شىعىس وڭىرىندە ۇلى وتان سوعىسى ارداگەرلەرى جونىندە سايت اشىلادى

وسكەمەن. 5 اقپان. شىعىس قازاقستان وبلىسىندا ۇلى وتان سوعىسىنا قاتىسقان 614 ارداگەر جانە 27 918 تىل ارداگەرى تۇرادى. وسى ورايدا ۇلى جەڭىستىڭ 70 جىلدىق مەرەيتويى وڭىردە كەڭىنەن اتالىپ وتپەك. بۇل تۋرالى egemen.kz ءتىلشىسى حابارلادى. وبلىس اكىمىنىڭ ورىنباسارى جاقسىلىق ومار ءباسپاسوز وكىلدەرىمەن كەزدەسۋدە كەڭەس وداعىنىڭ باتىرى اتانعان ءار بەسىنشى قازاقستاندىقتىڭ شىعىس وڭىرىنەن شىققانىن جەتكىزدى. «جاس ۇرپاقتىڭ باتىر بابالارىمىزدىڭ ەرلىگى مەن ەڭبەگىن جەتە ءبىلۋى, ماقتان تۇتۋى ءۇشىن ولاردىڭ شىعىس قازاقستان وبلىسىنان مايدان دالاسىنا اتتانىپ, وشپەس ەرلىك كورسەتكەنى جونىندە جەتكىلىكتى اقپاراتتار جيناقتالعان سايت اشۋدى جوسپارلاپ وتىرمىز. اتالعان سايتتا شىعىسقازاقستاندىق كەڭەس وداعىنىڭ باتىرلارى تۋرالى جەكەلەگەن مالىمەتتەر, سۋرەتتەرى, ءومىر جولى, قىزمەتى, ولاردىڭ قان كەشىپ ءجۇرىپ مايداننان جازعان حاتتارى جانە دەرەكتى فيلمدەر مەن بەينەباياندار ورنالاستىرىلاتىن بولادى», – دەدى جاقسىلىق ومار. سونداي-اق وبلىس اكىمىنىڭ ورىنباسارى 1 ناۋرىزدان باستاپ «جەڭىسكە دەيىنگى جەتپىس كۇن: كەلەشەك ءۇشىن وتكەندى ەسكە الامىز» اتتى اكتسيا باستالاتىنىن اتاپ ءوتتى. اتالعان اكتسيا اياسىندا ارداگەرلەرگە ءتۇرلى دەڭگەيدە كومەك كورسەتىلىپ, قولداۋ شارالارى ۇيىمداستىرىلادى. وعان بارلىق ءوڭىر تۇرعىندارى قاتىسا الادى. ايتا كەتەيىك, ۇلى وتان سوعىسىنىڭ مۇگەدەكتەرى مەن قاتىسۋشىلارىنا ءبىر رەتتىك ماتەريالدىق كومەك, مەرەيتويلىق مەدالدار بەرىلەدى. كەزەكتە تۇرعان وبلىس ارداگەرلەرى اعىمداعى جىلدىڭ ناۋرىز ايىنان باستاپ تۇرعىن ۇيگە قول جەتكىزەدى. سونداي-اق رەسپۋبليكالىق بيۋدجەتتەن ءار ارداگەرگە ءبىر رەتتىك 100 مىڭ تەڭگە كولەمىندە سىياقى اۋدارىلادى. ودان وزگە وبلىستىڭ قالالارى مەن اۋداندارى دا ارداگەرلەرگە ماتەريالدىق كومەك كورسەتەدى. دۋمان اناش. دەرەك: egemen.kz سۋرەت: newskaz.ru.