فوتو: gov.kz
قازاقستان رەسپۋبليكاسى اۋىل شارۋاشىلىعى مينيسترلىگى جەر رەسۋرستارىن باسقارۋ كوميتەتىنىڭ توراعاسى مۇرات تەمىرجانوۆ ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ تاپسىرماسىن ىسكە اسىرۋ بارىسى تۋرالى ايتتى. مەملەكەت باسشىسى 2022 جىلعى 1 قىركۇيەكتەگى قازاقستان حالقىنا جولداۋىندا پايدالانىلماي جاتقان 10 ميلليون گەكتار جەردى نەمەسە زاڭ تالاپتارىن بۇزا وتىرىپ بەرىلگەن جەرلەردى قايتارۋ مىندەتىن قويدى.
«بارلىق مۇددەلى مەملەكەتتىك ورگانداردىڭ ۇيلەسىمدى جۇمىسىنىڭ ارقاسىندا ءۇش جىل ىشىندە اۋقىمدى جۇمىستار اتقارىلدى. 9,4 ميلليون گەكتار اۋماقتا 4 731 جوسپاردان تىس تەكسەرۋ جۇرگىزىلدى. 6,3 ميلليون گەكتار اۋماقتاعى بۇزۋشىلىقتاردى جويۋ تۋرالى 3482 ۇيعارىم شىعارىلدى. ناتيجەسىندە 12,1 ملن گا جەر مەملەكەت قورىنا قايتارىلدى, ونىڭ ىشىندە: 2022 جىلى – 5,4 ملن گا; 2023 جىلى – 4,6 ملن گا; 2024 جىلى – 2,1 ملن گا», دەدى م.تەمىرجانوۆ.
بايانداماشى قايتارىلعان جەرلەردىڭ جالپى كولەمىنىڭ 4,9 ميلليون گەكتارى جەرگىلىكتى بيلىككە حالىقتىڭ مۇقتاجى ءۇشىن بەرىلگەنىن, ونىڭ ىشىندە: 1,9 ميلليون گەكتارى جايىلىمعا, 3 ميلليون گەكتارى جەر پايدالانۋشىلارعا بەرىلگەنىن حابارلادى.
