• 05 اقپان, 2015

اقپاراتتار اعىنى

222 رەت

كورسەتىلدى

3 مين

وقۋ ءۇشىن

Egemen Qazaqstan

*ەلىمىزگە حالىقارالىق قايتا قۇرۋ جانە دامۋ بانكى 21,7 ملن. اقش دوللارى كولەمىندە گرانت بولەدى. ينۆەستيتسيالار جانە دامۋ ۆيتسە-ءمينيسترى البەرت راۋدىڭ ايتۋىنشا, جوبانىڭ ماقساتى – مەملەكەتتىك جانە الەۋمەتتىك نىساندارداعى ەنەرگيا تيىمدىلىگىن جاقسارتۋ باعىتىندا قارجىلاندىرۋ جۇيەسىن قۇرۋ. *«قازاگرو» حولدينگىنىڭ ينۆەستيتسيالىق قورجىنىندا 477 جوبا بار. قۇرىلىمنىڭ ءباسپاسوز قىزمەتى حابارلاعانداي, اتالمىش جوبالاردىڭ جالپى قۇنى 309,1 ملرد. تەڭگەنى قۇراپ وتىر. ولاردىڭ 365-ءى پايدالانۋعا بەرىلگەن. *الماتى وڭىرىندە ىنتىماقتاستىق تۋرالى 17 مەموراندۋم بەكىتىلدى. وبلىستىق اكىمدىكتىڭ ءباسپاسوز قىزمەتى ءمالىم ەتكەندەي, جالپى سوماسى 22,6 ملرد. تەڭگە بولعان بۇل قۇجاتتاردا جەرگىلىكتى قامتۋدى دامىتۋ, ءوڭىردىڭ ونەركاسىپ الەۋەتىن ارتتىرۋ, وندىرىستىك جاعدايدى تۇراقتاندىرۋ مەن جۇمىسشىلار كەپىلدىگى جانە ەڭبەك قۇقىعىن ساقتاۋ ماسەلەلەرى قاراستىرىلعان. *وڭتۇستىك قازاقستان ءۇيد باعدارلاماسىن ورىنداۋدا الدىڭعى قاتاردا. پرەمەر-ءمينيستردىڭ ءبىرىنشى ورىنباسارى باقىتجان ساعىنتاەۆ وڭىرگە جاساعان جۇمىس ساپارى بارىسىندا بۇل ايماقتا بۇگىندە قۇنى 230 ملرد. تەڭگەلىك 135 ينۆەستيتسيالىق جوبا ىسكە اسىرىلىپ جاتقانىن, سونداي-اق, ەلىمىزدەگى قۋاتتى يندۋستريالىق ورتالىقتاردىڭ بىرىنە اينالىپ وتىرعان وبلىس رەسپۋبليكا بويىنشا الدىڭعى ورىندا تۇرعانىن مالىمدەدى. *جامبىل ءوڭىرى بيۋدجەتىنىڭ 54,2 پايىزى شاعىن جانە ورتا بيزنەستىڭ ۇلەسىندە. وبلىستىق ەكونوميكا جانە بيۋدجەتتىك جوسپارلاۋ باسقارماسىنىڭ دەرەگىنشە, بىلتىر ايماقتا «بيزنەستىڭ جول كارتاسى - 2020» باعدارلاماسى اياسىندا جوبا جاساۋشىلارعا 12,8 ملرد. تەڭگە كولەمىندەگى مەملەكەتتىك قولداۋ كورسەتىلگەن. ايتا كەتەيىك, ءوڭىردىڭ كاسىپكەرلىك سەكتورى بيۋدجەتكە 35 ملرد. تەڭگەنىڭ ءتۇسۋىن قامتاماسىز ەتكەن. *شىعىس قازاقستاندا جالعا بەرىلەتىن تۇرعىن ۇيلەر قۇرىلىسى باستالدى. كومپانيانىڭ ءباسپاسوز قىزمەتى اتاپ كورسەتكەندەي, قازىرگى تاڭدا «قازاقستان يپوتەكالىق كومپانياسى» اق وڭىرلەردى دامىتۋدىڭ 2020 جىلعا دەيىنگى باعدارلاماسى اياسىندا سەمەيدە 2 كوپقاباتتى ءۇيدىڭ قۇرىلىس جۇمىستارىن قولعا العان. بۇل ۇيلەر جالپى اۋدانى 7 611 شارشى مەتر بولاتىن 126 پاتەرگە ەسەپتەلگەن. *اتىراۋداعى پوليپروپيلەن قاپ شىعاراتىن زاۋىت ونىمدەرى ەۋروپا نارىعىندا. ءۇيد باعدارلاماسى اياسىندا قۇرىلعان كاسىپورىن ايىنا 120 توننا پوليپروپيلەن ساتىپ الۋدى جوسپارلاپ وتىر. زاۋىتتىڭ جوبالىق قۋاتى ۇنعا, قانتقا جانە وزگە دە ونىمدەرگە ايىنا 1 ملن. دانا قاپ شىعارۋعا جەتەدى. مۇندا 185 ادام ەڭبەك ەتەدى. *پاۆلودار وبلىسىنىڭ زاڭعار اۋىلىندا «بالاپان» ورتالىعى اشىلدى. پاۆلودار اۋدانىنىڭ اكىمى نۇرلان ءاۋتالىپوۆ اتالمىش ەلدى مەكەندە مەكتەپكە دەيىنگى ءبىلىم بەرۋ ماسەلەسى شەشىمىن تاپقانىن جەتكىزدى. تۇرعىنداردىڭ ءوتىنىشى بويىنشا قاتارعا قوسىلعان ورتالىقتىڭ ارقاسىندا اۋىلدا 11 جۇمىس ورنى قۇرىلدى. حابارلار ۇكىمەت, وبلىستىق اكىمدىكتەر سايتتارى مەن «قازاقپارات» اگەنتتىگىنىڭ دەرەكتەرى بويىنشا دايىندالدى.