اتالعان ءىس-شارا «مادەنيەت ارقىلى ۇنقاتىسۋ» جوباسى اياسىندا ۇيىمداستىرىلىپ, ءپىب پرەزيدەنتتىك ورتالىعىندا بيىلعى كورمە ماۋسىمىن اشتى. فليۋيد-ارت تەحنيكاسى مەن ابستراكتى بەينەلەۋ باعىتىندا كەڭ تانىلعان ءالي اقجاننىڭ ەڭبەكتەرى كوپتەگەن رەسپۋبليكالىق جانە حالىقارالىق كورمەدە قويىلىپ ءجۇر. اتاپ ايتساق, سۋرەت اكادەمياسىنىڭ, ونەر اكادەمياسىنىڭ حالىقارالىق كورمەلەرىندە, سونداي-اق «Astana Finance Days», «الەمنىڭ جارىعى», «تۇركى ايەلدەرىنىڭ زەرگەرلىك اشەكەيلەرى», «شەكسىز عارىش», «13 مەتامورفوزا» كورمەلەرىندە ۇسىنىلعان. بۇگىندە سۋرەتشى تۋىندىلارى ەلىمىزدەن بولەك اۋستريا, گەرمانيا, جاپونيا, نيدەرلاندى كورولدىگىنىڭ جانە ماروككونىڭ جەكە كوللەكتسيالارىندا ساقتاۋلى.
ال دجەرالد فلوريان مەسسنەردىڭ شىعارمالارى ءباا, اۋستريا, قىتاي جانە قازاقستان كورمەلەرىندە قويىلعان. ءوزى عالىم, ءوزى دوكتور, جازۋشى ءھام ءانشى ءۇشىن بۇل قابىلەتتەرى ءبىر-بىرىمەن تىعىز بايلانىستى.
«كورمە اۆتورلارى پرەزيدەنت ورتالىعىنىڭ بيىلعى كورمە ماۋسىمىن اشۋ قۇرمەتىنە يە بولدى. بۇل جوبا قازاقستان مەن اۋستريا اراسىنداعى مادەني بايلانىستاردى ودان ءارى دامىتۋعا جانە نىعايتۋعا سەپتىگىن تيگىزەتىنىنە سەنىمدىمىز. ء«بىز بىرگەمىز!» دەگەن اتاۋ ءتۇرلى ەلدەن كەلگەن مادەنيەتى ءارتۇرلى, ومىرگە كوزقاراسى بولەك ەكى سۋرەتشىنى بىرىكتىرگەن تەرەڭ فيلوسوفيالىق حاباردى بەينەلەيدى. ونەر ارقىلى كەز كەلگەن شەكتەر مەن شەڭبەرلەر جويىلىپ, ەكى سۋرەتشىنىڭ ديالوگى ءبىزدى شىعارماشىلىقتىڭ تاڭعاجايىپ الەمىنە باتىرادى. ءبىز بۇل ۆەرنيساجدى بىرلىك پەن جاسامپازدىقتىڭ نىشانىنا اينالعان قازاقستان حالقى اسسامبلەياسىنىڭ 30 جىلدىعىنا ارنادىق», دەپ اتاپ ءوتتى پرەزيدەنت ورتالىعى ديرەكتورىنىڭ ورىنباسارى بوتاگوز قايىپوۆا.
ءوز كەزەگىندە اۋستريا رەسپۋبليكاسىنىڭ قازاقستان رەسپۋبليكاسىنداعى ەلشىسى, سونىمەن قوسا قىرعىز رەسپۋبليكاسى مەن تاجىكستان رەسپۋبليكاسىنداعى اتقارۋشى ەلشىسى اندرەا باحەر دە ءسوز الدى.
«مەن ەلشى لاۋازىمىنا جاقىندا عانا تاعايىندالدىم. قىزمەتىمدەگى العاشقى ءىس-شارا, ەلدەرىمىز اراسىنداعى ەكىجاقتى ىنتىماقتاستىقتى ودان ءارى نىعايتۋعا ارنالعان وسىنداي ماڭىزدى مادەني جيىن بولعانىنا قۋانىشتىمىن», دەدى ول.
بۇگىندە تسيفرلىق تەحنولوگيالار جانە جاھاندانۋ داۋىرىندە, ادامدار اراسىنداعى بايلانىستار الشاقتاپ بارا جاتقان الەمدە ءومىر ءسۇرىپ جاتقانىمىز راس. ءبىر يدەياعا توعىسقان ەكى سۋرەتشى – الەمگە دەگەن ەكى كوزقاراس. ء«بىز بىرگەمىز!» كورمەسى – سوزبەن جەتكىزە المايتىن كورىنىستەردى بەينەلەيتىن ونەر عانا ەكەندىگىنىڭ تاعى ءبىر دالەلى. مۇنداعى ءاربىر جۇمىس ءومىردىڭ ءتۇرلى سيۋجەتتەرىنەن قۇرالعان موزايكانىڭ ەرەكشە فراگمەنتى سىندى.
ء«وز ويىم مەن سەزىمىمدى بەينەلەيتىن تۋىندىلارىمدى ۇسىنۋ – مەن ءۇشىن ۇلكەن مارتەبە. ءاربىر كارتينا – مەنىڭ جولىمنىڭ تاريحى. دجەرالد فلوريان مەسسنەرمەن بىرلەسكەن كورمە شامامەن ءۇش اي بۇرىن ءپىسىپ-جەتىلدى. ماقساتى – ءارتۇرلى ەل, ءار تولقىنداعى ۇرپاقتار سۋرەتشىلەرىنىڭ جۇمىستارىن كورسەتۋ, كوزقاراسىن بايقاتۋ. بۇل كورمە كەلۋشىلەردى مادەني ارتۇرلىلىكپەن تانىستىرۋعا جانە اۆتورلاردىڭ شىعارماشىلىق ىزدەنىسىن سەزىنۋگە تاماشا مۇمكىندىك ەكەنى ءسوزسىز. بۇگىنگى ءىس-شارا اركىمگە ءوزى تۋرالى, جالپى الەم تۋرالى جاڭا دۇنيەنى اشۋعا مۇمكىندىك بەرەدى», دەيدى اقجان ءالي.
ەكسپوزيتسيادا ءالي اقجاننىڭ 25 تۋىندىسى جانە فلوريان مەسسنەردىڭ 27 تۋىندىسى ۇسىنىلىپ وتىر.
ايتا كەتەيىك, كورمە 24 اقپانعا دەيىن جۇمىس ىستەيدى.
