وتىن 2326 گرادۋس ىستىقتا 20 مينۋت بويى تولىق قۋاتتا جۇمىس ىستەگەن. سىناق ناسا-داعى مارشالل ورتالىعىندا ۇيىمداستىرىلدى. التىنشى سىناقتا وڭ ناتيجە شىعىپ, يادرو جىلۋ قوزعالتقىشتارىنا ارنالعان وتىننىڭ ەكسترەمال ورتاعا ءتوزىمدى ەكەنى دالەلدەندى. «General Atomics» باسشىسى سكوتت ءفورنيدىڭ ايتۋىنشا, بۇل جەتىستىك عارىشقا ساياحاتتىڭ جاڭا ءداۋىرىن باستاۋعا نەگىز بولماق. جاڭا تەحنولوگيا مارسقا ۇشۋ ۋاقىتىن 6–7 ايدان 45 كۇنگە دەيىن قىسقارتادى. بۇل ەكيپاجدىڭ دەنساۋلىعىنا تونەتىن قاۋىپتى ازايتادى.
«EAST» جاڭا رەكورد ورناتتى
قىتايدىڭ «EAST» تەرمويادرولىق رەاكتورى 1066 سەكۋند بويى پلازمانى 100 ملن گرادۋس تەمپەراتۋرادا ۇستاپ, جاڭا رەكوردقا جەتتى. بۇل كورسەتكىش 2023 جىلى ورناتىلعان ناتيجەدەن ءۇش ەسە كوپ.
رەاكتور قىتايدىڭ حەفەي قالاسىندا ورنالاسقان. مۇنداي جوعارى تەمپەراتۋرا اتوم يادرولارىنىڭ قوسىلىپ, ەنەرگيا بولۋىنە مۇمكىندىك بەرەدى. بۇل جەردە تەرمويادرولىق رەاكتسيانى ىسكە قوسۋ ءۇشىن قاجەت, سەبەبى كۇندەگى سياقتى جوعارى قىسىم جەر بەتىندە بولمايدى. ەكسپەريمەنتتىڭ باستى جەتىستىگى – پلازمانى ۇزاق ۇستاپ تۇرۋ ءارى جۇيەنىڭ تۇراقتىلىعىن ارتتىرۋ. تەحنولوگيا بولاشاقتا شەكسىز ءارى تازا ەنەرگيا كوزىن وندىرۋگە پايدالانىلادى.
ساڭىراۋقۇلاقتان جاسالعان باتارەيا
شۆەيتساريا عالىمدارى ەلەكتر قۋاتىن وندىرۋگە ارنالعان ەرەكشە بيوىدىرايتىن باتارەيا جاساپ شىعاردى.
باتارەيا ەكى ءتۇرلى ساڭىراۋقۇلاقتان جاسالعان. ءبىرى انود اشىتقى نەگىزىندە جاسالىپ, ەلەكتروندار شىعارادى, ال كاتود اق ساڭىراۋقۇلاق-ترۋتوۆيكتى پايدالانىپ, ارنايى فەرمەنت ارقىلى ەلەكترونداردى قابىلدايدى. باتارەيانىڭ كورپۋسى بيوىدىرايتىن ماتەريالداردان 3D پرينتەردە باسىلىپ شىعارىلدى. مۇنداي ماتەريال قۇرامىندا ساڭىراۋقۇلاقتارعا قاجەتتى قورەكتىك زاتتار بار. باتارەيا 600 مۆ قۋات وندىرە الادى جانە ونى اۋىل شارۋاشىلىعىندا نەمەسە ەكولوگيالىق زەرتتەۋلەردە شاعىن قۇرىلعىلاردى قۋاتتاۋعا پايدالانۋعا بولادى. بۇل باتارەيا ەكولوگيالىق تازا ءارى قاۋىپسىز. قولدانىلعاننان كەيىن تابيعي جولمەن ىدىراپ, قورشاعان ورتاعا زيان كەلتىرمەيدى.
