فوتو: اشىق دەرەككوز
ازەربايجاننىڭ دەنساۋلىق ساقتاۋ مينيسترلىگىنىڭ مالىمەتىنشە, 22 جاستاعى ازامات 2-11 قاڭتار ارالىعىندا شەتەلدە ساپاردا بولعان. ەلگە ورالعاننان كەيىن بىرنەشە كۇن وتكەن سوڭ ول السىزدىككە, دەنە قىزۋىنىڭ كوتەرىلۋىنە جانە بۇلشىقەتتەردىڭ اۋىرسىنۋىنا شاعىمدانىپ, باكۋدەگى ەمحاناعا بارعان.
ينفەكتسيونيست دارىگەر ناۋقاستىڭ بەلگىلەرىنە قاراپ مايمىل شەشەگىن جۇقتىرعانىنا كۇدىكتەنگەن. انامنەز جيناۋ ناتيجەسىندە ونىڭ شەتەلدە بولعانى جانە ساپار كەزىندە بورتپە پايدا بولعان اداممەن جاقىن بايلانىس جاساعانى انىقتالعان.
«ناۋقاستىڭ بەلگىلەرى ەپيدەميولوگيالىق بايلانىسپەن بىرگە زەرتحانالىق تەكسەرۋدەن وتۋگە نەگىز بولدى. بورتپەدەن الىنعان جاعىندىنىڭ پتر سىناماسى مايمىل شەشەگى ۆيرۋسىنا وڭ ناتيجەنى كورسەتتى. ناۋقاس قازىر اۋرۋحاناعا جاتقىزىلىپ, ستاتسيونارلىق ەم قابىلداپ جاتىر», دەلىنگەن حابارلامادا.
ناۋقاسپەن قارىم-قاتىناستا بولعان وتباسى مۇشەلەرىندە اۋرۋ بەلگىلەرى انىقتالماعاندىقتان, ولار اۋماقتىق امبۋلاتوريالىق-ەمحانالىق مەكەمە مەن سانيتارلىق-ەپيدەميولوگيالىق قىزمەت قىزمەتكەرلەرىمەن ۇيدەگى باقىلاۋعا الىندى. ولارعا پروفيلاكتيكالىق ەم تاعايىندالىپ, قاجەتتى ءدارى-دارمەكپەن قامتاماسىز ەتىلگەن.
