فوتو: liter.kz
قوماقتى قارجى قۇيىلعانمەن بايراقتى باسەكەلەردە جوعارى ناتيجە بايقالماعان. الەمدىك سپورت رەيتينگىندە قازاقستان 2014 جىلى 25-ورىندا بولسا, 2023 جىلى 42-ورىنعا ءتۇسىپ قالعان. بۇرىن بولىنگەن اقشانىڭ 60 پايىزى وليمپيادالىق ەمەس سپورت تۇرلەرىنە باعىتتالعانىن ايتقان دەپۋتات نارتاي ارالباي ۇلى جوعارى جەتىستىكتەر سپورتىنىڭ ناقتى انىقتاماسى بەكىتىلگەنىن حابارلادى.
«ەندى جوعارى جەتىستىكتەر سپورتىنا - وليمپيادا, پاراوليمپيادا, سۋردليمپيادا, ازيا, پاراازيا جانە ۇلتتىق سپورت تۇرلەرى عانا ەنەدى. بۇل بۇگىنگە دەيىن تىركەلىپ كەتكەن 180-نەن استام سپورت ءتۇرىن 3 ەسە قىسقارتۋعا مۇمكىندىك بەرەدى. ماسەلەن سوڭعى 6 جىلدا 49 ملرد تەڭگە العان «بارىس» حوككەي كلۋبى, سوڭعى 6 جىلدا 50 ملرد تەڭگە العان «استانا» فۋتبول كلۋبى سىندى كوماندالاردىڭ ءار تيىن ءۇشىن ەسەپ بەرەتىن كۇنى تۋى ءتيىس. وسىنشا اقشا العانىنا قاراماستان اتالعان كوماندالاردىڭ ءوز ينفراقۇرىلىمدارى جوق. ءبىر عانا «استانا» فۋتبول كلۋبى التى جىل ىشىندە تەك فۋتبول الاڭدارى مەن عيماراتتاردى جالعا الۋعا 1,4 ملرد تەڭگە جۇمساعان», دەدى دەپۋتات.
ەل سپورتىنا سەرپىن بەرۋگە باعىتتالعان قارجىنىڭ بىراز بولىگى لەگيونەرلەردى ۇستاۋعا جۇمسالاتىنىن سىبايلاس جەمقورلىققا قارسى ءىس-قيمىل اگەنتتىگى مالىمدەگەن ەدى. تاۋەلسىزدىك العاننان بەرى قازاقستان 126 شەتەلدىك سپورتشىعا ازاماتتىق بەرگەن, بىراق ولاردىڭ ءاربىر ەكىنشىسى كەيىن ءوز ەلىنە قايتىپ كەتكەن.
«بۇدان بولەك كەي فەدەراتسيالاردىڭ زاڭ جوباسى ەندى سپورت تۇرلەرىن شەكتەيدى دەگەنى دە شىندىققا جاناسپايدى. سەبەبى زاڭ جوباسىندا 1 فەدەراتسيادا 1 سپورت ءتۇرى عانا بولادى دەپ جازىلدى, بۇل ءبىر جۇيەنى قالىپتاستىرۋ ءۇشىن كەرەك. سەبەبى كەي فەدەراتسيالاردىڭ قۇرامىنا 5-10 سپورت ءتۇرى تىركەلىپ كەتكەن. تۋريزم جانە سپورت مينيسترلىگى زاڭ جوباسىنا قاتىستى ءتۇسىندىرۋ جۇمىستارىن كوبەيتۋى قاجەت. مادەنيەت جانە اقپارات مينيسترلىگى جالعان اقپارات تاراتىپ ەلدى دۇرلىكتىرگەن اقپارات قۇرالدارى مەن ينتەرنەت قولدانۋشىلارعا ءتيىستى شارا قولدانۋى قاجەت. سپورت فەدەراتسيالارىنىڭ اقپاراتتىق جۇمىسقا قانشا قارجى جۇمسايتىنىن تەكسەرۋ كەرەك», دەدى نارتاي ارالباي ۇلى.
