فوتو: اۋىل شارۋاشىلىعى مينيسترلىگى ءباسپاسوز قىزمەتى
رەسمي اقپاراتقا سۇيەنسەك, كوكتەمگى ەگىس, ەگىن جيناۋ جۇمىستارىنا جانە اۋىل شارۋاشىلىق تەحنيكاسىنىڭ ليزينگىنە قوماقتى قاراجات بولىنگەن. العاش رەت جەڭىلدەتىلگەن نەسيەلەندىرۋ كولەمى جىلدىق 5%-بەن 580 ملرد تەڭگەگە دەيىن جەتكىزىلدى, ال وتكەن جىلدارى بۇل كولەم 160 ملرد تەڭگەدەن اسپادى. قابىلدانعان شارالار فەرمەرلەرگە بارلىق قاجەتتى اگروتەحنيكالىق شارالاردى تولىق كولەمدە وتكىزۋگە مۇمكىندىك بەردى. پايدالاناتىن ەليتالىق تۇقىمداردىڭ ۇلەسى 7,1%-دان 9%-عا دەيىن وسكەن.
ناتيجەسىندە 2024 جىلى ديقاندار سوڭعى 13 جىلدا العاش رەت ءداندى جانە بۇرشاقتى داقىلداردان 26,7 ملن توننا ءونىم جينادى. وسىمدىك شارۋاشىلىعىنداعى ءوندىرىس كولەمى 21,1%-عا جانە مال شارۋاشىلىعىندا 3,2%-عاء وسۋى اۋىل شارۋاشىلىعىنىڭ جالپى ءونىمىنىڭ 13,7%-عا ۇلعايۋىنا ىقپال ەتىپ, 8,3 ترلن تەڭگەنى قۇرادى.
بۇگىندە ەلىمىزدىڭ اگروونەركاسىپتىك كەشەنى 1,1 ملن-نان استام ادامدى جۇمىسپەن قامتاماسىز ەتىپ كەلەدى. بۇل 4 ملن-نان استام ازاماتتىڭ قارجىلىق ءال-اۋقاتىنا تىكەلەي اسەر ەتەدى.
مەملەكەت باسشىسى سالا ماماندارىنا تاپسىرعان مىندەتتەمە سوزىندە: «قازاقستاننىڭ ستراتەگيالىق ماقساتى – ەۋرازيا قۇرلىعىنداعى باستى اگرارلىق ورتالىقتىڭ بىرىنە اينالۋ. وسى ماقساتقا قول جەتكىزەمىز دەسەك, ەڭ الدىمەن, ءونىمدى جوعارى دەڭگەيدە وڭدەۋگە كوشۋىمىز قاجەت», دەگەن ەدى.
سوعان وراي قايتا وڭدەلگەن اۋىل شارۋاشىلىعى ءونىمىنىڭ ۇلەسىن 70%-عا جەتكىزۋ ماقساتىندا ورىنداۋ ءۇشىن 2028 جىلعا دەيىن اۋىل شارۋاشىلىق ءونىمىن قايتا وڭدەۋدى دامىتۋ جونىندەگى كەشەندى جوسپار بەكىتىلدى. ونىڭ شەڭبەرىندە 2024 جىلى 279,6 ملرد تەڭگە سوماعا 286 جوبا پايدالانۋعا بەرىلدى. وسىمدىك مايى مەن ۇن ءوندىرىسىن قوسا العاندا, ىشكى سۇرانىستى قاناعاتتاندىرۋعا عانا ەمەس, سونىمەن قاتار ەكسپورتتىق الەۋەتتى ارتتىرۋعا مۇمكىندىك بەرەدى.
