ۇلتتىق اكادەميالىق كىتاپحانادا اقىن, اۋدارماشى, فيلولوگيا عىلىمدارىنىڭ كانديداتى, ەۋرازيا ۇلتتىق ۋنيۆەرسيتەتىنىڭ پروفەسسورى وڭايگۇل تۇرجاننىڭ مەرەيلى بەلەسىندە «اعاشتار ءۇنسىز وسەدى» اتتى جاڭا كىتابىنىڭ تۇساۋكەسەر ءراسىمى ءوتتى. ءىس-شاراعا ءبىر توپ زيالى قاۋىم مەن ولەڭسۇيەر وقىرمان قاتىستى.
القالى جيىنعا مودەراتورلىق ەتكەن ەربول الشىنباي اڭگىمەنىڭ القيسساسىندا وڭايگۇل اقىننىڭ دارا بولمىسىن اتاپ ءوتىپ, قوناقتارعا ءسوز بەردى.
العاشقى بولىپ بەلگىلى اقىن, ادەبيەتتانۋشى جانات اسكەربەكقىزى جاڭا جيناق جونىندە بايانداماسىن وقىدى.
«قازاق پوەزياسىندا وڭايگۇل تۇرجان ەسىمى كەڭىنەن تانىس. ول XX عاسىردىڭ 70-80 جىلدارىندا قازاق پوەزياسىنداعى بۋىنعا جاڭا ۇنىمەن كەلىپ قوسىلعان قالام يەسى. العاشقى جيناعى «سامال» دەگەن اتپەن 1983 جىلى جارىق كورسە, «شەر قالا» جيناعى 1999 جىلى, «تەڭىزدەر دە شولدەيدى» 2003 جىلى شىعىپ, ودان بەرى دە بىرقاتار جىر كىتابى ومىرگە كەلدى. بۇل جيناقتاردىڭ بارلىعى دا ەشكىمگە ۇقسامايتىن, پوەزياداعى سونى بەينەلەۋدىڭ تاماشا ۇلگىلەرى بولدى دەسەك, ارتىق ايتقاندىق ەمەس», دەدى جانات اسكەربەكقىزى.
ءوز كەزەگىندە پرەزيدەنت كەڭەسشىسى, اكادەميك, جۋرناليست باۋىرجان ومار ۇلى اقىن شىعارماشىلىعى جونىندە جان-جاقتى قاۋزاپ, پىكىر ءوربىتتى.
تۇساۋكەسەر بارىسىندا مادەنيەت جانە اقپارات ءمينيسترى ايدا بالاەۆانىڭ قۇتتىقتاۋ حاتى وقىلدى.
ء«سىزدى مەرەيلى 70 جاسىڭىزبەن شىن جۇرەكتەن قۇتتىقتايمىن. ولەڭسۇيەر قاۋىم ءوزىڭىزدى تالعامى بيىك, ءتىلى شۇرايلى, ويى قۇنارلى باسقالارعا ۇقسامايتىن وزىندىك كوركەم الەمى بار اقىن رەتىندە جاقسى بىلەدى. تانىمى تەرەڭ عىلىمي ەڭبەكتەرىڭىز بەن تاعىلىمدى تۋىندىلارىڭىز ارقىلى ۇلتتىڭ رۋحانياتىن نىعايتىپ, وسكەلەڭ ۇرپاققا وشپەس مۇرا قالدىرىپ كەلەسىز. جان تولعانىسىڭىزدان جارىق كورىپ, بۇگىن تۇساۋى كەسىلگەلى وتىرعان «اعاشتار ءۇنسىز وسەدى» اتتى جاڭا ەڭبەگىڭىز دە ويلى وقىرماننىڭ جۇرەگىنە جول تاباتىنىنا سەنىمدىمىن. الداعى ۋاقىتتا دا ەڭبەگىڭىزدىڭ جەمىسىن كورىپ, مەرەيىڭىز ارتا بەرسىن!» دەلىنگەن قۇتتىقتاۋ حاتتا.
مۇنان سوڭ جىردان شاشۋ شاشىلىپ, كوركەمسوز وقۋشى جاستار اقىننىڭ «بوزجىرا» اتتى ولەڭىن قوناقتارعا پاش ەتتى. تۋعان جەردىڭ تامىرىنا, بابا تاريحىنا قان جۇگىرتكەن ەڭسەلى جىر كەلگەن قاۋىمنىڭ رۋحىن ءبىر سىلكىپ الدى.
جازۋشى-دراماتۋرگ, مەملەكەتتىك سىيلىقتىڭ لاۋرەاتى روزا مۇقانوۆا دا اقىن تابيعاتى تۋرالى ەستەلىكتەرىمەن ءبولىسىپ, ولەڭ شۋماقتارىن وقىپ بەرسە, تەلەجۇرگىزۋشى دانا نۇرجىگىت قالامگەردى ادام جانىنىڭ عالىمى ەكەنىن ايتىپ, جۇرەكجاردى لەبىزىن بايان ەتتى.
«1983 جىلى الماتىدا «جىگەر» دەگەن فەستيۆال ءوتىپ, وڭايگۇلمەن سول جەردە تانىسقان ەدىك. سول جىلداردان ءبىر-بىرىمىزگە تىلەكتەس بولىپ, قولداۋ ءبىلدىرىپ كەلەمىز. تۇرسىن جۇرتباي اعامىز «وڭايگۇل بۇگىنگى اقىنداردىڭ ەشقايسىسىنا دا ۇقسامايدى» دەگەن پىكىر ايتقان ەكەن. راسىندا, اقىن بولمىسى فاريزاعا دا, مارفۋعا, كۇلاشقا دا ۇقسامايدى, وڭايگۇل – وڭايگۇل. وڭايگۇلدىڭ بالا كۇنگى جىرلارىنا قاراپ وتىرساڭىز, ەسكىنىڭ كوزى سەكىلدى, ال كەيىنگى تسيۆيليزاتسيامەن بىرگە دامىعان ولەڭدەرى وقىرمان جۇرەگىنە اسەر ەتەدى», دەدى اقىن, مەملەكەتتىك سىيلىقتىڭ لاۋرەاتى عالىم جايلىباي.
سونداي-اق شارا بارىسىندا باق پەن ءبىلىم سالاسىنداعى ارىپتەستەرى ا.ءشارىپ, ش.قازىعۇل, ب.جەكسەنباي, ق.ساق, ب.باباجان ۇلى, ا.كەڭشىلىك ۇلى, ت.ب. پىكىرلەرىن ورتاعا سالدى.
ادەبي جيىندا اقىننىڭ «اعاشتار ءۇنسىز وسەدى» اتتى كىتابىنىڭ تۇساۋى كەسىلىپ, وقىرمان قاۋىمعا جول تارتتى. وسىلايشا, جاڭاشىلدىقتىڭ قىنىنان سۋارىلعان, ەسكىنىڭ كيەسى جۇققان دەگدار پوەزيا بولاشاق كەمەسىنە بەت الدى.
