرد دوللارعا جەتتى. ەكى مەملەكەت باسشىلارى اراسىنداعى تاۋار اينالىمىن 30 ملرد دوللارعا دەيىن جەتكىزۋ جونىندەگى ۋاعدالاستىققا قول جەتكىزۋ ماقساتىندا تاسىمالداناتىن تاۋارلار اتالىمىن كەڭەيتۋ ماڭىزدى.
كەزدەسۋدە ەكونوميكالىق ىنتىماقتاستىقتىڭ 2021–2025 جىلدارعا ارنالعان كەشەندى باعدارلاماسىن ىسكە اسىرۋدىڭ وڭ ناتيجەسىن اتاپ ءوتىپ, الداعى كەزەڭگە جاڭارتىلىپ ازىرلەنەتىن باعدارلامانى ناقتىلادى. بىلتىر 10 ايدىڭ قورىتىندىسى بويىنشا اۋىل شارۋاشىلىعى ونىمدەرىنىڭ اينالىمى 5%-عا ءوسىپ, 3,2 ملرد دوللاردان اسقان. ونەركاسىپ كووپەراتسياسى سالاسىندا بۇگىنگى تاڭدا 18,6 ملرد دوللارلىق بىرلەسكەن 99 جوبا ىسكە اسىرىلدى. ەلىمىزدە جاڭا بىرلەسكەن جوبالاردى جۇزەگە اسىرۋ مۇمكىندىكتەرى قارالدى.
«ەكى ەل اراسىنداعى ءوزارا ينۆەستيتسيالار كولەمى بىرقالىپتى دامىپ جاتىر. كەيىنگى 20 جىلدا رەسەيلىك ينۆەستورلار 25,2 ملرد دوللار كولەمىندە تىكەلەي ينۆەستيتسيا سالدى. ءوز كەزەگىندە وتاندىق كومپانيالار وسى كەزەڭدە رەسەي ەكونوميكاسىنا 8,7 ملرد دوللار ينۆەستيتسيا باعىتتادى. وتكەن جىلدىڭ توعىز ايىندا عانا رەسەيلىك ينۆەستيتسيالاردىڭ جالپى اعىنى 43,7%-عا ءوسىپ, 22,8 ملرد دوللارعا جەتتى. قازىر ەلىمىزدە 23 مىڭنان استام رەسەيدىڭ ۇلەسى بار كومپانيا جۇمىس ىستەيدى. جالپى, ءبىز جاڭا وندىرىستەر قۇرۋعا مۇددەلىمىز. رەسەيلىك كومپانيالارعا قازاقستاندا بىرلەسكەن ينۆەستيتسيالىق جوبالاردى ىسكە اسىرۋعا بەلسەندى قاتىسۋدى ۇسىنامىز», دەدى ۇكىمەت باسشىسى ولجاس بەكتەنوۆ.
قازاقستان ارقىلى ترانزيتتىك تاسىمالداۋ جوعارى قارقىنمەن دامىپ كەلەدى. وسىعان بايلانىستى اۆتوكولىك جانە تەمىرجول ينفراقۇرىلىمىن دامىتۋعا, سونداي-اق سۋ كولىگى سالاسىندا جاڭا بالامالى باعىتتار اشۋعا كوڭىل ءبولىنىپ جاتىر. رەسەي پرەمەر-ءمينيسترى قازاقستاننىڭ ەۋرازياداعى توعىز جولدىڭ تورابىنا اينالاتىنىنا سەنىمدى ەكەنىن جەتكىزدى.
ء«بىز سولتۇستىك-وڭتۇستىك حالىقارالىق ءدالىزىنىڭ دامۋىنا ۇلكەن كوڭىل بولەمىز. بولاشاقتا ول بۇكىل ەۋرازيالىق ءوڭىر مەملەكەتتەرىنىڭ مۇددەسى ءۇشىن جاھاندىق كولىك ارتەرياسىنا اينالاتىنىنا سەنىمدىمىن. قازاقستان ەۋرازياداعى توعىز جولدىڭ تورابىنا اينالادى», دەدى م.ميشۋستين.
ولجاس بەكتەنوۆ مەملەكەت باسشىلارى قاسىم-جومارت توقاەۆ پەن ۆلاديمير ءپۋتيننىڭ بىرلەسكەن كۇش-جىگەرىنىڭ ارقاسىندا ەكىجاقتى ىنتىماقتاستىق ساپالى جاڭا دەڭگەيگە كوتەرىلگەنىن اتاپ كورسەتتى. ماڭىزدى مىندەت – جوعارى دەڭگەيدە قول جەتكىزىلگەن ۋاعدالاستىقتاردىڭ ءىس جۇزىندە ورىندالۋىن قامتاماسىز ەتۋ. قازاقستان ۇكىمەتى تىعىز ءوزارا ءىس-قيمىل جاساۋعا جانە بارلىق سالادا ىنتىماقتاستىقتى دامىتۋعا دايىن ەكەنىن ايتتى.
«قازاقستان – ءبىزدىڭ ستراتەگيالىق سەرىكتەسىمىز ءارى وداقتاسىمىز. ءبىزدىڭ قارىم-قاتىناسىمىز دوستىق, تاتۋ كورشىلىك, ءوزارا سىيلاستىق جانە ءبىر-ءبىرىنىڭ مۇددەلەرىن ەسكەرۋ قاعيداتتارىنا نەگىزدەلگەن. ۆلاديمير ءپۋتيننىڭ قازاقستانعا مەملەكەتتىك ساپارى بارىسىندا قارىم-قاتىناسىمىزدى ودان ءارى دامىتۋ جونىندە ماڭىزدى ۋاعدالاستىققا قول جەتكىزىلدى. ەكى ەل ۇكىمەتتەرىنىڭ مىندەتى – كوشباسشىلارىمىز قول جەتكىزگەن كەلىسىمدەردىڭ مۇلتىكسىز ورىندالۋىن قامتاماسىز ەتۋ», دەپ اتاپ ءوتتى م.ميشۋستين.
كەلىسسوزدەر ناتيجەسىندە تاراپتار ستراتەگيالىق ارىپتەستىكتى نىعايتۋعا جانە بارلىق باعىت بويىنشا بىرلەسكەن جۇمىستى جالعاستىرۋعا كەلىستى.
