ۇزدىكتەر ساناتىنان تىس قالدى
مەلبۋرندە ەلىمىزدىڭ تەننيسشىلەرى اراسىنان ەلەنا رىباكينا ەڭ ءتاۋىر ناتيجە كورسەتتى. الەمدىك رەيتينگتە جەتىنشى ورىندا تۇرعان جەرلەسىمىز العاشقى اينالىمداردا اۋستراليالىق ەمەرسون دجونس پەن امەريكالىق يۆا ءيوۆيچتى جولىنان ىعىستىردى. ۇلكەن الامانعا ەندى عانا قوسىلعان جاس ويىنشىلار ساقا سپورتشىعا جارىتىپ قارسىلىق كورسەتە العان جوق. ە.رىباكينا 16 جاسار دجونستى 6:1, 6:1 ەسەبىمەن تاس-تالقانىن شىعارسا, 17 جاستاعى ءيوۆيچتى 6:0, 6:3 ەسەبىمەن ويسىراتا ۇتتى. ءۇشىنشى كەزەڭدە ونىڭ جولى WTA رەيتينگىندە 33 ساتىعا جايعاسقان دايانا ياسترەمسكايامەن قيىستى. ۋكراينانىڭ وكىلى بىلتىر ءدال وسى جارىستا جارتىلاي فينالعا دەيىن جەتكەن. دەگەنمەن ەلەناعا ياسترەمسكايانى ەڭسەرۋ ايتارلىقتاي قيىندىق تۋعىزعان جوق – 6:3, 6:4.
ءتورتىنشى كەزەڭدە ەلەنا مەديسون كيزبەن كەزدەستى. 29 جاستاعى اقش تەننيسشىسى قازىرگى كەزدە ۇزدىكتەر تىزىمىندە 17-ورىندا تۇر. كەزىندە ول US وpen دوداسىنىڭ فينالى, رولان گارروس پەن اۋستراليا اشىق بىرىنشىلىگىنىڭ جارتىلاي فينالىندا وينادى. WTA تۋرنيرلەرىن سان مارتە ۇتتى. بۇل جولى ەلەنا ءوز دەڭگەيىندە ونەر كورسەتە المادى. باسەكە 6:3, 1:6, 6:3 ەسەبىمەن كيزدىڭ پايداسىنا شەشىلدى. ءسويتىپ, ەلەنا رىباكينا شيرەك فينالعا شىعا المادى.
كەيىنگى كەزدە قارقىنىن كۇرت كۇشەيتكەن 30 جاستاعى يۋليا پۋتينتسەۆا بۇل كۇندەرى WTA رەيتينگىندە 23-ورىندا. بۇل – ونىڭ سپورتتىق مانسابىنداعى ەڭ ۇزدىك كورسەتكىش. تىپتەن, ءوزىنىڭ جالىنداپ تۇرعان شاعىندا يۋليا مۇنداي بيىككە كوتەرىلگەن جوق. سول سەبەپتى دە ءبىز ەلىمىزدىڭ ەكىنشى راكەتكاسى الىسقا شابادى دەپ توپشىلادىق. الايدا ول ءۇشىنشى اينالىمدا ءسۇرىندى. باستاپقى باسەكەلەردە ارمەنيالىق ەلينا اۆانەسيان (WTA №41) مەن قىتايلىق چجان شۋايعا (WTA №204) شاڭ قاپتىرعان پۋتينتسەۆا رەسەيلىك داريا كاساتكينانىڭ (WTA №10) وسال تۇسىن تابا المادى – 5:7, 1:6.
ەلىمىزدىڭ ەرلەر قۇراماسىنىڭ مۇشەلەرى جاسىل قۇرلىقتا تىم سۇرەڭسىز ونەر كورسەتتى. جارىس جولىنا شىققان قوس الەكساندر – بۋبليك پەن شەۆچەنكو تۇساۋكەسەر كەزدەسۋلەرىندە ءسۇرىندى. بۋبليك (اتر №37) وزىمەن دەڭگەيلەس ويىنشى, ارگەنتينالىق فرانسيسكو سەرۋندولودان (اتر №31) ايلاسىن اسىرا المادى – 6:7, 3:6, 2:6. شەۆچەنكوعا (اتر 77) تىم ازۋلى قارسىلاسقا تاپ بولدى, الەمنىڭ بۇرىنعى ءبىرىنشى راكەتكاسى كارلوس الكاراسپەن (№3) كۇش سىناستى. 21 جاستاعى يسپانيانىڭ ماقتانىشى ءار جىلدارى US وpen (2022 جىلى), ۋيمبلدون (2023, 2024), رولان گارروستا (2024) باس جۇلدەنى ولجالادى. بىلتىرعى پاريج وليمپياداسىنىڭ كۇمىس مەدالىن موينىندا جارقىراتتى. پيرەنەي تۇبەگىنىڭ تۇلەگى شەۆچەنكونى وڭاي ۇتتى – 6:1, 7:5, 6:1.
كيز بەن سيننەر وزدى
اۋستراليا اشىق بىرىنشىلىگىنىڭ ايەلدەر اراسىنداعى فينالدىق سايىسىندا الەمنىڭ ءبىرىنشى راكەتكاسى, بەلارۋستىك ارينا سوبولەنكو مەن امەريكالىق مەديسون كيز كۇش سىناستى. بۇل باسەكەدە اقش تەننيسشىسىنىڭ باعى جاندى – 6:3, 2:6, 7:5. ءسويتىپ, كيز ءوز مانسابىندا تۇڭعىش رەت «ۇلكەن دۋلىعا» تۋرنيرىندە جەڭىمپاز اتاندى.
ەرلەر اراسىنداعى جارىستىڭ شيرەك فينالىندا يسپانيالىق كارلوس الكاراستى ۇتقاننان كەيىن سەربيالىق نوۆاك دجوكوۆيچتى ەشكىم توقتاتا المايتىنداي كورىنىپ ەدى. گەرمانيالىق الەكساندر زۆەرەۆكە قارسى ويىن كەزىندە ونىڭ جاراقاتى سىر بەردى. دەسەك تە نوۆاك نامىسقا تىرىستى. ءبىرىنشى سەت تاي-برەيككە دەيىن ۇلاسىپ, ءسال عانا باسىمدىقپەن نەمىس تەننيسشىسى جەڭىسكە جەتتى – 7:6. جاراقاتى جانىنا باتسا كەرەك, دجوكوۆيچ ۇزىلىستەن كەيىن باسەكەنى جالعاستىرۋدان باس تارتتى.
كەلەسى جارتىلاي فينالدا يتاليالىق ياننيك سيننەر مەن امەريكالىق بەن شەلتون اراسىندا ءوتتى. بۇل تارتىستا اپەننين تۇبەگىنەن كەلگەن ارلاننىڭ مىسى باسىم بولدى – 7:6, 6:2, 6:2. فينالدا سيننەر زۆەرەۆكە ەش مۇمكىندىك بەرمەدى – 6:3, 7:6, 6:3. ءسويتىپ, يتاليانىڭ سايىپقىرانى قاتارىنان ەكىنشى رەت اۋستراليانىڭ اشىق بىرىنشىلىگىندە تەڭدەسسىز دەپ تانىلدى. بىلتىر سيننەر شەشۋشى باسەكەدە رەسەيلىك دانيل مەدۆەدەۆتى قاپى قالدىرعان بولاتىن.
جەرلەستەرىمىزدىڭ تابىسى – 670 220 دوللار
مەلبۋرندە جەرلەستەرىمىز ءساتسىز ونەر كورسەتكەنىنە قاراماستان, قارجىلاي جاعىنان ولجاعا كەنەلدى. ماسەلەن, ەلىمىز تەننيسشىلەرى اراسىنان ەڭ ۇزدىك ناتيجە كورسەتىپ, ءتورتىنشى اينالىمعا دەيىن جەتكەن ەلەنا رىباكينا 260 400 اقش دوللارىن ەنشىلەدى. ءۇشىنشى كەزەڭدە كۇش سىناسقان يۋليا پۋتينتسەۆانىڭ ەسەپشوتىنا 192 200 دوللار اۋدارىلدى. قوس الەكساندردىڭ, بۋبليك پەن شەۆچەنكونىڭ تابىسى – 94 240 دوللار.
جۇپتىق جانە ارالاس جۇپتار اراسىنداعى باسەكەدە باق سىناعان اننا دانيلينا 16 740 دوللار قالتاعا باستى. نيدەرلاندتىق روبين حاسەمەن جۇپ قۇرعان الەكساندر نەدوۆەسوۆ 12 400 دوللار يەلەندى. باس جۇلدەنى ولجالاعان تەننيسشىلەر 2 198 928 دوللار سىياقى السا, فينالدا ۇتىلعان ويىنشىلارعا 1 214 810 دوللار بۇيىردى.
تاريحى باي تۋرنير
بيىل اۋستراليانىڭ اشىق بىرىنشىلىگىنە تۋرا 120 جىل تولدى. تۇساۋكەسەر سايىس 1905 جىلى ۇيىمداستىرىلعان ەدى. تۇڭعىش ءتۋرنيردىڭ باس جۇلدەسىن جەرگىلىكتى قوس تەننيسشى رودني حيت پەن ارتۋر كەرتيس ءوزارا ساراپقا سالىپ, العاشقىسى جەڭىس تويىن تويلادى. حح عاسىردىڭ العاشقى جارتىسىنداعى ۇزدىك ناتيجەلەر ءۇش ويىنشىعا تيەسىلى. اتاپ ايتساق, دجەك كروۋفورد (1931–33, 1935 جىلدارى) ءتورت رەت توپ جارسا, دجەيمس اندەرسون (1922, 1924–25) مەن ادريان كۆيستتىڭ (1936, 1940, 1948) ءۇش مارتە مەرەيى ۇستەم بولدى. الپىسىنشى جىلدارى روي ەمەرسوننىڭ الدىنا جان سالمادى (1961, 1963–67).
مەلبۋرندە ەڭ كوپ ولجاعا كەنەلگەن – نوۆاك دجوكوۆيچ. سەربيانىڭ ساڭلاعى 10 جارىستا جەڭىمپاز اتاندى (2008, 2011–13, 2015–16, 2019–21, 2023). شۆەيتساريانىڭ مارقاسقاسى رودجەر فەدەرەرگە سول اتاقتىڭ التاۋى بۇيىردى (2004, 2006–07, 2010, 2017–18). يسپانيانىڭ ءدۇلد ۇلى رافاەل نادال (2009, 2022) ەكى دودادا دارا شىقتى. سول ۇشتىك ءبىر-بىرىمەن تايتالاسىپ جۇرگەن شاقتا باسقا ويىنشىلار اراسىنان ستەن ۆاۆرينكانىڭ عانا باس جۇلدەنى ولجالاۋعا كۇش-جىگەرى جەتتى. شۆەيتساريانىڭ ەكىنشى راكەتكاسى 2014 جىلعى تۋرنيردە توپ جاردى.
اتالعان تۋرنيرگە ايەلدەر 1922 جىلى قوسىلدى. العاشقى ەكى جارىستا مارگارەت موۋلسۋورتتىڭ (1922, 1923) مەرەيى ۇستەم بولدى. ءسال كەيىنىرەك دافنا اكحەرستىڭ اسىعى الشىسىنان ءتۇستى (1925-26, 1928-30). كوپ ۇزاماي نەنسي ۋينن-بولتون ءوزىنىڭ مىقتىلىعىن مويىنداتتى (1937, 1940, 1946-1948, 1951). 60-70 جىلدارى مارگارەت سميت-كورتتىڭ ءداۋىرى ءجۇردى (1960-1966, 1969-1971, 1973). بۇل تەننيسشىلەردىڭ بارلىعى دا – اۋستراليادان.
وتكەن عاسىردىڭ اياعىندا امەريكالىق مارتينا ناۆراتيلوۆا (1981, 1983, 1985), گەرمانيالىق شتەففي گراف (1988-1990, 1994), يۋگوسلاۆيالىق مونيكا سەلەش (1991–93, 1996), شۆەيتساريالىق مارتينا حينگيستىڭ (1997–1999) ونەرىنە تامساندىق. جاڭا عاسىردا سەرەنا ۋيليامستىڭ الدىنا ەشكىم تۇسە العان جوق. اقش-تىڭ اتاقتى تەننيسشىسى جەتى دودادا (2003, 2005, 2007, 2009, 2010, 2015, 2017) دارالاندى.
ايەلدەر اراسىنداعى وسىعان دەيىنگى سوڭعى ەكى جارىس ارينا سوبولەنكونىڭ جەڭىسىمەن اياقتالدى. بۇگىنگى تاڭدا الەمنىڭ ءبىرىنشى راكەتكاسى اتانىپ وتىرعان بەلارۋستىڭ بەتكەۇستارى 2023 جىلى فينالدا ە.رىباكينانى ۇتسا, 2024 جىلى قىتايلىق چجەن تسينۆەنگە شاڭ قاپتىردى.
جەرلەستەرىمىز جۇپتىق جارىستاردا جاقسى ناتيجە كورسەتتى. 2020 جىلى ميحايل كۋكۋشكين مەن الەكساندر بۋبليك جارتىلاي فينالعا دەيىن جەتتى. بۇل مەجەدە ولار امەريكالىق رادجيۆ رام مەن ۇلىبريتانيالىق دجو سولسبەريگە جول بەردى. 2022 جىلى برازيليالىق بەاتريس حادداد مايامەن جۇپ قۇرعان اننا دانيلينا فينالدا چەحيالىق باربورا كرەيچيكوۆا مەن كاتەرينا سينياكوۆاعا ەسە جىبەردى.
