فوتو: polisia.kz
بيىل ىشكى ىستەر ورگاندارى «پروفيلاكتيكا جىلى: پوليتسيا زاڭ مەن ءتارتىپ كۇزەتىندە» قاعيداتى اياسىندا جۇمىس اتقارادى.
ۇكىمەتتىڭ كەڭەيتىلگەن وتىرىسىندا ايتىلعان «زاڭ مەن ءتارتىپ» قاعيداتى ءىىم بەلگىلەگەن جۇمىس باعىتىمەن قابىسىپ جاتىر.
ءىىم-دە وتكەن كەڭەس بارىسىندا بەلگىلەنگەن جۇيە نەگىزىندە ەلدەگى قاۋىپسىزدىكتى قامتاماسىز ەتۋگە قاتىستى نەگىزگى ماسەلەلەر تالقىلاندى.
ىشكى ىستەر ءمينيسترى ەرجان سادەنوۆ قىلمىستىڭ الدىن الۋ جونىندەگى شارالاردى ىسكە اسىرۋ, ونىڭ ىشىندە جەكە پروفيلاكتيكالىق ءىس-شارالاردى كۇشەيتۋ, قىلمىس جاساۋعا بەيىم ادامداردى ەرتە كەزەڭدە جۇيەلى تۇردە انىقتاۋ بويىنشا مىندەتتەر جۇكتەدى. جۇرتشىلىقتى زاڭ بۇزۋشىلىقتىڭ الدىن الۋ سالاسىنا بەلسەندى تارتۋ قاجەت ەكەنىن العا تارتتى.
ۆەدومستۆو باسشىسى مۇددەلى ورگاندارمەن بىرلەسىپ مەكتەپتەردە, كوللەدجدەردە جانە جوعارى وقۋ ورىندارىندا وقيتىن جاستاردىڭ بويىندا پاتريوتيزم, جاۋاپكەرشىلىك جانە مىنەز-ق ۇلىق مادەنيەتىن قالىپتاستىرۋ بويىنشا اقپاراتتىق-ناسيحاتتاۋ جۇمىسىن ۇيىمداستىرۋدى تاپسىردى.
«ۇكىمەت وتىرىسىندا ينفراقۇرىلىمدىق دامۋ, تسيفرلىق تەحنولوگيالاردى ەنگىزۋ جانە ەنەرگەتيكا سالاسىنىڭ ىلگەرىلەۋى دە نەگىزگى باعىت رەتىندە اتاپ ءوتىلدى. سوندىقتان جۇك تاسىمالىنىڭ قاۋىپسىزدىگىن قامتاماسىز ەتۋدى, مۇناي ونىمدەرىن ۇرلاۋدىڭ جانە ولاردى شەتەلگە زاڭسىز اكەتۋدىڭ قىلمىستىق سحەمالارىن انىقتاۋ بويىنشا جۇمىستى جانداندىرۋدى تاپسىرامىن», دەدى مينيستر.
سونداي-اق ەرجان سادەنوۆ قىزمەت باسشىلارى مەن وڭىرلىك بولىنىستەر جەتەكشىلەرىنىڭ الدىنا ينتەرنەت-الاياقتىققا قارسى ءىس-قيمىل, تسيفرلىق جوبالاردى دامىتۋ, ءتيىستى كوشى-قوندى باقىلاۋدى مىندەتتى تۇردە قامتاماسىز ەتە وتىرىپ, شەتەلدىك جۇمىس كۇشىن تارتۋعا بايلانىستى راسىمدەردى جاقسارتۋ, ازاماتتاردىڭ وتىنىشتەرىمەن جۇمىس تيىمدىلىگىن ارتتىرۋ بويىنشا بىرقاتار ناقتى مىندەتتەر قويدى.
