فوتو: qazaqculture.com
ايتا كەتەيىك, ANAU-MYNAU كورمەسى ءار ەلدىڭ تۇكپىر-تۇكپىرىنەن كەسكىندەمە جانە گرافيكا سالاسىندا جۇمىس ىستەيتىن 35 تالانتتى سۋرەتشىلەردىڭ باسىن قوستى. ولاردىڭ شىعارماشىلىق ىزدەنىستەرى زاماناۋي وتاندىق ونەردىڭ بىرەگەي تۇلعاسىن قالىپتاستىرادى.
«ەندى بۇل جەردە ەكى جىل سايىن بيەننال وتكىزىپ, جاس سۋرەتشىلەرگە وزدەرىن كورسەتۋگە مۇمكىندىك بەرەمىز. ءبىز كورمەگە 8 اي دايىندالدىق. تۇجىرىمدامانى تاڭداپ, وتىنىمدەردى قابىلدادىق. ىرىكتەۋ كەزىندە جانرعا دا, تەحنيكاعا دا شەكتەۋ قويىلعان جوق, ويتكەنى اركىمنىڭ ءوز كوركەم ءتىلى بار. شىعارمانىڭ يدەياسىنا جانە ورىندالۋ ساپاسىنا كوبىرەك نازار اۋداردىق. ناتيجەسىندە ۇزدىكتەردى ىرىكتەپ الدىق جانە ولارمەن بايقاۋعا قاتىسۋشى رەتىندە ەمەس, سۋرەتشى رەتىندە جۇمىس ىستەۋگە نيەتتىمىز», دەدى «Kulanshi» زاماناۋي ونەر ورتالىعىنىڭ كۋراتورلىق كەڭەسىنىڭ ءتورايىمى لەيلا ماحات.
جاستار ونەرىنىڭ ءبىرىنشى بيەننالەسى سۋرەتشىلەردى قولداۋداعى ماڭىزدى قادام. بۇل جەردە الەم جاس شەبەرلەردىڭ كوزىمەن الۋان ءتۇرلى شىعارمالاردا بەينەلەنگەن. سونىڭ ءبىرى جاس سۋرەتشى ارۋزات تىلەپ ءوز وتىنىشىمەن اجەسى ءۇمىتتىڭ پورترەتىن ۇسىنعان.
«وكىنىشكە وراي, مەن اجەمدى ومىردە كورمەدىم. بىراق ءبارى مەنىڭ وعان ۇقسايتىنىمدى ايتادى. اجەمنىڭ بەينەسىنەن شابىتتانىپ, وسى سۋرەتتى وعان ارناۋدى ءجون كوردىم. مەن ءارتۇرلى ماتەريالداردى قولداندىم: گيپس جانە ماتا. تاعى ءبىر تۋىندىم «نازار» دا وسىندا قويىلعان. ەكى كارتينا دا بۇرىن ەش جەردە كورسەتىلمەگەن. «نازار» شىعارماسىندا تابيعاتقا دەگەن سۇيىسپەنشىلىگىمدى ءبىلدىردىم. مەن قوستاناي وبلىسىنىڭ تۋماسىمىن. بىردە اعاشتارداعى كەسىلگەن بۇتاقتاردىڭ كوزگە ۇقسايتىنىن بايقادىم. اعاشتار بىزگە قاراپ تۇرعانداي بولدى. وسى وي مەنى شابىتتاندىردى», دەيدى ارۋزات تىلەپ.
پورترەت جانرى بيەننالەدە سونىمەن قاتار ياروسلاۆا تيششەنكونىڭ تۋىندىلارى ۇسىنىلعان. اۆتور ءوزىنىڭ تاڭدالعان جۇمىستارىمەن قازىرگى قازاقستاننىڭ كەلبەتىن كورسەتكىسى كەلگەن. سۋرەتشىنىڭ ايتۋىنشا, قازىر كورمەلەردە قاراپايىم ادامداردىڭ پورترەتتەرى سيرەك كەزدەسەدى.
«وسى ەكى پورترەت ارقىلى قىزمەت كورسەتۋ سالاسىنىڭ ادامدارىنا: كوشە سىپىرۋشىلارعا, تروللەيبۋس جۇرگىزۋشىلەرىنە جانە ەلەنە بەرمەيتىن ماماندىق يەلەرىنىڭ بارىنە قۇرمەت كورسەتكىم كەلەدى. جۇمىس فورماسى ادامدى تۇلعاسىزداندىرادى, بىراق ونىڭ ارتىندا ادەتتە قيىن تاعدىر, باسىنان وتكەرگەن جول جاتىر», دەدى ياروسلاۆا تيششەنكو.
سونىمەن قاتار كورمەدە سۋرەتشى ەۆگەنيا گرەكينا كومپيۋتەرلىك الگوريتمدەردىڭ ءتىرى ادامنىڭ ويلاۋىنا قالاي اسەر ەتەتىنى تۋرالى ءوز ويلارىن بىلدىرەتىن ابستراكتسيانى ۇسىنعان.
ال, ءسىبىر سۋرەتشىسى ماريا ۆولىنسكيح قازاقستانعا ەكى جىل بۇرىن كوشىپ كەلگەن. ونىڭ كارتيناسى كەلۋشىلەردى سىبىرلىك گيلەاد فولكلورلىق توبىمەن تانىستىرعان.
سۋرەتشى مۇرات يسمۇحان بيەننالە كەلۋشىلەرىن قىس مەزگىلىندە كوكتەمگى شابىتپەن جىلىتۋدى ءجون كورگەن. ول بايقاۋعا بىردەن بەس جۇمىسىن ۇسىنعان. ناتيجەسىندە, «كوكتەم» كارتيناسى ىرىكتەۋدەن ءوتىپ, بىراق ول جەكە كوللەكتسياعا ساتىلىپ كەتكەنى بەلگىلى بولدى.
جالپى, كورمەدەگى ءاربىر كارتينادا بەلگىلى ءبىر ماعىنالىق مازمۇن بار. جاس اۆتورلاردىڭ شىعارمالارىنان بەينەلەۋ ونەرى ارقىلى ءوزىن تانىتۋعا دەگەن ۇمتىلىس سەزىلەدى.
