سۋرەتتى تۇسىرگەن – ەرلان ومار, «ەQ»
مەملەكەتتىك ستيپەنديا ادەبيەت پەن ونەر سالاسىنداعى 75 ادامعا بەرىلدى.
جىل سايىن تاعايىندالاتىن بۇل ستيپەنديا – مەملەكەتتىڭ مادەنيەت جانە ونەر قايراتكەرلەرىنە, شىعارماشىلىق قىزمەتكەرلەرىنە جانە جاس دارىندارعا قولداۋى مەن قامقورلىعىنىڭ ايعاعى. سونداي-اق ولاردىڭ ۇلت مادەنيەتىن وركەندەتىپ, الەمگە تانىتۋعا قوسقان ەلەۋلى ۇلەسىنە كورسەتىلگەن قۇرمەت.
مەملەكەتتىك ستيپەنديا ءاسانالى ءاشىموۆ, ءىليا جاقانوۆ, بيبىگۇل تولەگەنوۆا, نۇرعالي ءنۇسىپجان, مەرۋەرت وتەكەشوۆا, دۋلات يسابەكوۆ, تولەن ابدىك, يۋري اراۆين, سەرجان شاكىرات, اماندوس اقاناەۆ, تاتيانا تارسكايا, گۇلۆەر رازيەۆا سەكىلدى ادەبيەت پەن ونەر مايتالماندارىنا تابىستالدى.
سونىمەن قاتار كانن حالىقارالىق فەستيۆالىنىڭ لاۋرەاتى سامال ەسلاموۆاعا, بالەرينا تاتيانا تەنگە, وپەرا ءسوليسى ماقسات ساماتوۆقا جانە وزگە دە جاس دارىندارعا مەملەكەتتىك قولداۋ كورسەتىلدى.
ستيپەنديا يەگەرلەرى مەملەكەتتىڭ قارجىلاي قولداۋى ارقاسىندا شىعارماشىلىقپەن الاڭسىز اينالىسۋعا مۇمكىندىك الادى. بۇل ستيپەنديا ەلىمىزدەگى مادەنيەت جانە ونەر سالاسىنىڭ دامۋىنا ىقپال ەتىپ قانا قويماي, تىڭ يدەيالار مەن جوبالاردىڭ ىسكە اسۋىنا سەپتىگىن تيگىزەدى.
