جاڭا جۇمىس ورىندارىن اشۋ باسەڭدەمەيدى

پرەمەر-ءمينيستردىڭ ورىنباسارى بەردىبەك ساپارباەۆتىڭ قاتىسۋىمەن پەتروپاۆل اۋىر ماشينا جاساۋ زاۋىتىندا وتكەن باسقوسۋعا مينيسترلىكتەردىڭ, ۇلتتىق كومپانيالاردىڭ وكىلدەرى, جەرگىلىكتى ءىرى كاسىپورىندار مەن اگروقۇرىلىمداردىڭ, ۆەدوموستۆولاردىڭ, سالالىق كاسىپوداق ۇيىمدارىنىڭ جەتەكشىلەرى قاتىسىپ, ۇشجاقتى كەلىسىمدەر جاسالدى. جيىندى كىرىسپە سوزبەن اشقان ايماق باسشىسى ەرىك سۇلتانوۆ وندىرىستىك ۇدەرىستەردى دامىتۋ, جۇمىسسىزدىق دەڭگەيىن ازايتۋ ماسەلەلەرىنە توقتالدى. بىلتىر كاسىپورىندار مەن ۇيىمدار 1500 مەموراندۋم مەن 3600 ۇجىمدىق شارتقا وتىرسا, بيىل 32 مىڭ ادامدى قامتيتىن 747 ۇشجاقتى كەلىسىم جاسالعان. ب.ساپارباەۆ جينالعانداردىڭ نازارىن بۇگىنگى كۇننىڭ باستى تاقىرىبىنا اينالعان الەمدەگى سايا­سي, ەكونوميكالىق كۇردەلى احۋال جايىمەن تانىستىرىپ, الداعى باستى مىندەت جاھاندىق قارجى داعدارىسىن قازاقستاندىقتار سەزىنبەيتىندەي كەشەندى شارالاردى ءجىتى ۇيىم­داستىرۋ, حالىقتىڭ تۇرمىسىن جاقسارتۋ جولىنداعى الەۋمەتتىك مىندەتتەمەلەر مەن كەپىلدىكتەردى ءسوزسىز ورىنداۋ قاجەتتىگىنە اۋداردى. بىلتىر ەلىمىزدە ەكونوميكالىق ءوسىم 4 پايىزدى قۇرادى. ۇلتتىق قوردان بولىنگەن ءبىر تريلليون تەڭگە ءتيىمدى پايدالانىلسا, 400 مىڭداي جاڭا جۇمىس ورىندارى قۇرىلادى. ول ءۇشىن ەلىمىزدە مۇمكىندىكتەر جەتكىلىكتى. جولداۋدان تۋىندايتىن باستى قاعيداتتاردى باسشىلىققا الا وتىرىپ, كوپ ەلدەردى قامتىپ وتىرعان قارجىلىق قيىندىققا توتەپ بەرۋدىڭ وڭتايلى جولدارىن تالماي قاراستىرۋ قاجەت. ەلباسىنىڭ باستى تالابى–جەرگىلىكتى تاۋار وندىرۋشىلەرگە قولداۋدى كۇشەيتۋ, ونىمدەرىمىزدى ساپالى ەتىپ شىعارۋ, جۇمىس ورىندارىن قىسقارتپاۋ, كەرىسىنشە, جاڭا ءوندىرىس ورىندارىن اشۋ. سولتۇستىك قازاقستان وبلىسى شەكارالىق ايماقتا تۇرعاندىقتان, رەسەيمەن قارىم-قاتىناس جاساۋدىڭ ماڭىزى زور. جيىندا وبلىس اكىمىنىڭ ورىنباسارى ەرلان اۋكەنوۆ ءوڭىردىڭ ونەركاسىپتىك الەۋەتىن ارتتىرۋ, قازاقستاندىق ۇلەستى كوبەيتۋ, جۇمىسشىلاردىڭ ەڭبەك قۇقىقتارى مەن كەپىلدىكتەرىن قامتاماسىز ەتۋ جايلارىن باياندادى. «جول كارتاسى-2020» باعدارلاماسىنا قاتىسۋشىلاردىڭ سانى 12 مىڭعا جەتىپ, 669 ادام جەكە كاسىبىن اشسا, 442 ادام ءناسىپ كوزدەرىن ودان ءارى كەڭەيتكەن. ورتاشا ايلىق جالاقى 10 پايىزعا ءوسىپ, جۇمىسسىزدىق دەڭگەيى 4 پايىزعا دەيىن تومەندەگەن. ۇكىمەتتىڭ ناقتى قولداۋى ارقاسىندا وبلىستاعى ماشينا جاساۋ كاسىپورىندارىنىڭ تاپسىرىسى بۇگىندە 22 ميلليارد تەڭگەگە وسكەن. بايانداماشى شەتەلدىك كومپانيالارمەن تىعىز بايلانىستىڭ ورنىققانىن ايتا كەلىپ, ءتيىستى ۆەدوموستۆولار تاراپىنان شەشىمىن كۇتكەن كەي پروبلەمالاردى تىلگە تيەك ەتتى. ماسەلەن, «بوگۆي» فير­ماسىنىڭ بانكروتقا ۇشىراۋى تاۋار وندىرۋشىلەر ءۇشىن ەلەۋلى قيىندىق تۋدىرىپ وتىرعان جايى بار. اسىرەسە, ونىڭ قۇرامىنا كىرەتىن 24 شارۋاشىلىق استىق وسىرۋدە ءبىراز قيىندىقتار كورىپ كەلەدى. ويتكەنى, جەر تەلىمدەرى مەن 4 ەلەۆاتور كەپىل رەتىندە بانكتەرگە قويىلعاندىقتان, ىركىلىستەر كوپ. سول سياقتى ماسكەۋلىك «ترانساۆتو» كومپانياسىندا ورتاشا ەڭبەكاقى مولشەرى وبلىستىق كورسەتكىشتەن 25 پايىزعا از. پەتروپاۆل اۋىر ماشينا جاساۋ زاۋىتىنىڭ باس ديرەكتورى قۋانىش ءبيشىموۆ ۇجىمدا 1500 ادام ەڭبەك ەتەتىنىن, ورتاشا ايلىق ەڭبەكاقى 100 مىڭ تەڭگەدەن اينالاتىنىن, 7,5 ميلليارد تەڭگەگە تاپسىرىستار تۇسكەنىن جەتكىزدى. بىلتىر 260 ميلليون تەڭگەنىڭ الەۋمەتتىك مىندەتتەمەلەرى ورىندالسا, بيىل بۇل كورسەتكىشتى 300 ميلليون تەڭگەگە ۇلعايتتىق. جۇمىسشى-قىزمەتكەرلەرگە ەڭبەك, تۇرمىس جاعدايلارىن جاساۋ شارالارى ۇجىمدىق كەلىسىمدە جان-جاقتى كورىنىس تاپقان, دەدى ءوز سوزىندە كاسىپورىن باسشىسى. – وسى كەزدەسۋدىڭ الدىندا كاسىپورىننىڭ تىنىس-تىرشىلىگىمەن تانىسىپ, ۇجىممەن كەزدەستىم. اۋىر ونەركاسىپ سالاسىن دامىتۋ پرەزيدەنت تاراپىنان اركەز ۇلكەن قولداۋ تاۋىپ كەلەدى. ءبارىمىزدىڭ كۇش-جىگەرىمىز ورتاق ماقساتقا ارنالىپ, داعدارىستى بولدىرماۋدىڭ, الدىن الۋدىڭ ىرگەلى مىندەتتەرى تۇر, دەگەن پرەمەر-ءمينيستردىڭ ورىنباسارى وتاندىق تاۋار وندىرۋشىلەرگە قولداۋدى ودان ءارى كۇشەيتۋدى جۇكتەدى. جيىن سوڭىندا وبلىستىق اكىمدىك, كاسىپوداق جانە ءىرى كاسىپورىندار مەن ۇلتتىق كومپانيالار اراسىندا 18 ميلليارد تەڭگەنى قۇرايتىن 14 مەموراندۋمعا قول قويىلدى. ءومىر ەسقالي, «ەگەمەن قازاقستان». سولتۇستىك قازاقستان وبلىسى.