فوتو: gov.kz
عىلىم جانە جوعارى ءبىلىم مينيسترلىگىنىڭ مالىمەتىنشە, وسى ارالىقتا تەست تاپسىرعانداردىڭ 70 پايىزعا جۋىعى شەكتى بالدى جيناعان. تەستىلەۋ ناتيجەسى بويىنشا ورتاشا بالل 65-ءتى قۇراعان. ەكى وقۋشى 137 بالل جيناپ, جوعارى كورسەتكىش تىركەگەن.
«تەستكە قاتىسۋشىلاردىڭ 76,8%-ى قازاق تىلىندە, 23,1%-ى ورىس تىلىندە, 46 ادام اعىلشىن تىلىندە ۇبت تاپسىرعان. تالاپكەرلەردىڭ باسىم بولىگى, 16,9%-دان «ماتەماتيكا-فيزيكا» جانە «بيولوگيا-حيميا» پاندەر كومبيناتسياسىن تاپسىردى. 10,3%-ى «شىعارماشىلىق ەمتيحان» كومبيناتسياسىن تاڭداعان. ەڭ از تاڭدالعان كومبيناتسيا – «حيميا-فيزيكا», ونى 105 ادام تاپسىرعان», دەلىنگەن مينيسترلىك مالىمەتىندە.
مينيسترلىك ەرەكشە ءبىلىم بەرۋ قاجەتتىلىكتەرى بار تالاپكەرلەردىڭ قولايلى تەس تاپسىرۋى ءۇشىن ماتەريالدىق-تەحنيكالىق بازانى جاقسارتۋعا نازار اۋدارىپ كەلەدى. ءتيىستى جاعداي جاساۋدىڭ ارقاسىندا قاڭتار ۇبت-سىنا وسى ساناتتاعى 203 تالاپكەر قاتىسقان.
تالاپكەرلەر تەستىلەۋ اياقتالعاننان كەيىن 30 مينۋت ىشىندە اپەللياتسياعا بەرە الادى. مۇنداي جاعدايدا سەرتيفيكات اپەللياتسيا تۋرالى شەشىم قابىلدانعاننان كەيىن تەستىلەنۋشىنىڭ جەكە كابينەتىنە جولدانادى.
«قازىرگى تاڭدا 111 ادامنىڭ ناتيجەسى جويىلدى. ونىڭ ىشىندە 70 تالاپكەر سمارتفون جانە شپارگالكا سياقتى تىيىم سالىنعان زاتتاردى الىپ ءوتۋ ارەكەتى سالدارىنان تەست تاپسىرۋ مۇمكىندىگىنەن ايىرىلدى, ال تەستىلەۋ كەزىندە ەرەجەلەردى بۇزعانى ءۇشىن اۋديتوريادان 41 ادام شىعارىلدى. وزگە تۇلعالار انىقتالعان جوق», دەلىنگەن مينيسترلىك حابارلاماسىندا.
قاڭتار ۇبت-سى 13 قاڭتار مەن 10 اقپان ارالىعىندا وتەدى. تەستىلەۋگە قاتىسۋعا 167 مىڭعا جۋىق تالاپكەر نيەت بىلدىرگەن.
