فوتو: ەرلان ومار
ەڭ الدىمەن پرەزيدەنت كەڭەسشىسى باۋىرجان وماروۆ ەكى گازەتتىڭ 105 جىلدىق مەرەيتويىنا ارنالعان قاسىم-جومارت توقاەۆتىڭ قۇتتىقتاۋ حاتىن جەتكىزدى.
«العاشقى سانى جارىق كورگەننەن باستاپ قوس باسىلىم ەلىمىزدى وركەندەتۋ جانە بەرەكەلى بىرلىگىمىزدى نىعايتۋ ىسىنە ولشەۋسىز ۇلەس قوسىپ كەلەدى. قازاقتىڭ ءبىرتۋار پەرزەنتتەرى نەگىزىن قالاعان گازەتتەردە ويى ۇشقىر ءسوز زەرگەرلەرى قىزمەت ەتتى. ولار حالىقتىڭ ءسوزىن سويلەپ, ۇلت ماسەلەسىن بارىنەن بيىك قويدى. عاسىردان استام ۋاقىت ىشىندە بۇل اقپارات قۇرالدارى قازاق جۋرناليستيكاسىنىڭ قارا شاڭىراعىنا اينالدى. جاسامپاز ىستەردىڭ جارشىسى وقىرمان قاۋىمنىڭ رۋحاني شامشىراعى رەتىندە تانىلدى. بۇگىندە بۇل باسىلىمداردىڭ قىزمەتكەرلەرى اعا بۋىن سالعان سارا جولدى لايىقتى جالعاستىرىپ كەلەدى. سىزدەر ۇلتتىڭ جاڭا ساپاسىن قالىپتاستىرۋ جولىندا قاجىرلى ەڭبەك ەتىپ جۇرسىزدەر. الداعى ۋاقىتتا دا شىنايى اقپارات پەن ساپالى ساراپتامانى باسشىلىققا الىپ, ءوز مىندەتتەرىڭىزدى ابىرويمەن اتقارا بەرەسىزدەر دەپ سەنەمىن. بارشاڭىزعا ريزاشىلىعىمدى بىلدىرەمىن جانە باق-بەرەكە, تولايىم تابىس تىلەيمىن!», دەلىنگەن پرەزيدەنت قۇتتىقتاۋىندا.
دوڭگەلەك ۇستەل بارىسىندا ۇلتتىق ءباسپاسوزدىڭ, ونىڭ ىشىندە «Egemen Qazaqstan» مەن «كازاحستانسكايا پراۆدا» باسىلىمدارىنىڭ قوعامداعى ورنى, اقپارات ايدىنىنداعى الەۋەتى جانە ولاردىڭ ۇلتتىق مۇددەنى قورعاۋداعى ماڭىزى تالقىعا سالىندى.
بەلگىلى جۋرناليست ساۋىتبەك ابدراحمانوۆ سالاداعى جاڭا باستامالار مەن رەفورمالار تۋرالى ويىن ورتاعا سالدى. گازەت وقىرماندارىنىڭ سانىن ارتتىرۋ ءۇشىن جان-جاقتى جۇمىس جۇرگىزۋ قاجەتتىلىگىن جەتكىزدى.
«ەكونوميكالىق تۇرعىدان ءتيىمسىز بولعانىمەن, ۇلتتىق باسىلىمدارعا مەملەكەت تاراپىنان قولداۋ كورسەتىلۋى كەرەك. سەبەبى گازەت – ۇلت رۋحانياتىنىڭ التىن ۇستىنى», دەدى س. ابدراحمانوۆ.
ارداگەر جۋرناليست جانات ەلشىبەك قازاق ءباسپاسوزىنىڭ دامۋ ۇدەرىسى تۋرالى ءسوز سويلەپ, بۇگىنگى كۇننىڭ جۋرناليسىنە قاجەت قابىلەتتەر تۋرالى پىكىرىن ءبىلدىردى. گازەت شىعارۋ بارىسىندا الدىڭعى تولقىن اعالار مەن كەيىنگى تولقىن ىنىلەردىڭ ساباقتاستىعى مەن رۋحاني بايلانىسىنىڭ ماڭىزدىلىعىن اتاپ ءوتتى.
سونىمەن قاتار جۋرناليستەر قاسىم-جومارت توقاەۆتىڭ سۇحباتىندا ايتىلعان «ازاماتتاردىڭ جاسامپازدىق الەۋەتىن ارتتىرۋ ءۇشىن پايدالى ينۆەستيتسيا» جاساۋ ماسەلەسىن تالقىعا سالدى. مەملەكەتتىڭ تۇتاستىعى مەن رۋحاني بىرلىگىن قالىپتاستىرۋداعى باق وكىلدەرىنىڭ ماڭىزى جونىندە وي قوزعادى.
جيىن سوڭىندا تاۋەلسىزدىكتىڭ رامىزىندەي بولعان قوس باسىلىم «Egemen Qazaqstan» مەن «كازاحستانسكايا پراۆدا» گازەتتەرىنىڭ ارداگەرلەرى قىزمەتتەگى ارىپتەستەرىنە ەستەلىكتەرىن ايتىپ, اق جول تىلەدى.
