فيلم 2024 جىلى گەرمانيانىڭ ميۋنحەن, نيۋرنبەرگ, ديۋسسەلدورف قالالارىندا, اۋستريانىڭ زالتسبۋرگ, تۇركيانىڭ ىستانبۇل, ساليحلى جانە قازاقستاننىڭ الماتى, استانا, اقتاۋ قالالارىندا تۇسىرىلگەن. باستى ءرولدى ميۋنحەندەگى «قازاق قوعامىنىڭ» دامۋىنا زور ۇلەس قوسقان, ەۋروپاداعى قازاق قاۋىمداستىعىنىڭ نەگىزىن قالاۋشى سۇلەيمەن شادقام سومدايدى.
پرەمەراعا فيلم رەجيسسەرى قارلىعا حاسەن, پروديۋسەرى تاناكوز تولقىنقىزى, باستى كەيىپكەرى سۇلەيمەن شادقام جانە اقتاۋ قالاسىنىڭ تۇرعىندارى قاتىستى. دەرەكتى فيلم دەمەۋشىلەر قاراجاتىنا تۇسىرىلگەن.
«بيىل, ياعني 2025 جىل, اقتاۋ قالاسى تۇركى الەمىنىڭ مادەني استاناسى مارتەبەسىنە يە بولدى. وسى ماڭىزدى وقيعا اياسىندا «قازاق» جاڭا دەرەكتى ءفيلمىنىڭ تۇساۋى كەسىلدى. قاراكوز قانداستاردىڭ تاعدىرىنان سىر شەرتەتىن ءفيلمنىڭ جارىققا شىعۋىنا ۇلەس قوسقان بارشا ازاماتقا جانە اۆتورلارعا العىسىمدى ايتامىن», دەدى اقتاۋ قالاسىنىڭ اكىمى ابىلقايىر بايپاقوۆ.
فيلم نەمىس, اعىلشىن, فرانتسۋز تىلدەرىنە اۋدارىلعان. العاشقى تۇساۋكەسەر ءراسىمى 2024 جىلدىڭ 6-8 قاراشا ايىندا سىرتقى ىستەر مينيسترلىگىنىڭ قولداۋىمەن گەرمانيانىڭ ميۋنحەن قالاسىندا جانە فرانتسيا استاناسى پاريجدە ءوتتى.
جاڭا تۋىندىنىڭ ەۋروپاداعى تۇساۋكەسەر راسىمىنە قازاقستاننىڭ ميۋنحەن قالاسىنداعى باس كونسۋلى دەنيس روگوۆ, قازاقستاننىڭ فرانتسياداعى ەلشىسىنىڭ كەڭەسشىسى نۇرجان راحمەت, حالىق ءارتىسى ايگۇل ۇلكەنباەۆا جانە ءفيلمدى تۇسىرۋشىلەر مەن كەيىپكەرلەر قاتىستى.
ماڭعىستاۋ وبلىسى
