سۋرەت: sport.insure
1963–2020 جىلدار ارالىعىندا بۇل جارىس فەدەراتسيا كۋبوگى دەپ اتالاتىن. عاسىرلار توعىسىندا ءوز اتاۋىن بيللي دجين كينگ كۋبوگى دەپ وزگەرتتى. بۇل ەسىم جانكۇيەرلەرگە جاقسى تانىس. بيللي وتكەن عاسىردىڭ 60-70 جىلدارى الەمدەگى ەڭ ۇزدىك تەننيسشىلەردىڭ ساناتىندا بولدى. ۋيمبلدوندا – 6, US Open دوداسىندا – 4, اۋستراليانىڭ اشىق بىرىنشىلىگى مەن رولان گارروستا ءبىر-ءبىر رەتتەن توپ جاردى. WTA تۋرنيرلەرىندە 67 مارتە تەڭدەسسىز دەپ تانىلدى. وسىنداي وراسان زور تابىسىنىڭ ارقاسىندا الەمنىڭ ءبىرىنشى راكەتكاسى اتاندى. كينگتىڭ جۇپتىق سايىستاعى ناتيجەسى تىپتەن كەرەمەت. «ۇلكەن دۋلىعا» ساناتىنداعى باسەكەلەردە 18 رەت باس جۇلدەنى ولجالادى.
كورتپەن قوش ايتىسقاننان كەيىن بيللي دجين كينگ قوعام قايراتكەرى رەتىندە تانىلدى. سپورتتاعى ايەلدەردىڭ تەڭدىگى جولىندا كۇرەستى. وسىنىڭ بارلىعىن ەسكەرگەن سالا باسشىلارى اتالعان جارىستى كينگتىڭ ەسىمىمەن اتاۋدى قۇپ كوردى.
بيللي دجين كينگ (فەدەراتسيا) كۋبوگىن ەڭ كوپ اقش قۇراماسى ولجالادى. امەريكالىقتاردىڭ 18 تۋرنيردە اسىعى الشىسىنان ءتۇستى. چەحيا (چەحوسلوۆاكيانى قوسا العاندا) 11 دودادا دارالاندى. اۋستراليا جەتى رەت الدىنا جان سالمادى. يسپانيا, رەسەي, يتاليا وزدەرىنىڭ مىقتىلىعىن بەس باسەكەدە مويىنداتتى. فرانتسيانىڭ ءۇش مارتە مەرەيى ۇستەم بولدى. گەرمانيا ەكى جارىستا جەڭىسكە جەتتى. بەلگيا, كانادا, سلوۆاكيا, شۆەيتساريا, وار ءبىر-ءبىر رەت باس جۇلدەنى ەنشىلەدى. بىلتىرعى جىلى يسپانيانىڭ مالاگا قالاسىندا وتكەن باسەكەدە يتاليا قۇراماسىنا تەڭ كەلەر كوماندا تابىلمادى. اپەننين تۇبەگىنىڭ ارۋلارى فينالدىق ويىندا سلوۆاكيانى سان سوقتىردى.
