جولداردى سالۋ مەن جوندەۋگە قاجەتتى اقپاراتتار ءبىر جەردە توپتاسادى. بازادا كارەر, اسفالتبەتون زاۋىتتارى, جول تەحنيكاسى مەن ماتەريالدارى تۋرالى دەرەكتەردى تابۋعا بولادى. ماتەريالداردىڭ ساپاسى مەن ولاردىڭ قولدانىلۋ سالاسى تۋرالى مالىمەت تە كورسەتىلگەن. پلاتفورما ءىرى كومپانيالار ءۇشىن دە, شاعىن جانە ورتا بيزنەس ءۇشىن دە قولجەتىمدى. بازانىڭ باستى ارتىقشىلىعى – اقپاراتقا قولجەتكىزۋ جەڭىل. بۇل ءوز كەزەگىندە جوبالاردىڭ ورىندالۋىن تەزدەتۋگە جانە ولاردىڭ ساپاسىن ارتتىرۋعا كومەكتەسەدى.
«قازجولعزي» اق ۆيتسە-پرەزيدەنتى ەرىك امىرباەۆتىڭ ايتۋىنشا, بولاشاقتا بىرىڭعاي بازانى پايدالانۋ مىندەتتى بولادى. بۇل اقپاراتتى رەتتەۋگە كومەكتەسەدى جانە ۇدەرىستەردى اشىق ەتەدى.
«پلاتفورمادا ۇسىنىلعان بارلىق دەرەكتى ينستيتۋت ماماندارى تەكسەرەدى. ەندى نارىققا قاتىسۋشىلار اقپارات الۋ ءۇشىن دەلدالدارعا جۇگىنۋدىڭ قاجەتى جوق. ول تىكەلەي پلاتفورمادا قولجەتىمدى. بۇل الاياقتىق تاۋەكەلدەرىن ازايتۋعا جانە نارىقتاعى ادالدىقتى ارتتىرۋعا مۇمكىندىك بەرەدى. نارىقتىڭ كەيبىر قاتىسۋشىلارى ەسكى ادىستەرمەن جۇمىس ىستەۋگە داعدىلانعان, سوندىقتان جاڭا تەحنولوگيالارعا ساقتىقپەن قارايدى. بىراق تاجىريبە كورسەتكەندەي, يكەمدىلىك پەن قازىرگى جاعدايعا بەيىمدەلۋگە دايىن بولۋ ماڭىزدى ءارى شەشۋشى ءرول اتقارادى. ءبىزدىڭ قۇرالمەن تانىسقاننان كەيىن ادال كاسىپكەردە ەشقانداي الاڭداۋشىلىق بولمايدى», دەدى ەرىك امىرباەۆ.
پلاتفورما جۇمىسىنىڭ ءبىرىنشى جىلىندا «قازجولعزي» ازىرلەۋشىلەرى كەرى بايلانىسقا شىعىپ, ناتيجەلەردى تالداۋدى جوسپارلاپ وتىر. بۇل جۇيەنى جاقسارتۋعا جانە ونى سالانىڭ بارلىق قاتىسۋشىسى ءۇشىن ىڭعايلى ءارى ءتيىمدى ەتۋگە كومەكتەسەدى.
جول سالاسىنداعى يننوۆاتسيانى ىلگەرىلەتۋدەگى تاعى ءبىر تەتىك – «كوپىرلەردى پايدالانۋدى باسقارۋ جۇيەسىنىڭ» جاسالۋى. وتاندىق عالىمدار كوپىر قۇرىلىستارى ەكسپرەسس-مونيتورينگىنىڭ بىرەگەي موبيلدىك جۇيەلەرىن ەنگىزە وتىرىپ, ينجەنەرلىك باقىلاۋ سالاسىن دامىتا تۇسۋگە نيەتتى. جاڭا تەحنولوگيا كوپىرلەردى دياگنوستيكالاۋدىڭ تيىمدىلىگىن, ساپاسىن جانە جىلدامدىعىن ارتتىرۋدا ماڭىزدى قۇرال بولماق.
«قازىر كوپىر قۇرىلىسىن زەرتتەۋ دالالىق جۇمىستاردى دا, دەرەكتەردى كامەرالدىق وڭدەۋدى دە قامتيدى. بۇل جيىنتىعىندا ءبىر اپتاعا جۋىق ۋاقىتتى الادى. الايدا ءموبيلدى مونيتورينگ جۇيەلەرىن پايدالانار بولساق, بۇل ۋاقىت ەكى ەسە قىسقارادى», دەيدى «قازجولعزي» ۆيتسە-پرەزيدەنتى نۇرلان سمايلوۆ.
ەكسپرەسس-مونيتورينگ جۇيەسى سىزىقتىق قوزعالىس, دەفورماتسيا, ءدىرىلدى ۇدەتۋ, اكۋستيكالىق ەميسسيا بەلسەندىلىگى, سونداي-اق كوپىر قۇرىلىستارىنىڭ تۇيىسكەن بولىكتەرىندەگى قىسىمدى ولشەۋگە قابىلەتتى زاماناۋي جوعارى تەحنولوگيالىق داتچيكتەر كەشەنىمەن جابدىقتالعان. «جاڭا تەحنولوگيانىڭ ەرەكشەلىگى – ولشەۋ جۇمىستارى ءتىپتى كوپىر ارقىلى كولىك قوزعالىسى كەزىندە دە جۇرگىزىلۋى مۇمكىن. بۇل وتە ماڭىزدى. ويتكەنى قۇرىلىمدىق ەلەمەنتتەردىڭ كوپتەگەن اقاۋى جۇكتەمە كەزىندە عانا بايقالادى», دەيدى «قازجولعزي» كوپىر قۇرىلىسى باسقارماسىنىڭ باسشىسى قايسار شالقار.
مونيتورينگتىڭ ءموبيلدى جۇيەلەرى ەنگىزىلگەن سوڭ, ىقتيمال پروبلەمالار جەدەل انىقتالىپ, ولاردى جويۋ ءۇشىن شارالار قابىلدانادى. بۇل سايىپ كەلگەندە كوپىر قۇرىلىسىنىڭ قاۋىپسىزدىگى مەن سەنىمدىلىگىن ارتتىرادى. مامانداردىڭ ايتۋىنشا, ەكسپرەسس-مونيتورينگ جۇيەسىنىڭ كومەگىمەن الىناتىن دەرەكتەر بولاشاقتا ينستيتۋت ازىرلەگەن كوپىرلەردى پايدالانۋدى باسقارۋ جۇيەسىنە اۆتوماتتى تۇردە تارتىلادى.
«سۋەم ەلىمىزدە بار كوپىر قۇرىلىسىنىڭ 3D-مودەلدەرىن جانە ءاربىر نىسان دەرەكتەرىنىڭ كەڭ جيىنتىعىن ساقتايدى. سوڭعى زەرتتەۋ تۋرالى مالىمەت, گەودەزيالىق زەرتتەۋ ناتيجەلەرى, پاسپورتتىق دەرەك, جوبالاۋ-سمەتالىق قۇجاتتاما, جۇرگىزىلگەن جوندەۋ بويىنشا اتقارۋشىلىق قۇجاتتاما جانە باسقا دا كەشەندى ءتاسىل ءاربىر كوپىردىڭ جاي-كۇيى مەن پايدالانۋ تاريحىن جان-جاقتى ءتۇسىنۋدى قامتاماسىز ەتەدى», دەيدى ينستيتۋتتىڭ سىرتقى كوممۋنيكاتسيالار قىزمەتىنىڭ باسشىسى ادينا ايناەۆا.
