ۇلتتار بىرلىگى ومىردەن وسىلاي كورىنىس تابۋدا

قازىر ەلىمىزدىڭ تۇكپىر-تۇكپىرىندە قازاقستان حالقى اسسامبلەياسىنىڭ 20 جىلدىعىنا وراي ءتۇرلى ءىس-شارالار ءوتىپ جاتىر. سونداي مادەني يگى ءىس جۋىردا الماتى قالالىق سوتىندا دا ۇيىمداستىرىلدى. «ماڭگىلىك ەل: ءبىر ەل – ءبىر تاعدىر» اتتى شاراعا الماتى قالاسىنىڭ بارلىق اۋدانىنىڭ اكىمشىلىك, ەكونوميكالىق, قىلمىستىق سوتتارىنىڭ ماماندارى تەگىس قاتىستى. مۇنداي شارا سوت ماماندارىنا ەلىمىزدەگى ءتۇرلى ۇلتتار مەن ۇلىستاردىڭ ادەت-عۇرپىن تانىپ-بىلۋىنە كومەكتەسەدى. ءارى قازاق ەلىندە تاتۋ-ءتاتتى تۇرىپ جاتقان ءتۇرلى حالىقتار اراسىنداعى بەرەكە-بىرلىكتى بەكىتە تۇسۋگە دە سەپ. وسىنداي ماقساتتا ۇيىمداستىرىلعان شارادا مەدەۋ اۋدانىنىڭ سوت قىزمەتكەرلەرى – ورىس ۇلتىنىڭ, ناۋرىزباي اۋدانى – ۇيعىر ۇلتىنىڭ, بوستاندىق اۋدانى – چەشەن ۇلتىنىڭ, المالى اۋدانى – گرۋزين ۇلتىنىڭ, مەدەۋ اۋدانى تاجىك ۇلتىنىڭ سالت-داستۇرلەرىن ساحنالىق كورىنىستەر ارقىلى پاش ەتتى. ءان-جىر مەن كوڭىلدى بيگە دە كەزەك ءتيدى. شارا بارىسىندا ءسوز العان الماتى قالالىق سوتىنىڭ توراعاسى اقجان ەشتاي ارىپتەستەرىن اسسامبلەيانىڭ 20 جىلدىعىمەن قۇتتىقتادى. جاڭا قۇرىلعان ناۋرىزباي اۋداندىق سوتىنىڭ قىزمەتكەرلەرى اسسامبلەيانىڭ 20 جىلدىعىنا ارنالعان مەرەكەلىك جيىنعا ەرەكشە دايىندالعان ەكەن. ۇيعىر ۇلتىنىڭ «قىز ۇزاتۋ» جانە «كەلىن ءتۇسىرۋ» ءداستۇرىن ساحنالاعاندا قول سوقپاعان ادام قالمادى. سەبەبى, سىرتتان قاراعان ادامعا ولاردىڭ سوت قىزمەتكەرلەرى ەكەنى ەش بايقالمايدى. قۇددى, تەاتر ارتىستەرى سەكىلدى. اسىرەسە, كۇيەۋ جىگىتتىڭ بەينەسىن سومداعان جىگەر ازىمباەۆ پەن قىز قۇربىسىنىڭ رولىندەگى گۇلميرا قالىمبەتوۆانىڭ ونەرى جۇرت كوڭىلىنەن شىقتى. باس قۇدانى سومداعان ەركىن ەسەنباەۆ تا ەلدىڭ رازىلىعىنا بولەندى. ءتىپتى, ناۋرىزبايلىق سوت ماماندارى ۇيعىر ۇلتىنىڭ ساز اسپاپتارىندا ويناپ, جيىلعان كوپتى تاڭعالدىردى. – ەلدىڭ بىرلىگى مەن قوعامنىڭ تۇراقتىلىعىنان ارتىق بايلىق جوق. بۇل – ەلباسىمىز ەڭبەگىنىڭ جەمىسى. الايدا, ونى ءارى قاراي دامىتۋ, ەلىمىزدەگى ءتۇرلى ەتنوس­تار اراسىنداعى دوستىق پەيىل, اعايىندىق نيەتكە دانەكەر بولار شارالارعا اتسالىسۋ – ارقايسىمىزدىڭ ازاماتتىق پارىزىمىز. سول سەبەپتەن دە بۇل مەرەكەگە اي بۇرىن دايىندالدىق. ول ەڭبەگىمىز اقتالدى, – دەيدى ناۋرىزباي اۋداندىق سوتىنىڭ توراعاسى ۇلان ەسبەرگەنوۆ. جيىن سوڭىندا مەرەكەلىك شاراعا قوناق رەتىندە قاتىسقان الماتىلىق ءتۇرلى ەتنوس وكىلدەرى ءسوز الىپ, يگى ىسكە ۇيىتقى بولعان ۇيىمداستىرۋشىلارعا العىس ءبىلدىردى. سانسىزباي جاكەن. الماتى.