فوتو: ۆلاديمير ترەتياكوۆ
دارىگەرلەر 45 جاستاعى ەر ادامنىڭ ميى ولگەنىن انىقتاعاننان كەيىن, تۋىستارى قايتىس بولعان الماتى وبلىسىنىڭ تۋماسىنىڭ اعزالارىن الۋعا رۇقسات بەرگەن. ولاردىڭ كەلىسىمىنىڭ ارقاسىندا قازاقستاننىڭ 4 بىردەي ازاماتىنىڭ ءومىرى اجالدان اراشالاناتىن بولسا, ولاردىڭ اراسىندا «ديلاتاتسيالىق كارديوميوپاتيا (ۋىتتى)» دەيتىن اۋىر جۇرەك دەرتىنە دۋشار بولعان 43 جاستاعى ەر ادام دا بار. ناۋقاس 5 جىل بويى ەنەرگەتيكالىق سۋسىندارعا مولشەردەن تىس قۇمارلانىپ, ءدارى-دارمەك تەراپياسىن قابىلدامايتىن جۇرەك قىزمەتى جەتكىلىكسىزدىگىنىڭ سوڭعى ساتىسىنا جەتكەن.
ناۋقاستا ازداعان دەنە قيمىلىنىڭ وزىندە اۋا جەتىسپەۋشىلىگى, جاتقان كەزدە ەنتىگۋى ءورشىپ, تەز شارشاۋ مەن جالپى السىزدىك مازالاعان. دەنساۋلىعىنىڭ ناشارلاپ بارا جاتقانى 2023 جىلدىڭ جەلتوقسانىنان بايقالا باستاعان.
«ەلىمىزدە كارديوحيرۋرگيا مەن كارديورەانيماتسيانىڭ دامۋ دەڭگەيى جۇرەكتى ترانسپلانتاتسيالاۋ وپەراتسيالارىندا وڭ ناتيجەلەرگە قول جەتكىزۋگە مۇمكىندىك بەرەدى. يۋري ۆلاديميروۆيچ باستاعان UMC كومانداسىنا كومەك پەن قولداۋ كورسەتكەنى ءۇشىن العىسىمىز شەكسىز. ورگانداردى ترانسپلانتاتسيالاۋ بويىنشا وپەراتسيالار مەديتسينا قىزمەتكەرلەرىنىڭ جوعارى بىلىكتىلىگىن تالاپ ەتەدى», دەيدى كارديولوگيا جانە ىشكى اۋرۋلار عزي باسقارما توراعاسى مارات پاشيموۆ.
مارات ورىنباسار ۇلى دونوردىڭ تۋىسقاندارىنا دا العىسىن بىلدىرە وتىرىپ, دونورلىققا ءوز ەركىمەن كەلىسىم بەرۋ, ادامداردىڭ ءومىرىن ساقتاپ قالۋعا دايىن بولۋ – ادامگەرشىلىك پەن مەيىرىمدىلىكتىڭ ۇلگىسى ەكەندىگىن, اعزالارىن الۋعا كەلىسىم بەرگەن دونوردىڭ تۋىستارىنىڭ ءىسى زور ساۋاپقا يە ەكەندىگىن اتاپ ءوتتى.
«ناۋقاستىڭ جاعدايى وپەراتسيانىڭ اۋىرلىعىنا سايكەس قالىپتى. ديناميكا تۇراقتى. ونىڭ جولى بولىپ, وعان دونور تابىلدى. كەيبىرەۋلەر اعزانى جىلدار بويى كۇتۋى مۇمكىن, بىراق ولار ۇزاق كۇتە المايدى. مۇنىڭ ءبارى سايكەس دونوردىڭ بولۋىنا بايلانىستى. پاتسيەنتتەردىڭ كوپشىلىگى, وكىنىشكە وراي, ترانسپلانتاتسياعا جەتپەي قايتىس بولادى. جۇرەك ترانسپلانتاتسياسىنسىز ءومىر ءسۇرۋ ۇزاقتىعى تىم قىسقا. اۋىر جۇرەك اۋرۋلارى تەز ءورشيدى جانە شۇعىل ەمدەۋدى قاجەت ەتەدى», دەيدى كلينيكا باسشىسى.
ينستيتۋتتىڭ كارديوحيرۋرگيا بولىمشەسىنىڭ مەڭگەرۋشىسى رۇستەم تولەۋتاەۆ: «جۇرەك الماستىرۋ – اسا كۇردەلى وپەراتسيالاردىڭ ءبىرى, الايدا ءبىزدىڭ جيناقتاعان تاجىريبەمىز, ماشىعىمىز, كلينيكامىزدىڭ تەحنيكالىق جاراقتاندىرىلۋى ولاردى جوعارى دەڭگەيدە ورىنداۋعا مۇمكىندىك بەرەدى», دەيدى.
ەرەكشە اتاپ وتەرلىك ءجايت, مايىتتىك دونوردان ەكى بۇيرەگى, وكپەسى, مەن كوز قابىعى الىندى. بۇيرەك جەتىسۋ وبلىسىنىڭ تۇرعىنى 17 جاستاعى ناۋقاسقا ا.سىزعانوۆ اتىنداعى ۇلتتىق حيرۋرگيا عىلىمي ورتالىعىندا جانە استانالىق 18 جاستاعى پاتسيەنتكە University Medical Center – دە ترانسپلانتاتسيالاندى, وكپە – UMC-تە قوستانايلىق 43 جاستاعى پاتسيەنتكە, كوز قابىعى كەراتوپلاستيكاسى – ەكى رەتسيپيەنتكە ترانسپلانتاتسيالاندى.
قازاقستاندا 2025 جىلعى 10 قاڭتاردا جۇرەك ترانسپلانتاتسياسىنىڭ كۇتۋ پاراعىندا 140 ەرەسەك ادام مەن 5 بالا تۇر.
