1998 جىلى ماسكەۋدە دۇنيەجۇزىلىك جاسوسپىرىمدەر ويىندارىنىڭ تۇساۋى كەسىلدى. العاش رەت ۇيىمداستىرىلىپ وتىرعان جارىستا ەلىمىزدىڭ سپورتشىلارى كۇمىس پەن قولانى عانا ەنشىلەۋمەن شەكتەلدى. بالۋاندار دا, بوكسشىلار دا, باسقا دا سپورت تۇرلەرىنىڭ وكىلدەرىنىڭ بىردە-بىرەۋىنە باس جۇلدە بۇيىرمادى. سول ولقىلىقتىڭ ورنىن ەرلان سليامباەۆ تولتىردى. 55 كيلو سالماق دارەجەسىندە بەلدەسكەن ول باستاپقى باسەكەلەردە بەلارۋس, نيدەرلاند, تۇرىكمەنستان بالۋاندارىنىڭ اياعىن كوكتەن كەلتىرسە, جارتىلاي فينالدا ازەربايجان وكىلىن جەڭدى. فينالدىق ايقاستا بەلگيالىق يۋنگ گاسكاردىڭ وسال تۇسىن وڭاي تاۋىپ, جارىس جەڭىمپازى اتاندى. وسى جارقىن جەڭىسىنەن كەيىن ە.سليامباەۆتىڭ اتاعى تىپتەن شارىقتادى.
كۇرەس الىپپەسىن تۋعان جەرى – اباي وبلىسى, ءۇرجار اۋدانىنىڭ بۇرىنعى جاربۇلاق, قازىرگى قابانباي اۋىلىندا ۇيرەنگەن ەرلان 8-سىنىپتان كەيىن الماتىداعى قاجىمۇقان اتىنداعى مەكتەپ-ينتەرناتتا شەبەرلىگىن شىڭدادى. الاكولدىڭ جاعالاۋىندا جەرگىلىكتى جاتتىقتىرۋشى سەرىكحان شارىپوۆتەن ءتالىم-تاربيە العان بوزبالا الاتاۋ باۋرايىندا كوپتەگەن دارىندى دزيۋدوشىلاردىڭ توماعاسىن سىپىرىپ, ۇلكەن ارەناعا جول اشقان ەلىمىزدىڭ ەڭ بىلىكتى باپكەرلەرىنىڭ ءبىرى ماناربەك تاۋتانوۆتىڭ قول استىندا جاتتىقتى.
الماتىعا كەلگەندە دە ەرلان «كوپتىڭ ءبىرى ەمەس» ەكەندىگىن ءاۋ باستان-اق اڭعارتادى. جاتتىعۋ زالىندا شەلەكتەپ تەر توگىپ, ءار جارىستا جانىن سالىپ ايقاستى. بويى تاپال, دەنەسى شىعىرشىقتاي بوزبالا دزيۋدو كۇرەسىندەگى كۇردەلى ادىستەردى كوز ىلەسپەس جىلدامدىقپەن ورىنداپ, كوپشىلىك نازارىن بىردەن وزىنە اۋدارادى.
كوپ ۇزاماي ە.سليامباەۆتىڭ جەڭىستى جولى باستالدى. 1996 جىلى جاسوسپىرىمدەر بىرىنشىلىگى مەن وزبەكستاننىڭ شىرشىق قالاسىندا وتكەن حالىقارالىق تۋرنيردە ءۇشىنشى ساتىعا جايعاستى. كەلەسى جىلى گەرمانيا مەن تۇركياعا ساپار شەگىپ, برەمەندە باس جۇلدەنى ولجالاسا, انكارادا قولا مەدالدى موينىنا ءىلدى. 1997–1998 جىلدارى قاتارىنان ەكى رەت ەل چەمپيوناتىندا الدىنا جان سالمادى.
عاسىرلار توعىسىندا ەرلان 66 كيلو سالماق دارەجەسىنە اۋىستى. جاڭا سالماققا بەيىمدەلۋ وڭاي بولماعانىمەن, ەلىشىلىك جارىستاردا ۇنەمى جەڭىمپازدار, جۇلدەگەرلەر ساناتىندا ءجۇردى. 2002 جىلى پۋساندا الاۋى تۇتانعان ازيا ويىندارىنا قاتىسىپ, بەسىنشى ورىنعا تابان تىرەدى. 2003 جىلى چەدجۋدە (وڭتۇستىك كورەيا) ۇيىمداستىرىلعان قۇرلىق چەمپيوناتىن قولا مەدالمەن قورىتىندىلادى. سودان افينا وليمپياداسىندا اتوي سالۋدى ارماندادى.
2004 جىلى الماتىدا ازيا چەمپيوناتى ءوتتى. وسى جارىستا وليمپيا ويىندارىنىڭ جولدامالارى ساراپقا سالىندى. ۇلتتىق قۇراما باپكەرلەرى «قۇرلىقتىڭ باستى دوداسىندا 66 كيلو سالماق دارەجەسىندە كىم كۇرەسۋگە لايىق؟» دەگەن ساۋالعا ءبىراز باس قاتىردى. سودان ءۇش ۇمىتكەردى ىرىكتەپ الىپ, ءوزارا بەلدەستىرۋدى ءجون كوردى. بۇل تارتىستا ەرلان دارىندى جاس ارسەن ءحاتيپتى ۇتقانىمەن, تاجىريبەلى مۇراتبەك قىپشاقباەۆقا ەسە جىبەردى. وسى ساتسىزدىكتىڭ سالدارىنان ازيا چەمپيوناتىنا قاتىسىپ, وليمپيادا جولداماسىنا تالاسۋ مۇمكىندىگىنەن ايىرىلدى. بۇل جاعداي وعان اۋىر ءتيدى. البەتتە, ءار سپورتشىنىڭ باستى ارمانى – وليمپيا ويىندارىندا ونەر كورسەتىپ, جەڭىس تۇعىرىنا كوتەرىلۋ. الايدا جاستايىنان دارا تالانتىمەن وقشاۋلانعان نامىسقوي جىگىت دىتتەگەن ماقساتىنا جەتە المادى. سودان سوڭ ۇلكەن سپورتتان قول ءۇزدى. ول كەزدە ەرلان نەبارى 23 جاستا ەدى...
– ارادا تالاي جىل وتسە دە, وكىنىشتىڭ ورنى تولمايدى ەكەن. عالامدىق دوداعا قاتىسا الماعانىم ەسىمە تۇسسە, كۇنى بۇگىنگە دەيىن كوڭىلىم نىلدەي بۇزىلادى. وتكەنگە زەر سالسام, ەشكىمنەن از ەڭبەكتەنبەگەنىم انىق. جاتتىعۋ زالىندا ايانعان ەمەسپىن. جاۋاپتى جارىستاردا وزىمە جۇكتەلگەن مىندەتتى اركەز ابىرويمەن اتقارۋعا تىرىستىم. قانداي دا بيىك بەلەستەردى باعىندىرۋعا بويىمداعى كۇش-قۋاتىم مەن قارىم-قابىلەتىمنىڭ جەتەتىنىنە كۇماندانعان كەزىم جوق. بىراق اتام قازاق «تاۋداي تالاپ بەرگەنشە, بارماقتاي باق بەرسىن» دەگەن اتالى ءسوزدى بەكەر ايتپاعان ەكەن. بالكىم, ماعان سول بارماقتاي باق جەتىسپەگەن بولار... بۇگىندە بايقاسام, جەڭىپ العان جۇلدەلەرىمدى تىزبەلەسە ءبىر بەتتەن ەركىن اسادى ەكەن. سوعان قاراپ, كوڭىلىم كادىمگىدەي كوتەرىلەدى. «وليمپياداعا بارماساق تا, ءبىز دە ءبىر كىسىدەي كۇرەسىپپىز عوي» دەپ ءوز-ءوزىمدى جۇباتىپ وتىرامىن, – دەپ ەرلان ەزۋ تارتتى.
سپورتتىق مانسابىن اياقتاعاننان كەيىن ەرلان ءتۇرلى كاسىپتىڭ تۇتقاسىن ۇستادى. كوممەرتسيالىق ۇيىمداردا جۇمىس ىستەدى, بيزنەسپەن اينالىستى, «قازپوشتانىڭ» فيليالىن باسقاردى, الماتىداعى «ارلان» بازارىنىڭ ديرەكتورى, حالىققا قىزمەت كورسەتۋ ورتالىعى باسشىسىنىڭ ورىنباسارى بولدى. قاي جەردە جۇرسە دە سۇيىكتى سپورتىنان الىستاعان جوق. ارا-تۇرا جارىستار ءوتىپ جاتقان جەرلەرگە ات باسىن بۇرىپ, باسەكەلەردى قىزىعا تاماشالاۋدى, جالىنداپ ءوسىپ كەلە جاتقان جاستارعا قامقورلىق كورسەتۋدى داعدىعا اينالدىرعان. وسى جاعدايدىڭ بارلىعى دزيۋدو فەدەراتسيا باسشىلىعى تاراپىنان ەسكەرۋسىز قالعان جوق. ولار ىسكەر ءارى جومارت جىگىتتىڭ ەڭبەگىن دۇرىس باعالادى. جۋىردا ەرلان قاپسەمەت ۇلى الماتى قالالىق دزيۋدو فەدەراتسياسىنىڭ ۆيتسە-پرەزيدەنتى قىزمەتىنە تاعايىندالدى.
شىنى كەرەك, كۇرەستىڭ بۇل ءتۇرى الاتاۋ باۋرايىنداعى اسەم شاھاردا تۇرالاپ تۇر. ۇلتتىق قۇراما ساپىندا الماتىنىڭ ەكى بالۋانى عانا بار. ولار – عاليا تىڭباەۆا, شەرزات داۆلاتوۆ. ارينە, 2,2 ميلليونان اسا حالقى بار مەگاپوليسكە بۇل تىم از. مىنە, سول ولقىلىقتىڭ ورنىن تولتىرۋ ەرلان سليامباەۆ سەكىلدى كۇرەستىڭ «وتىمەن كىرىپ, ك ۇلىمەن شىققان» ىسكەر ازاماتتارعا جۇكتەلىپ وتىر.
ايتا كەتكەن ءجون, الاكولدىڭ ءدال جاعالاۋىندا ورنالاسقان قابانباي اۋىلىنان ەرلان سليامباەۆتان بولەك, تاعى بىرنەشە تانىمال بالۋان شىقتى. سول ساڭلاقتار اراسىنان ساعدات سادىقوۆ پەن ەركەبۇلان قوساەۆتىڭ شوقتىعى بيىك. ولاردىڭ ەكەۋى دە وليمپيا ويىندارىندا كۇش سىناستى. ساعدات 2000 جىلى سيدنەي, 2004 جىلى افينادا ايقاسسا, ەركەبۇلان 2012 جىلى لوندوندا ەل نامىسىن قورعادى. وكىنىشكە قاراي, بابى كەلىسكەنىمەن, باعى كەم بولعان ەرلانعا ونداي باقىت بۇيىرمادى.
