ناقتى دەرەكتەرگە قۇرىلعان تۋىندى جونىندە اۆتوردىڭ ءوزى: «بۇل كىتاپتا كسرو باس شتابى باس بارلاۋ باسقارماسىنىڭ 177-ارنايى ماقساتتاعى جەكە جاساعىنىڭ قۇرىلۋى مەن كۇندەلىكتى ءومىرى تۋرالى جازىلعان. 1980 جىلدىڭ قاڭتارىندا الماتى وبلىسى, قاپشاعاي قالاسىندا قۇرىلعان, اتى اڭىزعا اينالعان قارا مايور – بوريس كەرىمباەۆ باسقارعان اتاقتى «مۇسىلمان باتالونى» 1981 جىلعى قازان ايىنان 1989 جىلدىڭ اقپانىنا دەيىن سوۆەت ارمياسىنىڭ اۋعانستانداعى شەكتەلگەن كونتينگەنتى قۇرامىندا بولدى. ءوز ءىس-ارەكەتتەرىمەن جاساق وشپەس جاۋىنگەرلىك داڭققا بولەنىپ, ارنايى ماقساتتاعى اسكەرلەر اراسىندا ەڭ بەلگىلى بولىمدەردىڭ بىرىنە اينالدى. جاساقتىڭ العاشقى قۇرامى 1983 جىلعى قازان ايىنا دەيىن سوعىستى, اتالعان جاساق تۋرالى, ولاردىڭ سول كەزەڭدەگى جاۋىنگەرلىك ىستەرى تۋرالى جازدىم», دەپ تولعانادى.
وت پەن وقتىڭ ورتاسىندا ءجۇرىپ, ونى اينا-قاتەسىز قاعازعا ءتۇسىرىپ, وقىرمانعا ۇسىنۋ وڭاي جۇمىس ەمەس. بۇل جەردە بارىنشا بايىپتىلىق, شىعارماشىلىق شەبەرلىك قاجەت. وسى رەتتە بۇل تاقىرىپتى تەرەڭ زەرتتەپ جۇرگەن ايگۇل ەرمەكوۆا بۇل ەڭبەكتىڭ اۋعان سوعىسى تۋرالى قۇندى كىتاپتاردىڭ ءبىرى ەكەنىن ايتادى.
«اۋعان سوعىسى جايىندا وقىعانىم دا, تىڭداعانىم دا جەتەرلىك, ءتىپتى اتاق-داڭقى كۇللى ەلگە ءمالىم «قارا مايور» اتانعان بوريس كەرىمباەۆتىڭ وزىمەن دە بىرنەشە مارتە كەزدەسىپ, اڭگىمەلەستىم. جانى جايساڭ, كەڭ قۇلاشتى, تەرەڭ ويلى ازامات ەدى. ارداگەر تۋرالى اڭىزعا بەرگىسىز اۋىزشا اڭگىمەلەردى كوپ ەستىدىم, سولاردىڭ ىشىندە ولەڭدەر دە بولدى. 2017 جىلى «اۋعان سوعىسىنداعى اتىراۋلىق جاۋىنگەرلەر شەجىرەسى» اتتى كىتابىمنىڭ جارىققا شىعۋىنا دەم بەرگەن بوريس توكەن ۇلى مەن امانگەلدى تەمىرجان ۇلى ەدى. اتىراۋدان سوعىسقا قاتىسقان 868 جاۋىنگەردەن 546 جاۋىنگەردىڭ ءومىر دەرەگى كىتاپقا ەندى. ال ا.جانتاسوۆتىڭ «جارتاستى جاستانعان جاساق» كىتابىن وقىپ, قاتتى ريزا بولدىم. كىتاپ باستان-اياق ناقتى دەرەككە نەگىزدەلگەن قۇندى ەڭبەك», دەيدى زەرتتەۋشى.
قورىتا ايتقاندا, بۇل كىتاپ – ۇلكەن ەڭبەكتىڭ جەمىسى, جاۋىنگەرلەردىڭ اسىل رۋحىنا تاعزىم ءارى ەسكەرتكىش.
