شاراينا
يوردانيا باسشىلىعى «يسلام مەملەكەتى» دەلىنەتىننىڭ وتكەن جىلدىڭ اياعىندا تۇتقىنعا تۇسكەن اسكەري ۇشقىشتى تىرىدەي ورتەپ جىبەرۋىنە كەك قايتارۋ ماقساتىندا قاماۋداعى تەررورشى ايەل سادجيدا ءال-ءريشاۆيدى ءولتىردى.
جاقىن كۇندەرى باسقا دا تەررورشىلار ءولىم قۇشپاق. ال يوردانيا كورولى ابداللا ءىى ۇشقىش مواز ءال-كاسسابەحتىڭ قازاسىنا وراي, اقش-قا ساپارىن ءۇزىپ ەلگە ورالعان سوڭ, حالىققا بەينەۇندەۋ جولدادى. كوشەگە شىققان جۇرتشىلىق وكىلدەرى دە سيريا اۋماعىنداعى «يسلام مەملەكەتى» جاساقتارىنا سوققى بەرىپ, كەك قايتارعىلارى كەلەتىنىن اتاپ كورسەتتى. بۇعان دەيىن يوردانيا ۇكىمەتى ءال-كاسسابەحتى جانكەشتى ءال-ريشاۆيگە ايىرباستاۋ تۋرالى كەلىسىمگە بارۋعا دايىن ەكەنىن مالىمدەگەن ەدى.
نوسەر جاڭبىردىڭ زاردابى اۋىر
بالقان مەملەكەتتەرى نوسەر جاڭبىر تۋىنداتقان تابيعات اپاتىنان ۇلكەن زارداپ شەكتى. ماسەلەن, ماكەدونيادا توتەنشە جاعداي جاريالاندى.
البانيا فەرمەرلەرىنىڭ جەرلەرىن قارعىن سۋ باسىپ قالۋى سالدارىنان ولار ۇلكەن شىعىنعا ۇشىرادى. بولگارياداعى جاعداي دا وڭىپ تۇرعان جوق. جۇزدەگەن ادام تىكۇشاقتارمەن قاۋىپسىز جەرلەرگە جەتكىزىلگەن. كوپتەگەن ۇيلەر جەرمەن-جەكسەن بولىپ قيراعاندىقتان, مىڭداعان ادام باسپاناسىز قالىپ وتىر. ماكەدونياداعى, البانيا مەن بولگارياداعى كەيبىر ەلدى مەكەن تۇرعىندارى قازىرگى تاڭدا كۇنكورىس كوزىنەن مۇلدەم ايرىلعان. ەندى ولاردىڭ بار ءۇمىتى مەملەكەت تاراپىنان بەرىلەتىن جاردەمگە بارىپ تىرەلەدى. ال ەل ۇكىمەتتەرى بولسا ازىرشە ەشكىمگە ەشقانداي ۋادە بەرىپ وتىرعان جوق.
500 مىڭ ەۋرودان ايىرىلدى
كيپرلىك كەدەنشىلەر اتالعان ارال مەملەكەتتەن 500 مىڭ ەۋرونى افيناعا الىپ وتپەكشى بولعان گرەكيالىق بيزنەسمەننىڭ جوعارى سوماداعى قولما-قول اقشاسىن تارتىپ الدى. بۇل تۋرالى «رەيتەر» اگەنتتىگى حابارلادى.
اتى-ءجونى ايتىلمايتىن كاسىپكەر كيپرلىك بانكتەر جارتى ميلليون ەۋرونى ەسەپكە الۋدان باس تارتقاننان كەيىن وسىناۋ مول اقشامەن ەلىنە ۇشپاقشى بولعان. گرەكيا تۇرعىنى وسى ۇلكەن سومانى كيپرگە 200 جانە 500 ەۋرولىق كۋپيۋرالارمەن قول جۇگىنە سالىپ اكەلگەن. كەدەن قىزمەتكەرلەرىنىڭ پايىمىنشا, بانكتەر گرەكيالىقتىڭ اقشاسىن ونى قايدان العانى تۋرالى قۇجاتى بولماعاننان كەيىن جانە شەكارادان وتكەن كەزدە دەكلاراتسيالاماعان سوڭ ەسەپكە قويماعان. ال كيپر زاڭدارىنا سايكەس, 10 مىڭ ەۋرودان اساتىن سوما كەدەندە دەكلاراتسيالانۋى ءتيىس.
تايۆاندا ۇشاق اپاتقا ۇشىرادى
تايۆاندا جولاۋشىلار ۇشاعى اپاتقا ۇشىراعان بولاتىن. اۋەلدە 12 ادام قازا تاۋىپ, 16-سى قۇتقارىلدى جانە 30-ى ءىز-ءتۇزسىز جوعالىپ كەتتى دەلىنسە, سوڭعى مالىمەت بويىنشا كوز جۇمعاندار سانى 19-عا دەيىن جەتىپ وتىر.
TransAsia اۆياكومپانياسىنىڭ اتقارۋشى ديرەكتورى چەن چيندە ۇشاقتىڭ قۇلاعانى ءۇشىن قازا بولعان جولاۋشىلاردىڭ تۋعان-تۋىسقاندارىنان كەشىرىم وتىنگەن. ATR 72-600 ۇشاعىنىڭ بورتىندا جولاۋشىلار مەن ەكيپاج مۇشەلەرىن قوسا العاندا 58 ادام بولىپتى. ال ول ەل استاناسى تايبەيگە جاقىن ماڭدا اۋەگە كوتەرىلگەن سوڭ بىرنەشە مينۋتتان كەيىن وزەنگە قۇلاپ تۇسكەن. جولاۋشىلاردىڭ 31-ءى قۇرلىقتىق قىتايدان كەلگەن تۋريستەر كورىنەدى. ال اۋەگە كوتەرىلەر الدىندا ۇشاق قاناتىمەن اۆتوموبيل ەستاكاداسىن جانە ونىڭ ۇستىندە تۇرعان تاكسيدى قاعىپ كەتكەن.
پويىز بەن دجيپ سوقتىعىسىپ قالدى
اقش-تىڭ ەڭ ۇلكەن مەگاپوليسى – نيۋ-يورك قالاسىنىڭ تۇبىندەگى ۆەلحاللا اۋدانىندا پويىز بەن جولسىز جەرلەرمەن جۇرۋگە ارنالعان دجيپ كولىگى سوقتىعىسىپ قالدى. اپات سالدارىنان شىققان ورتتەن 6 ادام ومىرىمەن قوشتاستى. تاعى 12 ادام زارداپ شەككەن.
لوكوموتيۆ ءدجيپتى 10 ۆاگونداي جەرگە سۇيرەپ اپارعان. ال اۆتوموبيلدە پايدا بولعان ءورت پويىزدى دا شارپىپ, ءبىرىنشى ۆاگوندا ءورت شىققان. وقيعا ورنىنا ءورت سوندىرۋشىلەر مەن دارىگەرلەر تەز جەتكەنىمەن, ادام ءولىمىنىڭ الدىن الىپ ۇلگەرمەگەن. پويىزدا بارلىعى 800 جولاۋشى كەلە جاتسا كەرەك. ولاردىڭ 400-ءىن قۇتقارۋشىلار جەرگىلىكتى سپورت ورتالىعىنا جەتكىزىپتى. جولاۋشىلاردى دىتتەگەن جەرلەرىنە اپارۋ ءۇشىن وقيعا ورنىنا ونداعان اۆتوبۋس اتتاندىرىلعان.
ءوز قولىن ءوزى كەسكەن قىتايلىق جاس
قىتايدىڭ تسزيانسۋ پروۆينتسياسىنداعى نانتونگ قالاسىندا 19 جاسار قىتايلىق كومپيۋتەر ويىنىنان ءوزىن اراشالاپ الۋ ءۇشىن, ياعني كومپيۋتەرگە تاۋەلدىلىكتەن قۇتىلۋ ءۇشىن ءوز قولىن ءوزى كەسكەن. جاس جىگىت ۇيىنەن ارنايى الىپ شىققان اس پىشاعىمەن قولىن بىلەكتىڭ تۇبىنەن كەسىپ تاستاعان.
سودان كەيىن ۆان ەسىمدى قىتايلىق تاكسي شاقىرتىپ, اۋرۋحاناعا كەتسە, قولى ءوزى وتىرىپ كەسكەن ورىندىق ۇستىندە قالا بەرگەن. «بۇل وقىس وقيعا ميىمىزعا قونبايدى. ول قاشاندا ءار ءىسىن كەسىپ-ءپىشىپ ىستەيتىن اقىلدى بالا ەدى», دەيدى ءجاسوسپىرىمنىڭ اناسى. ول, سونداي-اق, ۇيىنەن شىعاردا اناسىنا قاعاز جازىپ قالدىرىپتى. وندا: «ماما, مەن اۋرۋحاناعا كەتتىم, ۋايىمداما. كەشكە كەلەمىن», دەپ جازىلعان ەكەن. پوليتسيا قىزمەتكەرلەرى قولىنىڭ قالدىعىن تاۋىپ اۋرۋحاناعا اپارعاننان كەيىن دارىگەرلەر ونى جاس جىگىتكە وتا جاساپ تىگىپ بەرىپتى.
قىسقا قايىرىپ ايتقاندا:
*رەسەي سىرتقى ىستەر ءمينيسترى سەرگەي لاۆروۆ ولەڭدەرىن «رۋسسكي پيونەر» جۋرنالىندا جاريالاعان. توپتاماعا لاۆروۆتىڭ ەرتەدەگى ءۇش ولەڭى كىرىپتى. لاۆروۆ اتالعان لاۋازىمعا 2004 جىلى كەلسە, وعان دەيىنگى 10 جىلىن رەسەيدىڭ بۇۇ-داعى تۇراقتى وكىلى رەتىندە وتكىزگەن بولاتىن.
*گرۋزيانىڭ شىعىسىنداعى كاحەتيادا ادامعا پىشاقپەن شابۋىل جاساعانى ءۇشىن ەكى جىلعا باس بوستاندىعىنان ايىرىلعان ەر ادام سوت زالىنان قاشىپ كەتكەن. 21 جاستاعى دميتري حاچياشۆيلي ارنايى تەمىر قورشاۋعا قامالعان ەكەن. ول جاقىن تۇرعان ۇستەلدەگى كىلتتى بىلدىرتپەي الىپ ەسىكتى اشقان سوڭ, تەرەزەدەن سەكىرىپ كەتسە كەرەك.
*2004 جىلدىڭ قورىتىندىسى بويىنشا, رەسەيدە شوشقا ەتىنىڭ ءوندىرىسى 4,7 پايىزعا, ياعني 207,8 مىڭ تونناعا ءوسىپتى. رەسەي اۋىل شارۋاشىلىعى مينيسترلىگىنىڭ دەرەكتەرىنە قاراعاندا, شارۋاشىلىقتار شوشقا سانىن 19,6 ميلليون باسقا دەيىن جەتكىزگەن.
*اقش-تىڭ تەحاس شتاتىنداعى سان-انتونيو مەيرامحاناسى كليەنتتەر تارتۋ ءۇشىن وزىندە قىزمەت كورسەتەتىن داياشىلاردى ىشكى كيىمدەرىنە دەيىن شەشىندىرۋ قادامىنا بارعان. مەيرامحانا يەسى ميلو ليناننىڭ سوزىنە قاراعاندا, ول مەكەمەنى وسىدان ەكى اي بۇرىن اشىپتى. ءوزى دە بىرنەشە جىل بويى داياشى بولىپ جۇمىس ىستەگەن كورىنەدى.
ينتەرنەت ماتەريالدارى نەگىزىندە ازىرلەندى.
