ءباسپاسوز قىزمەتىنىڭ مالىمەتتەرىنە قاراعاندا, 2024 جىلى سىبايلاس جەمقورلىققا قارسى ءىس-قيمىل اگەنتتىگى دارىلىك زاتتار مەن مەديتسينا بۇيىمدارىن ساراپتاۋ ۇلتتىق ورتالىعىنىڭ (دزسۇو) قىزمەتىندەگى سىبايلاس جەمقورلىق تاۋەكەلدەرىنە سىرتقى تالداۋ جۇرگىزدى.
بۇعان دەيىن «سك-فارماتسيا» ۇيىمىندا جۇرگىزىلگەن تالداۋ ساتىپ الۋ قۇنىنىڭ نەگىزسىز ارتۋىمەن بايلانىستى ەلەۋلى تاۋەكەلدەردى انىقتاعان بولاتىن.
بەلگىلى بولعانداي, بۇل ماسەلەلەر تىكەلەي دزسۇو قىزمەتىمەن بايلانىستى.
نەگىزگى تاۋەكەلدەر – شىعىندار مەن جەتكىزۋشىلەردىڭ ۇستەمەاقىسى تۋرالى اقپاراتتىڭ جابىقتىعى, اقپاراتتىق جۇيەلەردىڭ بولشەكتەنۋى جانە دەرەكتەردى قايتا تەكسەرۋ مەحانيزمىنىڭ بولماۋى.
دەنساۋلىق ساقتاۋ مينيسترلىگىنىڭ بۇيرىقتارى جەتكىزۋشىلەردىڭ كولىك شىعىندارىنا, ماركەتينگكە جانە ساپانى باعالاۋعا نەگىزسىز ۇستەمەاقى ەنگىزۋ ارقىلى ءدارى-دارمەك باعاسىن قالىپتاستىرۋعا مۇمكىندىك بەرگەن.
ناتيجەسىندە ءدارى-دارمەكتەردىڭ تىركەۋدەن وتكەننەن كەيىن ءدارىحانالار سورەلەرىنە تۇسۋىنە دەيىنگى باعاسى ەكى ەسەدەن استام وسكەن.
وسىدان ۇلكەن فارماتسەۆتيكالىق كومپانيالار ارتىق پايدا تاپقان.
اگەنتتىك دەنساۋلىق ساقتاۋ مينيسترلىگىنە نەگىزسىز ۇستەمەاقىلاردى جويۋ جانە مونيتورينگ جۇرگىزۋگە ارنالعان بىرىڭعاي اقپاراتتىق جۇيەنى ەنگىزۋ بويىنشا ۇسىنىستار ەنگىزدى.
پرەزيدەنت اكىمشىلىگى باسشىسىنىڭ بۇيرىعىمەن وسى سالادا باعا بەلگىلەۋ جۇيەسىن تسيفرلاندىرۋ بويىنشا جۇمىس توبى قۇرىلدى.
قازىرگى ۋاقىتتا سىبايلاس جەمقورلىققا قارسى قىزمەتتىڭ ۇسىنىستارىنا سايكەس ءدارى-دارمەكتەردىڭ شەكتى باعاسى مەن ساتىپ الۋ تارتىبىنە قاتىستى دەنساۋلىق ساقتاۋ ءمينيسترىنىڭ ءۇش بۇيرىعىنا وزگەرىستەر ەنگىزىلدى.
ناتيجەسىندە نەگىزسىز ۇستەمەاقىلار الىنىپ تاستالدى, بۇل كەيبىر ءدارى-دارمەكتەردىڭ باعاسىنىڭ تومەندەۋىنە وڭ اسەر ەتەدى.
