ءىس-شاراعا جاڭاوزەن قالاسىنىڭ اكىمى جانسەيىت قاينارباەۆ, «قازمۇنايگاز» ۇلتتىق كومپانياسى باسقارما توراعاسىنىڭ كەڭەسشىسى گۇلشارا ابدىقالىقوۆا, Bilim Foundation كورپوراتيۆتىك قورىنىڭ پرەزيدەنتى ەرلان ايتمۇحامبەت قاتىستى. جوبا «قازمۇنايگاز» ۇلتتىق كومپانياسى مەن Samruk-Kazyna Trust الەۋمەتتىك جوبالاردى دامىتۋ قورىنىڭ قولداۋىمەن جانە Bilim Foundation ۇيىمداستىرۋىمەن جۇزەگە اسىپ كەلەدى. Bilim Foundation قورىنىڭ پرەزيدەنتى ەرلان ايتمۇحامبەتتىڭ ايتۋىنشا, قازىرگى تاڭدا باعدارلاما اياسىندا مىڭنان اسا ماڭعىستاۋلىق جاس ءبىلىم الىپ جاتىر.
«جارقىن بولاشاق» باعدارلاماسى قازاقستاننىڭ ادامي كاپيتالىن دامىتۋعا ىقپال ەتىپ, جاستاردىڭ بولاشاعىن جارقىن ەتۋدى كوزدەيدى. باعدارلاما جاستاردىڭ ادال, ءبىلىمدى, تانىمى كەڭ جانە كاسىبي بىلىكتى مامان بولىپ قالىپتاسۋىنا ىقپال ەتەدى دەپ سەنەمىز, دەيدى ەرلان ايتمۇحامبەت.
باعدارلاماعا 12-22 جاس ارالىعىنداعى جاڭاوزەن قالاسى مەن ماڭعىستاۋ, تۇپقاراعان, قاراقيا, مۇنايلى, بەينەۋ اۋداندارىنىڭ جاستارى قاتىسا الادى. جاستار قازاقستاننىڭ ۇزدىك وقۋ ورىندارىندا تەگىن ءبىلىم الىپ, جاتاقحانامەن قامتىلادى. سونىمەن قاتار جوعارىلاتىلعان شاكىرتاقىعا جانە بەلگىلەنگەن مولشەردە جول شىعىندارىن وتەيتىن اقىعا يە بولا الادى. بۇدان بولەك گرانت يەگەرلەرىنە مەنتورلىق جانە پسيحولوگيالىق قولداۋ كورسەتىلەدى.
«مەن سولتۇستىك قازاقستان جوعارى كاسىبي-پەداگوگيكالىق كوللەدجىنىڭ ەكىنشى كۋرسىندا «جول قوزعالىسىن ۇيىمداستىرۋ» ماماندىعى بويىنشا ءبىلىم الىپ جاتىرمىن. تەگىن ءبىلىم مەن شاكىرتاقىدان بولەك, باعدارلاما ءومىرىمدى تۇبەگەيلى وزگەرتۋگە مۇمكىندىك بەردى. ءبىلىمىمدى جەتىلدىرىپ قانا قويماي, ءوزىمدى سپورتتا, ونەردە جانە دەباتتا بايقاپ كوردىم. الداعى ۋاقىتتا بىلىكتى مامان بولىپ, ەلىمە قىزمەت ەتكىم كەلەدى», دەيدى گرانت يەگەرى اقتاي حالداۆلەتوۆ.
باعدارلاما اياسىندا ماڭعىستاۋلىق جاستار استانا, الماتى, قاراعاندى, قوستاناي, تاراز, سەمەي, كوكشەتاۋ, وسكەمەن جانە پەتروپاۆل قالالارىندا ورنالاسقان ەلىمىزدىڭ ۇزدىك مەكتەپتەرى مەن كوللەدجەرىندە ءبىلىم الا الادى. قاتىسۋشىلارعا 100-گە جۋىق تەحنيكالىق جانە گۋمانيتارلىق ماماندىقتار ۇسىنىلعان, ولاردىڭ قاتارىندا ءىت, مەديتسينا, پەداگوگيكا, تۋريزم سياقتى سالالار بار.
«مەنىڭ ەكى بالام وسى باعدارلاما بويىنشا گرانتتا ءبىلىم الىپ جاتىر. باعدارلاما بىزگە ۇلكەن قولداۋ بولدى. بالامنىڭ بىلىمىنە عانا ەمەس, تۇلعا رەتىندە دامۋىنا دا ەرەكشە ءمان بەرەتىن وسىنداي باعدارلاما بارى شىن قۋانتادى. بالالارىمىزدىڭ تالانتى مەن ەڭبەگىن كورسەتكەن كونتسەرت ءۇشىن دە العىسىمدى بىلدىرگىم كەلەدى», دەيدى باعدارلاما قاتىسۋشىلارىنىڭ اناسى ايسۇلۋ راحىمجانقىزى.
مادەني شارا بارىسىندا جاڭاوزەن تۇرعىندارى قىزىقتىرعان سۇراقتارىنا جاۋاپ الدى.
