ۇستازدىقتى ومىرلىك مۇراتىنا اينالدىرعان اياۋلى جاننىڭ وتاندىق ءبىلىم سالاسىن دامىتۋعا قوسقان ۇلەسى وتە زور. ەسكەرتكىش-تاقتانىڭ اشىلۋىندا قازاقستاننىڭ ەڭبەك ەرى اياگۇل ميرازوۆا قايراتكەر كەڭەستىك جۇيەنىڭ ۇستەمدىگىنە قاراماستان, قازاق مەكتەبى ماسەلەسىن وتكىر كوتەرگەنىن ءسوز ەتتى.
«ونىڭ وسىنداي يگى ىستەرىنە قىزىلورداعا ىسساپارمەن بارعاندا كوز جەتكىزدىم. ءشامشا كوپبايقىزىنىڭ «قازاق مەكتەبى – ۇلت تىرەگى» اتتى ەڭبەگىن وقىپ, كوپ جاعدايعا قانىقتىم. وسىندا ءوز ءىسىنىڭ مازمۇنىنا تەرەڭ ءۇڭىلىپ, قازاق مەكتەبىن دامىتا وتىرىپ, ەلى مەن جەرىن سۇيەتىن ازاماتتار تاربيەلەۋ ەكەنىن باسا ايتقان», دەپ ەسكە الدى ول.
بۇگىندە لاۋازىمدى قىزمەت اتقارىپ جۇرگەن ايەل ازاماتشالار بارشىلىق. بىراق قوعام قايراتكەرى بولۋ ەكىنىڭ ءبىرىنىڭ قولىنان كەلمەيدى. جازۋشىلار وداعىنىڭ توراعاسى, قالامگەر مەرەكە قۇلكەنوۆ ايتۋلى تۇلعانىڭ مەكتەپ باسشىلىعىنان باستاپ سەناتور, مينيستر, رەكتور قىزمەتىندە ءجۇرىپ, ۇلتقا جان اياماي ەڭبەك ەتكەنىن ايتتى. ال اقىن, مەملەكەتتىك سىيلىقتىڭ لاۋرەاتى نۇرلان ورازالين: «الماتى تورىندە الاشتىڭ اياۋلى قىزى, قازاققا قادىرى اسقان تۇلعا بيىگىنە كوتەرىلگەن ءشامشا كوپبايقىزى بەركىمباەۆا جايىندا ءسوز ەتكەندە, جانى جايساڭ, جۇرەگى جومارت, ەلىنە ەسەپسىز قىزمەت ەتكەن قايراتكەرلىگى ەسكە ورالادى. ادامزات بالاسىنىڭ رۋحاني ەڭبەگى, ۇلتىنىڭ الدىندا اتقارعان ۇلى مىندەتى ادال بولسا, ونى حالقى ەشقاشان ۇمىتپايدى. جادىندا ساقتايدى, جۇرەگىنە تۇمار ەتىپ ءتۇيىپ, ۇرپاقتان-ۇرپاققا قالدىرىپ وتىرادى. ۇستازدىق مىنەزىنە قانىققان, قايراتكەرلىك قالىبىنا كوزى جەتكەن وتكەن عاسىردىڭ 50 جىلىندا وسكەنىن, ونگەنىن كورگەن ارداقتى قىزىن ەلى جاقسى بىلەدى», دەدى اقىن.
سونداي-اق ءىس-شارا بارىسىندا بەلگىلى تۇلعانىڭ كوزىن كورىپ, ىستەگەن ءىسىن وزىنە دە, كەيىنگى تولقىنعا دا ۇلگى ەتىپ جۇرگەن الماتى قالاسى مادەنيەت باسقارماسىنىڭ باسشىسى عاني مايلىباەۆ ءشامشا كوپبايقىزىنىڭ قايراتكەرلىگى مەن ادامي بولمىسىنا توقتالدى. قازاق ۇلتتىق قىزدار پەداگوگيكالىق ۋنيۆەرسيتەتىنىڭ رەكتورى گۇلميرا قاناي ش.بەركىمباەۆا اتالعان وقۋ ورنىنا باسشىلىق ەتكەن تۇستا ءتالىم-تاربيە مەن اكىمشىلىك-شارۋاشىلىق جۇمىستاردىڭ جاڭعىرۋىنا كوپ اتسالىسقانىن جەتكىزدى.
«سول كەزەڭدە اۋىلدان كەلگەن جاستاردى ۋنيۆەرسيتەتكە كوپ تارتتى. زاماناۋي ۇلگىدەگى 9 قاباتتى 450 ورىندىق «ستۋدەنتتەر ءۇيى» سالىنىپ, وقۋ عيماراتتارى, جاتاقحانالار مەن اسحانالارعا كۇردەلى جوندەۋ جۇمىستارى جۇرگىزىلدى. جاستاردى بىلىمگە, يماندىلىققا تاربيەلەۋگە ەرەكشە كوڭىل ءبولدى. ونىڭ پەداگوگيكالىق جانە باسقارۋشىلىق قىزمەتى وسكەلەڭ ۇرپاققا ۇلگى», دەدى ۋنيۆەرسيتەت رەكتورى گ.قاناي.
قازىرگى تاڭدا قازاق ۇلتتىق قىزدار پەداگوگيكالىق ۋنيۆەرسيتەتىنىڭ ستۋدەنتتەر ءۇيى ءشامشا بەركىمباەۆانىڭ ەسىمىمەن اتالادى.
الماتى
