امەن قايداروۆ قايتىس بولدى

استانا. 5 اقپان. قازاقتىڭ تۇڭعىش مۋلتيپليكاتورى, كورنەكتى رەجيسسەر قايداروۆ امەن ءابجان ۇلى 92 جاسقا قاراعان شاعىندا قايتىس بولدى. بۇل تۋرالى «قازاقستان» تەلەارناسى حابارلادى. كينورەجيسسەر, سۋرەتشى, قازكسر-ءىنىڭ ەڭبەك سىڭىرگەن ونەر قايراتكەرى امەن قايداروۆ 1923 جىلى قاراعاندى وبلىسى نۇرا اۋدانىندا تۋعان. 1951 جىلى الماتى سۋرەتشىلەر ۋچيليششەسىن بىتىرگەن سوڭ «قازاقستان ايەلدەرى», «ارا» جۋرنالدارىنىڭ رەداكتسيالارىندا قىزمەت ەتكەن. 1958-1965 جىلدارى ارالىعىندا ماسكەۋدەگى مەملەكەتتىك كينەماتوگرافيا ينستيتۋتىنىڭ كوركەمسۋرەت فاكۋلتەتىندە وقىعان. 1965 جىلدان «قازاقفيلم» كينوستۋدياسىندا جۇمىس ىستەدى. ول – قازاقستانداعى مۋلتيپليكاتسيالىق جانردىڭ ىرگەسىن قالاۋشىلاردىڭ ءبىرى. 1967 جىلى قايداروۆتىڭ سالعان سۋرەتى بويىنشا حالىق ەرتەگىسى نەگىزىندە ەلىمىزدە تۇڭعىش رەت ءتۇرلى-ءتۇستى «قارلىعاشتىڭ قۇيرىعى نەگە ايىر؟» اتتى مۋلتيپليكاتسيالىق فيلم جاسالدى. بۇل تۋىندى لەنينگراد (قازىرگى سانكت-پەتەربۋرگ) قالاسىندا وتكەن بۇكىلوداقتىق كينوفەستيۆالدا (1968), نيۋ-يورك قالاسىندا وتكەن حالىقارالىق مۋلتيپليكاتسيالىق فيلمدەر فەستيۆالىندە جۇلدە الدى. سونداي-اق, قايداروۆ «قۇيىرشىق», «جانار», «كۇن ساۋلەسىنەن پايدا بولعان كوجەك» اتتى مۋلتيپليكاتسيالىق فيلمدەردى جاساعان. 1980 جىلى قايداروۆقا «اقساق قۇلان», «قوجاناسىر – قۇرىلىسشى», «قىرىق وتىرىك» سياقتى مۋلتيپليكاتسيالىق فيلمدەر توپتاماسى ءۇشىن قازكسر مەملەكەتتىك سىيلىعى بەرىلدى. «قۇرمەت بەلگىسى», «پاراسات» وردەندەرىمەن جانە بىرقاتار مەدالدارمەن ماراپاتتالعان. جولدىباي بازار. دەرەك, سۋرەت: «قازاقستان» تەلەارناسى.